भांगरभूंय | प्रतिनिधी
सुकाणू समिती कडेन मुख्यमंत्र्यांची चर्चा
पणजी : लोकाभिमुख आनी सर्वसमावेशक अर्थसंकल्प मांडपाचो म्हजो यत्न आसा. हाचे खातीर लोकां कडल्यान सुचोवण्यो मागपा सयत उद्देग तशेंच हेर संघटणां कडेन हांवें चर्चा केल्या, अशें मुख्यमंत्री डॉ. प्रमोद सावंत हांणी सांगलें. सुकाणू समितीचे बसके उपरांत मुख्यमंत्र्यांनी ही म्हायती दिली.
विधानसभेचें अर्थसंकल्पी अधिवेशन ६ मार्च सावन सुरू जाता. अधिवेशनाच्या पयल्याच दिसा म्हणल्यार ६ मार्चाक मुख्यमंत्री डॉ. प्रमोद सावंत हे अर्थीक वर्स २०२६ – २०२७ वर्साचो अर्थसंकल्प सादर करतले. अधिवेशन २७ मार्च मेरेन चलतलें.
अर्थसंकल्पी अधिवेशन आनी वेंचणुकांचे फाटभुंयेर बुदवारा भाजपाच्या सुकाणू समितीची बसका जाली. बसकेंत अर्थसंकल्पा सयत फोंडें पोटवेंचणूक, पणजी म्हापालिका वेंचणूक तशेंच फुडें जावपी नगरपालिका वेंचणुकांचेर चर्चा जाली. अर्थसंकल्पाविशीं पक्षान कांय मागण्यो सरकाराकडेन केल्यात. ह्या मागण्यांचो आस्पाव अर्थसंकल्पांत जातलो, अशें मुख्यमंत्री डॉ. प्रमोद सावंत हांणी सांगलें.
बसकेक प्रदेश भाजप अध्यक्ष दामू नायक, भौशीक बांदकाम मंत्री दिगंबर कामत, अॅड. नरेंद्र सावयकार, खेळा मंत्री रमेश तवडकार आनी हेर वांगडी हाजीर आशिल्ले.
भाजप सरकार हें फक्त लोकां खातीर आसा. लोकां खातीर ज्यो येवजण्यो आसात, त्यो लोकां मेरेन पावपाक जाय. सामान्य लोकां खातीर अर्थसंकल्प आसचो, अशी मागणी बसकेंत केल्ल्याचें अध्यक्ष दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
