भांगरभूंय | प्रतिनिधी
गोंय विधानसभेचें अर्थसंकल्पीय अधिवेशन, मागीर तें साडेतीन दिसांचे कांय आसना फाटल्या सप्तकांत जालें. मुख्यमंत्री म्हणून आपल्या कार्यकाळांतल्या दुसऱ्या डावांत पुराय जाल्ली वर्सपूर्ती डॉ. प्रमोद सावंत हांकां अधिवेशनाचें निमित्त सादून चड यादस्तीक करपाक जाताशिल्लें. मात तशें जालें ना. तीन- साडेतीन दिसांच्या ह्या अधिवेशनांत सरकारान कितें साध्य केलें हो चर्चेचो विशय थारपाक शकता. सरकार म्हणून अजूनय जायत्यो त्रुटी दाखोवपाक मेळटल्यो, मात समतोल आनी सगल्याच घटकांचो आसपाव आशिल्लो ‘सबका साथ, सबका विकास’ ह्या घोशवाक्याक न्याय दिवपाक शकतलो असो नव्या वर्साचो अर्थसंकल्प सादर करून मुख्यमंत्री डॉ. सावंत हांणी बऱ्याच प्रमाणात आपलो स्वताचो असो जो ठसो ह्या थोड्या दिसांच्या अधिवेशनाच्या कामकाजाचेर उठयला हाचो उल्लेख हांगा मुजरत करचो पडटलो.
अर्थसंकल्प तयार करतना पोरुंचे आंकडे फुडें व्हरून तातूंत थोडी भर घालप आनी एखाद्री दुसरी नवी येवजण लोकांच्या तोंडाक लावपाचो प्रकार सहसा घडटा. पूण, ताका फाटो दिवन मुख्यमंत्री सावंत हांणी सादर केल्लो अर्थसंकल्प बरीच मेहनत घेवन तयार केल्लाचें दिसता, हें विरोधकांनी ताचेर उक्तायिल्ल्या सकारात्मक प्रतिक्रियांतल्यान दिसून येता. आनी तेंच सरकाराचें ह्या अधिवेशनांतलें साध्य म्हणपाक जाता. विधानसभेचें आतांचें कामकाज पळयल्यार आमच्या सारक्यांक ती स्वताचो आत्मो शेणल्ली विधानसभा अशें दिसप सभावीक आसा. कारण कामकाजांतलें जितेपण खंय तरी ना जालां. अर्थांत हाच्या फाटल्यान जायतीं कारणांय आसात आनी ती मानून घेवचींच पडटलीं. अभ्यासू आनी विधिमंडळ कामकाजाची उमळशीक आशिल्ल्या वांगड्यांचो आंकडो एका हाताच्या बोटांचेर मेजपा इतलो उणी आशिल्ल्यान कामकाजाचो दर्जो अपेक्षीत उंचाय घेतना दिसना, हें बऱ्याच जाणानी पळयलें.
विधानसभेंत सद्या कोणी डॉ. काशिनाथ जल्मी वा रमाकांत खलप हांची सुवात घेतल्या अशें दिसना. मनोहर पर्रीकार हांच्या सारको विरोधी पक्ष फुडारी लागींच्या फुडाराक उदेंतोलो अशी आस्त बाळगुवपा सारकेंय विधानसभेंत कांय घडना. जांणी डॉ. जॅक सिकेरा, बाबू नायक, डॉ विल्फ्रेड डिसोझा, माधव बीर, फर्दिन रिबेलो, एदुआर्द फालेरो, हर्क्युलान दौराद, विष्णू नायक हांच्या सारक्या फायरब्रँड आमदारांक सभाघरांत पळयलां, तांकां सध्याचे विधानसभेचें कामकाज मिळमिळीत दिसल्यार तातूंत अजाप दिसपा सारकें कांय ना. हाका अर्थांत आयची दर घटकेक बदलपाक शकपी राजकी परिस्थिती, हें जशें कारण आसा तशेंच विधानसभेचो अर्थ दरेकलो आपल्याक बरो पडटा तसो लायत, एक विशिश्ट फास्केचे भायर वचून उलयता अशें सहसा दिसना. नव्या आमदारांचो वाडिल्लो आंकडो, ज्येश्ठ आमदारांक सध्या कितें तरी वेगळें करून दाखोवपाची नाशिल्ली उमेद आनी आतां कितें सिद्ध करपाचें ही तांचे मदीं तयार जाल्ली भावना, हातूंतल्यान सभाघरांत सध्या जें कामकाज चलता तें एके थारावीक चाकोरींत अाडकून पडिल्ल्याचें जाणवता.
