भांगरभूंय | प्रतिनिधी
प्रदेश काँग्रेसः पाटकारा सयत 22 जाणांक स म्हयने पणजे आंदोलन करपाक बंदी
भांगरभूंय । प्रतिनिधी
पणजीः सरकारी नोकरेचें हांयस दाखोवन गोंयकारांची कोट्यांनी रुपयांची फटवणूक केल्ल्या प्रकरणांची पारदर्शक यंत्रणे वरवीं चवकशी जावपाकूच जाय, अशी मागणी करून प्रदेश काँग्रेसीन शेनवारा पणजे आझाद मैदानाचेर खर आंदोलन केलें. रस्त्याचेर मदींच बशिल्ल्यान आंदोलनांत वांटो घेतिल्ले प्रदेशाध्यक्ष अमीत पाटकार, खासदार विरियातो फर्नांडीस हांचे सयत हेर पदाधिकाऱ्यांक पुलिसांनी ताब्यांत घेतले आनी वैयक्तीक हमीचेर तांची सुटका केली. पूण पाटकार हांचे सयत 22 जाणांक फुडले 6 म्हयने पणजी वाठारांत आंदोलन करपाक उपजिल्होधिकाऱ्यान बंदी घातल्या.
सरकारी नोकरेचें हांयस दाखोवन लोकांक लुट्ल्ल्या प्रकरणांत गोंय पुलिसांनी फाटल्या कांय दिसांत सुमार 25 जाणांक अटक केली. तातूंतल्या कांय जाणांची जामिनाचेर सुटका लेगीत जाल्या. ह्या प्रकरणांची विशेश चवकशी पंगडा वरवीं (एसआयटी) चवकशी करपाची मागणी काँग्रेसीन केल्ली, पूण ते खातीर एसआयटीची गरज नाशिल्ल्याचें सरकारान स्पश्ट केल्ल्यान काँग्रेसीन शेनवारा आझाद मैदानाचेर आंदोलन केलें. गोंयांतल्या विवीध वाठारांत काँग्रेस फुडारी, पदाधिकारी, कार्यकर्ते आनी तरणाट्यांनी आंदोलनवांत वांटो घेतिल्लो. आंदोलकांनी आझाद मैदाना वयल्यान मुख्यमंत्री डॉ. प्रमोद सावंत हांच्या सरकारी बंगल्याचेर वचपाचो यत्न केले उपरांत पुलिसांनी तांकां थंयच आडावन दवरले. ते उपरांत आंदोलकांनी रस्त्याचेर बसून सरकाराच्या विरोधांत घोशणाबाजी सुरू केली. ते खातीर पुलिसांनी अमीत पाटकार, विरियातो फर्नांडीस हांचे सयत हेर आंदोलकांक ताब्यांत घेतले.
तिनूय आमदार गायब !
फाटल्या कांय दिसांत गोंयांत गाजिल्ल्या अश्या प्रकरणांचेर प्रदेशाध्यक्ष अमीत पाटकार हांचे सयत कांय पदाधिकारी वेळावेळार आवाज काडटात. ताका लागून शेनवारच्या आंदोलना कडेन सगळ्यांची नदर लागिल्ली. पूण ह्या आंदोलनांत विरोधी पक्ष फुडारी युरी आलेमांव, कार्लोस फेरेरा आनी एल्टन डिकॉस्टा हे तिनूय आमदार दिसूंक नाशिल्ल्यान लोकां मदीं चर्चा चलताली.
संविधान श्रेश्ठ काय सरकारः पाटकार
पणजीः लोकांचे प्रस्न, समस्या सरकारा कडल्यान सुटल्यो ना जाल्यार ताचे आड आंदोलन करपाचो पुराय अधिकार विरोधकांक भारतीय संविधानान दिला. तरी लेलगीत उपजिल्होधिकाऱ्यान आपल्या सयत 22 जाणांक फुडले 6 म्हयने पणजी वाठारांत आंदोलन करपाक बंदी घातल्या. कायदेशीर सल्लो घेवन ह्या आदेशाक आपूण आव्हान दितलों, अशें काँग्रेस प्रदेशाध्यक्ष अमीत पाटकार हांणी स्पश्ट केलें. सरकारी नोकऱ्यो दिवपाचें हांयस दाखोवन जांणी लोकांक फटयले, तांची पारदर्शक यंत्रणे वरवीं चवकशी करून अश्या प्रकरणांत घुस्पल्ल्या व्हड नुस्त्यांचो सरकारान सोद घेवचो. सरकारी नोकरे खातीर पयशे दिल्ले खूबशे जाण नोकऱ्यो मेळूंक नाशिल्ल्यान उद्ध्वस्त जाल्यात. ताका लागून सरकारान हो विशय गांभिर्यान घेवप गरजेचें आशिल्लें, पूण हातूंत भाजपाच्या फुडाऱ्यांचीं नांवां येतलीं म्हूण सरकार आमची मागणी मान्य करिना, अशी टिका पाटकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
