भांगरभूंय | प्रतिनिधी
आदले न्यायाधीश फेर्दीन रिबेलोच्या पत्रा उपरांत विधेयक मांडपाची नोटीस
पणजी: गोंयच्यो जमनी वाटावपा खातीर जमनीची विक्री तशेंच रुपांतरणाचेर निर्बंद हाडपी खासा विधेयकाचो मसुदो आदले न्यायाधीश फेर्दीन रिबेलो हांणी तयार केला. ह्या मसुद्याची प्रत मेळ्ळे उपरांत गोवा फॉरवर्डाचे आमदार विजय सरदेसाय हांणी गोंय शेतजमीन जतनाय विधेयक 2026 मांडपाची नोटीस विधीमंडळ फांट्याक दिल्या. आदले न्यायाधीश फेर्दीन रिबेलो हांच्या मसुद्या प्रमाण शेतजमीन जतनाय विधेयक हांव अर्थसंकल्पी अधिवेशनांत मांडटलों अशें विजय सरदेसाय हांणी सांगलें.
हाचे पयलीं जमीन विक्रीचेर निर्बंद हाडपा खातीर विरोधी पक्ष फुडारी युरी आलेमांव हांणी लेगीत विधेयक मांडपाची नोटीस दिल्या. आदले न्यायाधीश फेर्दीन रिबेलो हांणी मसुदो धाडले उपरांतूच युरी आलेमांव हांणी विधेयक मांडपाची नोटीस दिल्या. विजय सरदेसाय आनी युरी आलेमांव हांचीं विधेयकां वेगळीं वेगळीं आसात. जमीन विक्रीचेर निर्बंद हाडपी विधेयक अधिवेशनांत मांडचें अशी मागणी आदले न्यायाधीश फेर्दीन रिबेलो हांणी सगल्या राजकी पक्षांक केल्या. विधेयकाच्या मसुद्याच्यो प्रती तांणी धाडल्यात.
गोंय वाटावपा खातीर नगर नियोजन कायद्याचें कलम 17(2) आनी 39 (ए) सरकारान रद्द करचें. तशेंच जमीन विक्रीचेर निर्बंद हाडपा खातीर भूंय महसूल संहितेत (एलआरसी) दुरुस्तीची तजवीज आसा. पणजे मिनेझीस ब्रागांझा सभाघरांत लोकचळवळ सभा जाल्ली. आदले न्यायाधीश फेर्दीन रिबेलो हांच्या फुडारपणा खाला ही सभा जाल्ली. हे सभेक उपाट प्रतिसाद मेळिल्लो.
जमीन विक्री बंद जावपा सयत पर्यावरण, शेतां तशेंच दायज आनी संस्कृतायेची जतनाय जावपाची मागणी उलोप्यांनी सभेंत केल्ली.
प्रादेशीक आराखडो आनी बाह्य उदरगत आराखडो (ODP) अस्तित्वांत आसा तो मेरेन प्रादेशीक आराखडो आनी बाह्य उदरगत आराखड्या प्रमाण बांदकामां करचीं. झोन बदलप, जमनीचो वापर बदलप वा एफएआर वाडोवपा खातीर शार आनी नगरनियोजन कायद्यांत केल्ल्यो 16- बी, 17 (2) वा 39 (ए) सारक्यो दरुस्त्यो रद्द करच्यो. जमीन महसूल संहिता ( Land Revenue Code) हातूंत दरुस्ती करून शेत रोयनाशिल्ल्यांक वा गोंयांत रावनात तांकां जमीन विकपाचेर बंदी हाडची. सीआरझॅड वाठारांत पडटात तीं सगलीं बेकायदेशीर बांदकामां बेगोबेग सील करचीं, तांचे परवाने रद्द करचे, ह्या मागण्यांचेर आदारीत विधेयकाचो मसुदो आदले न्यायाधीश फेर्दीन रिबेलो हांणी तयार केला.
विजय सरदेसाय हांणी शेत जमीन वाटावपा खातीर विधेयकाची नोटीस दिवचें पयली युरी आलेमांव हांणी हे विशीं विधेयक मांडपाची नोटीस दिल्या. दोगांची विधेयकां स्वतंत्र आनी वेगळीं आसात. आदले न्यायाधीश फेर्दीन रिबेलो हांच्या मसुद्याचेर आदारीत दोगांचीं विधेयकां आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
