भांगरभूंय | प्रतिनिधी
सुकाणू समिती कडेन मुख्यमंत्र्यांची चर्चा
पणजी : लोकाभिमुख आनी सर्वसमावेशक अर्थसंकल्प मांडपाचो म्हजो येत्न आसा. हाचे खातीर लोकां कडल्यान सुचोवण्याे मागपा सयत उद्देग तशेचं हेर संघटणां कडेन हांवे चर्चा केल्या, अशें मुख्यमंत्री डॉ. प्रमोद सावंत हांणी सांगलें. सुकाणू समितीच्या बसके उपरांत मुख्यमंत्र्यांनी ही म्हायती दिली.
विधानसभेचे अर्थसंकल्पी अधिवेशन 6 मार्च सावन सुरू जाता. अधिवेशनाच्या पयलेच दिसा म्हणल्यार 6 मार्चाक मुख्यमंत्री डॉ. प्रमोद सावंत हे अर्थीक वर्स 2026 – 2027 वर्साचो अर्थसंकल्प सादर करतले. अधिवेशन 27 मार्च मेरेन चलतलें.
अर्थसंकल्पी अधिवेशन आनी वेंचणुकांच्या फाटभुंयेर बुधवारा भाजपाच्या सुकाणू समितीची बसका जाली. बसकेत अर्थसंकल्पा सयत फोंडें पोटवेंचणूक, पणजी म्हापालिका वेंचणूक तशेच फुडें जावपी नगरपालिका वेंचणुकांचेर चर्चा जाली. अर्थसंकल्पा विशीं पक्षान काय मागण्यो सरकारा कडेन केल्या. ह्या मागण्यांचो आस्पाव अर्थसंकल्पात जातलो, अशें मुख्यमंत्री डॉ. प्रमोद सावंत हांणी सांगलें.
बसकेक प्रदेश भाजप अध्यक्ष दामू नायक, भौशीक बांदकाम खात्याचे मंत्री दिगंबर कामत, अॅड. नरेंद्र सावयकार, खेळा मंत्री रमेश तवडकार आनी हेर वांगडी हाजीर आशिल्ले.
भाजप सरकार हे लोकां खातीर आसा. लोकां खातीर ज्यो येवजण्यो आसा, त्यो लोकां मेरेन पावपाक जाय. सामान्य लोकां खातीर अर्थसंकल्प आसचो, अशी मागणी बसकेत केल्याचे अध्यक्ष दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
