भांगरभूंय | प्रतिनिधी
आयकर मर्यादा 8 लाखां मेरेन वाडोवपाची आस्त
भांगरभूंय । प्रतिनिधी
पणजी : केंद्रीय अर्थमंत्री निर्मला सीतारामन ह्यो आयज सकाळीं 2025 – 2026 वर्साचो अर्थसंकल्प संसदेंत सादर करतल्यो. वर्सुकी आयकर शुल्क मर्यादा 8 लाखां मेरेन वाडोवपाची आस्त आसा. हाका लागून देशाच्या हेर वाठारा सयत गोंयकारांचें लक्ष अर्थसंकल्पा कडेन आसा.
मुख्यमंत्री डॉ. प्रमोद सावंत हांणी फाटल्या म्हयन्यांत दिल्लींत केंद्रीय अर्थमंत्री निर्मला सीतारामन हांचे सयत हेर केंद्रीय मंत्र्यांची भेट घेतली. अर्थमंत्री निर्मला सीतारामन हांचे कडेन मुख्यमंत्र्यांनी अर्थसंकल्पा विशीं लेगीत चर्चा केल्या. हाका लागून गोंयकारांच्यो अपेक्षा वाडल्यात. आयकर मर्यादा 8 लाखां मेरेन वाडयली जाल्यार खूबश्या गोंयकारांक तिचो लाव जातलो. हे खेपे इनकम टॅक्साच्या स्लॅबांत व्हड बदल जावपाची शक्यताय आसा. ते प्रमाण करप्राप्त उत्पन्नाची मर्यादा थेट 8 वा 10 लाखां मेरेन वाडोवपाची शक्यताय उक्तायतात. तातूंत नोकरदार वर्गाक व्हड थाकाय मेळपाची शक्यताय आसा. त्याच वेळार दुसरे वटेन इनकम टॅक्स भरचे खातीर 25 टक्क्यांची नवी श्रेणी प्रस्तावीत करपाक शकतात. तातूंत 15 ते 20 लाखांच्या उत्पन्नाचेर 25 टक्के शुल्क लागू जावपाची शक्यताय आसा. सध्या 15 लाखां वयल्या उत्पन्नाचेर 30 टक्के शुल्क लागू करतात. गोंयांत रस्ते, म्हामार्गा सयत मुळाव्या सुविधांची कामा नेटान चालू आसात. ह्या सगळ्या कामां खातीर केंद्रान भरीव निधी दिला. चित्रपट महोत्सव तशेंच हेर परिशदां खातीर संवसारीक पावंड्या वयलें परिशद घर दोनापावल वाठारांत उबारपाचो प्रस्ताव आसा. हे भायर सगळ्या बसस्टॅण्डांचें नूतनीकरण करपाचो प्रस्ताव आसा. तशेंच हाचे खातीर गोंय सरकारान केंद्रा कडेन निधी मागला. गोंयांत आतां नुस्तेमारी तशेंच गोरवां पोसपी आनी चिकित्सा म्हाविद्यालय उबारपाचो प्रस्ताव आसा. हाचे खातीर लेगीत केंद्रा कडल्यान निधीची आस्त आसा. हे पयलींच्या दरेकी अर्थसंकल्पांत केंद्रान गोंया खातीर कितें ना कितें दिवपाची घोशणा केल्या. अंदूंच्या अर्थसंकल्पा कडल्यान गोंयकारांच्यो चड अपेक्षा आसात.
अतिरिक्त निधीची उद्देगीक संघटनांची मागणी
वीजपुरवण, आयटी, मुळाव्यो सुविधा तशेंच उद्देगीक उदरगती खातीर गोंय चेंबर तशेंच हेर उद्देगीक संघटणांनी अतिरिक्त निधीची मागणी केल्या. हे विशींचें निवेदन गोंय चेंबरान केंद्रीय अर्थमंत्र्यांक सादर केलां. वेवसाय सुलभीकरणा खातीर थळाव्या पावंड्याचेर उद्देगां खातीर शुल्क लागू करचें न्हय, अशी मागणी आसा. खर्च, येणावळ तशेंच शुल्काचें प्रमाण कळपा खातीर अर्थसंकल्पाच्या सादरीकरणाची पद्दत इन्फोग्राफीक्साचेर आदारीत आसपाची गरज आसा. न्हंय येरादारी तशेंच दर्यादेग पर्यटना खातीर निधीची गरज आसा. उद्देग तशेंच उदरगती खातीर दर्जेदार वीजपुरवण जावपाची गरज आसा. वीज पुरवण वेवस्थे कडेन संबंदीत यंत्रणा पोरणी जाल्ल्यान गळटीचें प्रमाण वाडलां. वीज पुरवण सुदारपा खातीर निधी दिवपाची गरज आसा.
गोंय चेंबर सभाघरांत अर्थसंकल्पाचें प्रक्षेपण
गोंय चेंबर कार्यालयांत सभाघरांत व्हड स्क्रिनीचेर अर्थसंकल्पाचें प्रक्षेपण जातलें. सकाळीं 11 वरांचेर प्रक्षेपण सुरू जातलें. गोंय चेंबरचे पदाधिकारी, वेवसायीक, उद्देजक आनी हेर मानेस्तांची ह्या वेळार उपस्थिती आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
