भांगरभूंय | प्रतिनिधी
24 मार्चा सावन 3 दिसांचें अधिवेशन
भांगरभूंय । प्रतिनिधी
पणजी : गोंय विधानसभेचें अर्थसंकल्पीय अधिवेशन 24 ते 26 मार्च ह्या काळांत जातलें. राज्यपाल पी. एस. श्रीधरन पिल्लई हांणी हे विशींचें समन्स जारी केला. 26 मार्चाक मुख्यमंत्री डॉ. प्रमोद सावंत 2025-26 चो अर्थसंकल्प सादर करतले. मजगतीं, तीन दिसांच्या ह्या अधिवेशना वयल्यान विरोधकांनी सरकाराचेर टिका केल्या.
केंद्रीय अर्थसंकल्प सादर जाले उपरांत फेब्रुवारींतूच गोंयचो अर्थसंकल्प सादर जाता, पूण अर्थसंकल्पाची तयारी तशेंच खात्यांच्या बसकांक लागून 6 आनी 7 फेब्रुवारी अशे दोन दीस चलिल्ल्या अधिवेशनांत अर्थसंकल्प सादर जावपाक शकलो ना. 6 फेब्रुवारीक राज्यपालांचें अभिभाशण जाले उपरांत 7 फेब्रुवारी ह्या एकाच दिसा कामकाज घेतलें.
मजगतीं, अर्थसंकल्पीय अधिवेशन फकत तिनूच दीस घेवन सरकार विरोधकांचो आवाज चेपता, असो आरोप विरोधी पक्ष फुडारी युरी आलेमांव हांणी केला. विधानसभा सभाघरांत विरोधकांच्या प्रस्नांक जापो दिवपाक सरकार भियेता. तेच खातीर दर खेपे अधिवेशनाचो काळ उणो करतात, अशेंय तांणी म्हणलें. अशे तरेचे निर्णय घेवन सरकार लोकशायेच्या मुल्यांक दुबळे करता. तशेंच लोकांनी वेंचून दिल्लया आमदारांक तांच्या अधिकारा पासून पयस दवरतात, अशीय टिका तांणी केली. आप आमदार व्हेन्झी व्हिएगश तशेंच गोवा फॉरवर्डाचे आमदार विजय सरदेसाय हांणी लेगीत तीन दिसांच्या अर्थसंकल्पीय अधिवेशना वयल्यान सरकाराचेर खर टिका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
