भांगरभूंय | प्रतिनिधी
नवी दिल्ली, खबरां संस्थाः केंद्रीय अर्थमंत्री निर्मला सीतारमण हांणी आयज संसदेंत 2024-25 वर्साचो अर्थसंकल्प सादर केलो. देशांतल्या भलायकी सेवा क्षेत्रा खातीर 90 हजार 171 कोटी रुपयांची तरतूद केल्या. हांतूत फाटल्या वर्साच्या तुळेंत सुमार 12 टक्क्यांनी वाड केल्या.
सीतारमण हांणी तीन कॅन्सर वखदांचेर कस्टम ड्यूटी आतां घेवचे नात अशी घोशणा केली. हाका लागून कॅन्सराचीं वखदां सवाय जातलीं. हाचे भायर घरगुती उत्पादन तांक वाडोवपा खातीर फेज्ड मॅन्युफॅक्चरिंग प्रोग्राम खाला वैजकी क्ष-किरण मशीनांत वापरिल्ल्या एक्स-रे ट्यूब आनी फ्लॅट पॅनल डिटेक्टरांचेर केल्ल्या मुळाव्या कस्टम ड्यूटींत (बीसीडी) बदलांचोय तपशील दिलो.
भारतांत कॅन्सराचें प्रमाण वाडत आसतना अर्थसंकल्पांत कॅन्सर वखदांचेर कस्टम ड्यूटी घेवचे ना अशी घोशणा केल्ल्यान कॅन्सर दुयेंतींक तांतूतल्यान सुटका मेळ्ळी. Trastuzumab Deruxtecan, Osimertinib आनी Durvalumab ह्या तिनूय वखदांचेर 10 टक्के कस्टम ड्युटी फारीक करपाची नाशिल्ल्यान ह्या वखदांचो खर्च आतां उणो जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
