भांगरभूंय | प्रतिनिधी
-मुख्यमंत्री डॉ. प्रमोद सावंत मांडटले कार्यकाळांतलो निमाणो अर्थसंकल्प
पणजी : गोंय विधानसभेचे अर्थसंकल्पी अधिवेशन 6 मार्च सावन सुरू जातलें. 27 मार्च मेरेन चलपी अधिवेशनांत 14 दीस कामकाज चलतलें. मुख्यमंत्री डॉ. प्रमोद सावंत हे विधानसभेच्या कार्यकाळांतलो निमाणो अर्थसंकल्प सादर करतलें. विधानसभा वेंचणुके पयलीचो हो निमाणो अर्थसंकल्प आशिल्ल्यान ताचे विशीं उमळशीक आसा.
राज्यपाल पुसापती अशोक गजपती राजू हांणी अधिवेशना विशींचे समन्स जारी केलां. अर्थसंकल्प सेगीत सादर करपाची मुख्यमंत्री डॉ. प्रमोद सावंत हांची ही आठवी खेप आसा. 2019 सावन आतां मेरेन सेगीत सात अर्थसंकल्प तांणी सादर केल्या. घटक राज्याचो दर्जो मेळ्ळे उपरांत सेगीत सगळ्यांत चड खेपे अर्थसंकल्प सादर करपाचो भोवमान डॉ. प्रमोद सावंत हांकाच फावो जाला. 17 मार्च 2019 हे दिसा मनोहर पर्रीकार हांका मरण आयले उपरांत 19 मार्च 2019 हे दिसा डॉ. प्रमोद सावंत हांणी मुख्यमंत्रीपदाचो सोपूत घेतलो. 2019 – 2020 वर्साचो अर्थसंकल्प मुख्यमंत्री आसताना मनोहर पर्रीकार हांणी सादर केल्लो. मात मुख्यमंत्री जाले उपरांत डॉ. प्रमोद सावंत हांणी पुरवणी अर्थसंकल्प अधिवेशनात सादर केलो. हो तांचो पयलो अर्थसंकल्प थारलो. हाचे उपरांत 2020 – 2021, 2021 – 2022 हे अर्थीक वर्सा खातीरचे अर्थसंकल्प तांणी सादर केले. विधानसभा वेंचणुके उपरांत परतून तेच मुख्यमंत्री जाले. हाचे उपरांत 2022 – 2023, 2023 – 2024, 2024 – 2025 आनी 2025 – 2026 अशें सेगीत चार अर्थसंकल्प तांणी सादर केले. फुडल्या वर्सा मार्च मेरेन विधानसभा वेंचणूक जातली. हाका लागून अंदूंचो 2026 – 2027 अर्थीक वर्साचो कार्यकाळांतलो तांचो हो निमाणो अर्थसंकल्प थारतलो. अर्थसंकल्प तयार करपा खातीर सरकारी खात्यांच्यो बसका सुरू जाल्या. अर्थसंकल्प सादर करचे पयली फाटले वर्साच्या अर्थसंकल्पाच्या कार्यवायेचो अहवाल लेगीत ते सादर करतलें. अर्थसंकल्पाच्या कार्यवायेचो अहवाल सादर करपी डॉ. प्रमोद सावंत हे पयलेच मुख्यमंत्री थारल्या.
शुक्रारा 6 मार्चाक सकाळी 11.30 वराचेर अधिवेशन सुरू जातलें. शेनवार, आयतार सोडून हेर दीस 27 मार्च मेरेन कामकाज चलतले. 19 मार्च आनी 26 मार्च हे दोन दीस कामकाज आसचें ना. प्रश्नोत्तरा सयत शून्य अवर, लक्षवेधी सूचोवण्यो, खासगी प्रस्ताव हे कामकाज चलतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