सभाघराचें कामकाज पळोवपाक पयलींच्या तेंपार दिसपी लोकांची उमेद आतां तितलीशी दिसना. विधासभेच्या कामकाजाचें जावपी थेट प्रसारण हें काय जाणांक त्या फाटलें कारण दिसपाक शकता. पूण, थंय लेगीत कांय वेगळें चित्र दिसना. फाटलीं चार- पांच वर्सांच्या तेंपार सरकार विधानसभा कामकाजाक सामकार वचपाक अनमनता अशी जी एक प्रतिमा सध्याच्या सरकारा विशीं लोकांच्या मनांत तयार जाल्या आनी विरोधकांक तशी प्रतिमा तयार करपाक जें येश मेळ्ळां ताचे कडेन सरकारान गंभीरतायेन पळोवन ही प्रतिमा बदलपा खातीर ठोस पावलां घालपाची गरज आसा.
विधानसभा अधिवेशनाचें कामकाज थोड्याच दिसांत गुठलावपाक सरकाराक कित्याक धन्यता दिसता हें कळपाक मार्ग ना. सरकार विरोधकांत सरळ तोंड दिवपाक भियेंता असो कोणेय तातूंतल्यान निश्कर्श काडल्यार तो चूक कसो थारतलो? अर्थांत अधिवेशनाचो वेळ वाडयल्ल्यान तातूंत जावपी कामकाजाचो दर्जो वाडटलो अशें म्हणप धाडसाचें थारतलें. रटाळ चर्चेक कामकाजांत वेळ मेळपाक जायना. मात सद्याच्या वेळार वांगड्यांक चडांत चड संद दिवन तांचें परिपक्व अश्या आमदारां मदीं परिवर्तन करप शक्य आसा. अशे चर्चे खातीर गोंयांत विशयांचो उणाव आसा अशेंय कांय ना. मात अधिवेशना उण्यां वेळांत गुठलावपा कडेन सरकाराचो जो कल दिसता तो बदलपाची खर गरज आसा. विरोधकांचें अस्तित्वच आयज मुदलांत दिसना तरी चार- पांच दिसांच्या फुडें सरकार वचपाक तयार नाशिल्ल्याची जी प्रतिमा फाटल्या तेपार तांणी लोकां मदीं तयार केल्या ती सरकाराक खऱ्यांनीच भूशण मानपा सारकी ना. विधानसभेचें कामकाज वर्साक उण्यांत उणें पस्तीस तें चाळीस दीस चलप अपरिहार्य थारता. मात हालींचीं तीन अधिवेशनां मेळून वीस- बावीस दिसांच्या फुडें कामकाज जाल्लें दिसून येना. चार दिसांच्या अधिवेशनांत हालीं आमदारांच्या खाजगी कामकाजाच्या दिसाकूय फांटो दितात आनी ताचें समर्थन कोणाक करपाक मेळचें ना.
विधानसभेच्या फाटल्या सप्तकांत सोंपिल्ल्या साडेतीन दिसांच्या अधिवेशनाच्या कामकाजाचो नियाळ घेवपाचो जाल्यार विरोधी पक्ष फुडारी युरी आलेमांक हाका अजून खूब मजल मारपाची आसा आनी ते खातीर ताका बरीच मेहनत घेवची पडटली. अणभवांतल्यान वा हक्कान विरोधी पक्ष फुडारीचें पद आपले कडेन आयलें ना जाल्यार अपघातान तें मेळ्ळां हाची जाणीव युरी आलेमांव हाका आसतलीच. ईन मीन तीन वांगड्यांक हाता कडेन धरून सरकारा पक्षा कडेन संघर्श करप ही तशी सोंपी गजाल न्हय तरी तातूंत युरी आलेमांव हांकां खूब कितें शिकचें पडटलें. विरोधी बाकांचेर पांच- पांच वर्सां बसप आतां कोणाक आवडपाचें ना. विजय सरदेसाय हांच्या आवाजाचो वांगडूय तांकां मेळटा. एक- दोन नवे विरोधी आमदारूय ते तुळेंत सभाघरांत आवाज उठयतात ही समाधानाची गजाल आसली तरी अधिवेशनाचे दीस वाडचो अशें तांकां दिसप सभावीक आसा. सरकार पक्षांत आशिल्ल्या अंतर्गत मतभेदांचें प्रदर्शन कांय फावट जालें. 33 आमदारांच्या सरकार पक्षांत सगळें कितें स्थिरस्थावर आसा अशें ताका लागून म्हणपाक जायना. भाजपांत नव्यान आयिल्ल्या सगळ्यांचेच दिवपा- घेवपाचे वेव्हार अजून पुराय जावंक नाशिल्ल्यान ताचे कडेन जायत्या जाणांची नदर आसा. फुडल्या अधिवेशना मेरेन ते वेव्हार पुराय जावप शक्य आसा. थोडे दिसांचें अधिवेशन घेवपा फाटले तेंय एक कारण आशिल्ल्याचें जायत्या जाणांक दिसता. मात, सध्या निदान सरकार पुरायपणान मुख्यमंत्री सावंत हांच्या नियंत्रणा खाला आशिल्ल्याचें दिसता. लोकप्रीय अर्थसंकल्प सादर करून जाल्यार लोकांच्या आनीक लागीं वचपाक तांकां येश मेळ्ळां. अर्थसंकल्पीय अधिवेशनाचें तें एक व्हड साध्य आसा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
