भांगरभूंय | प्रतिनिधी
पणजीः फातोड्डां मडगांव ते लंडन मेरेन व्याप्ती आशिल्ल्या अर्थीक फटवणूक प्रकरणांत दुबावीत मायरन रॉड्रिगीस आनी हेरांची तीन कोटी रुपयांची मालमत्ता अंमलबजावणी संचालनालयान (ईडी) तात्पुरती जप्त केल्या. हातूंत मुंबयची मालमत्ता आनी गोंयांतली मालमत्ता आनी कायम स्वरुपाची ठेवींचो आस्पाव आसा.
गोंय पुलिसांच्या अर्थीक गुन्यांव फांट्यान (ईओसी) दुबावीत मायरन रॉड्रिगीस आनी हेरां आड 2023 त चड कळंतर दिवपाचें हांयस दाखोवन लोकांक फटयिल्ल्याचे दोन गुन्यांव नोंद केल्यात. रॉड्रिगीस आनी ताची घरकान्न दीपाली परब हांचो दुबाव ईओसीन केला. दोगांयनी गोंयांतल्या 38 जाणांक 25 कोटी रुपयांची फटवणूक केल्ल्याचो आरोप आसा. हाची दखल घेवन ईओसीन फुडली चवकशी केली, तेन्ना मायरान 2009 ते 17 ऑगस्ट 2023 ह्या काळांत 130 कोटी रुपया अर्थीक वेव्हार केल्ल्याचें स्पश्ट जालें. हाचे भायर मायरान इडिलीक गोंय गेटवेज कंपनींत 3.25 कोटी रुपया गुंतवणूक केल्ल्याचें उक्तें जालें. ते प्रमाण कंपनीचे संचालक नोलन आंताव, जोआचिम रोसारिओ पिरेस, विजय जयल, नवनीक परेरा आनी सुशांत घोडगे (पेडणें) ह्या दुबावितांची ईओसीन चवकशी केली.
मजगतीं, ईओसी वयल्या कंपनीच्या मडगांव कार्यालयांत चवकशी करपाक गेले. तेन्ना फाटले कितलेशेच म्हयने ते बंद आशिल्ल्याचें स्पश्ट जालें. तशेंच तें रितें आशिल्ल्याचें दिसून आयलें.
मजगतीं, ईओसीच्या वयल्या प्रकरणाची दखल घेवन अंमलबजावणी संचालनालयान चवकशी सुरू केल्या. ते प्रमाण ईडीन संयुक्त संचालक अनुप कुमार रौथान हांच्या मार्गदर्शना खाला मायरन रॉड्रिगीस आनी ताची घरकान्न दीपाली परब हांच्या 2 कोटी 98 लाख 37 हजार 840 रुपया, तातूंत वडाला – मुंबयचो फ्लॅट, फातोड्डेचो बंगलो, नुवेंचो बंगलो हांचो आस्पाव जाता. हाचे भायर मायरनाची घरकान्न दीपाली परब हांच्या नांवान एचडीएफसी बँकेंत तीन फिक्स डिपॉझीट जप्त केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
