भांगरभूंय | प्रतिनिधी
अर्थीक परिस्थिती अखंड आसल्यारुच आमच्यांनी खंयच्याय मळार समाजीक, धर्मीक वा राजकीय प्रभाव हाडूं येता. जे पर्यांन आमची अर्थीक परिस्थिती सुधारना तो पर्यांन आमच्या उतरांक खंयच्याच मळार मोल आसचेंना…
हांव सदांच सांगत आयलां की राजकारण, राजकी पक्ष, वेंचणुको आनी प्रातांचें राज्य करप- इतलेंच न्हय आयच्या काळार राजकारण आमच्या जिविताचो भाग जाला. प्रत्येक पावलाक आमकां राजकारण आडखळटा. कसलीच ल्हानांतलीं ल्हान वस्त वा घडणी घे आनी नियाळ कर. खंय ना खंय ताका राजकारण संबंदीत आसतलेंच. त्या खातीर राजकारण निवळ आसप खूब गरजेचें आसा. राजकारण निवळ जातलें जाल्यार, राजकारण करपी फुडारी निवळ मनाचे आसपाची गरज आसा. आयचे आमचे फुडारी निवळ मनाचे आसात काय?
गुणांचो बरे तरेन वापर जाय
देवान मनशाक तरेकवार गूण दिल्ले आसात. ह्या गुणांचो बरे तरेन वापर करूंक आमचें कर्तव्य जावन आसा. देवान दिल्ल्या आमच्या गुणांचो आमी खरेंपणी वापर करतांव काय? चड फावटीं ना. देखीक आमच्या भितरले कितलेशेच भाव आनी कितल्योश्योच भयणीं अनेक गुणांनी पर्जळतात. पूण दुर्दैवान त्या गुणांचो तीं वापर करीनात. आमकां कित्याक पडलां? अशें चिंतून हात-पांय कवळून ओगीच बसतात. देवान दिल्ल्या गुणांचो आमी वापर केलोना जाल्यार आमी देवाचे अनुपकारी जातांव, हातूंत मातूय दुबाव ना.
दुडवांचो वापर
आमच्या समाजाचेर नदर मारुंया. आमच्या कितल्या तरणाट्यांनी स्वताचे ल्हान- व्हड धंदो सुरू केल्यात? सरकाराच्यो इतल्यो सवलतीं आसतना, आमचे तरणाटे स्वताचो धंदो सुरू करपाक कित्याक फाटीं रावतात काय? म्हज्या अणभवा प्रमाणें आमच्या तरणाट्यांणी एकूच दिशा आनी ती म्हणल्यार गल्फ वा युरोपी देसांनी वचप आनी शिर्वीस. थंय इल्ले दुडू जोडप आनी परतून घरा आयले उपरांत पयलें एक नवें घर बांदप, नातर पोरणें आसा तें घर दुरुस्त करप. जोडिल्ली जोड घराचेर वापरप. बरें घर आसप सामकें गरजेचें, पूण सगळीं जोड घराचेरुच खर्च करप? ज्या खर्चावरीं कसलींच अर्थीक येणावळ ना? हातूंत मातूय शाणेंपण ना. पूण सुरवातेकच जर हे दुडू, सरकाराच्या येवजणांचो लाब घेवन, आपल्या आवडीच्या धंद्यांत घाल्लें जाल्यार दोन वाट्यांनी फायदो जातलो आशिल्लो, एक धंद्यांत खर्च केल्ल्या दुडवां वरवीं अर्थीक येणावळ आसतली आसली. आनी दोन ह्या धंद्याक लागून नोकरी उत्पन्न जातल्यो आशिल्ल्यो. बेकार तरणाट्यांक तातूंत वावर करून थोडें पूण जोडूंक संदी मेळटली आसली. हें काम आमचे भाव करीनात आनी हाका लागून अर्थीक नदरेन आमी फाटीं उरतांव.
कसले धंदे?
आमी करतल्या धंद्यांचेर बारीक नियाळ करूंया. आमी चड करून सोऱ्याची बार्रां चलयतांव. बार्रां चलोवप आमकां एकदम सोंपे जालां. आमकां हो एकूच धंदो आसा काय? गोंयचो कॉस्टल बॅल्ट ह्या वाठारान हालींच्या वर्सांनी आमी आमचीं घरां भोंवडेकारांक भाड्याक दिवन थोडी जोड करूंक लागल्यांव. ह्या वाठारांतले तरणाटे फकत शॅक्स घालपा फाटल्यान पेटल्यात. थोडे टॅक्सी ड्रायवर जाल्यात. कांय गिरेस्त मनश्यांनी स्वताचीं हॉटेलां सुरू केल्यांत. थोड्यांनी रेस्टोरेन्ट आनी पसरे घाल्यात. हाचे शिवाय आमच्या समाजातले तरणाटे दुसऱ्या धंद्यांनी चडशे दिसनात. हे पळोवन दुख्ख दिसता.
अखंड बु्न्यादी खातीर धंदे जाय
आमी राजकारण निवळ करतले जाल्यार आमची अर्थीक बुन्याद अखंड आसप खूब म्हत्वाचें आसा. आमची अर्थीक बुन्याद अखंड करतले जाल्यार आमी चडान चड धंदे सुरू करप. हेंय तितलेंच म्हत्वाचें जावन आसा. सरकाराच्यो जायत्यो येवजण्यो आसात. सरकाराची इन्डस्ट्रीअल पॉलिसी आसा. जाचे वरवीं उमेदी तरणाट्यांक आपले स्वताचो धंदो स्थापूंक सगळो आधार मेळटा. धंदे स्थापन करपाक जाग्याची अडचण आसल्यार सरकार जागो दिवंक प्रयत्न करता. दुडवांचे बाबतींत जायत्यो सवलतीं आसात. सरकाराची सबसिडी मेळटा. आनी त्या शिवाय रिण मेळटा. आयज खंयचीय बँक एका ब-या धंद्यांक अर्थीक आधार दिवंक फाटीं सरना. सगळ्यो सवलती आसात, पूण आमचे भितर ना ती धाडस आनी पोटतिडकीन वावर करपाची इत्सा.
सोंपयतना…
त्या खातीर धंद्यांनी मिसळ जावपाक आमच्या तरणाट्यां उत्तेजन दिवंया. धंदे करपाचें धाडस आनी पोटतिडक तांचे भितर उत्पन्न करूंया. आमच्या भुरग्यांनी प्रामाणीकपणान धंदे चलयले जाल्यार, आमची अर्थीक परिस्थिती सुधारूंक जातली. अर्थीक परिस्थिती अखंड आसल्यारुच, आमच्यांनी खंयच्याय मळार, समाजीक, धर्मीक वा राजकीय प्रभाव हाडूं येता. जे पर्यांन आमची अर्थीक परिस्थिती सुधारना तो पर्यांन आमच्या उतरांक खंयच्याच मळार मोल आसचेंना. त्या खातीर आमच्या तरणाट्यांनी आपले आवडीचे धंदे सुरू करपाक फुडाकार घेवंक तांकां आधार दिवंया. आनी आमी प्रामाणीकपणान धंदे केले जाल्यार आनी आमची अर्थीक परिस्थिती अखंड केली. जाल्यार आमच्या उतराचो प्रभाव समाजीक, धर्मीक, संस्कृतीक, आनी राजकी मळांचेर जेरुल पडटलो हातूंत मातूय दुबाव ना…
(लिप्यांतर ः विशाल सिनाय खांडेपारकार, 8080622370)
तोमाझिन कार्दोज
9822170102
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
