भांगरभूंय | प्रतिनिधी
पणजी : अर्थसंकल्पाक आतां फकत एक म्हयनो आशिल्ल्यान खात्या वतीन अर्थसंकल्पाची तयारी नेटान सुरू आसा. आतां मेरेन ८० टक्के खात्यांच्यो बसका पुराय जाल्यात. खात्याच्या मंत्र्यांक आढावो सादर केले उपरांत मुख्यमंत्री अर्थसंकल्पांतले तरतुदींचो आढावो घेतले. खातें मुखेलीं कडल्यान ही म्हायती मेळ्ळी.
अधिवेशन २४ मार्च ते २६ मार्च ह्या काळांत जातलें. अर्थसंकल्पाची तारीख निश्चीत जरी नासली तरी तो २६ मार्चाक सादर जावपाची शक्यता आसा. अर्थसंकल्पाक आतां एक म्हयनो आशिल्ल्यान खात्या वतीन आता निमाणो आढावो घेतले. अर्थ खात्या वतीन विवीध खात्यांच्यो ८० टक्के बसका पुराय केल्यात. गोवा चेंबर, लघु उद्येग संघटना, टीटीएजी, बार ऍन्ड रेस्टॉरंट ह्या संघटनांच्या प्रतिनिधीं वांगडा आतां मुख्यमंत्री बसका घेतले. ह्यो संघटना मागण्यांचें निवेदने मुख्यमंत्र्यांक सादर करतल्यो.
केंद्रीय अर्थसंकल्प फेब्रुवारींत सादर केला. केंद्रीय अर्थसंकल्प सादर केले उपरांत फेब्रुवारींतूच राज्याचो अर्थसंकल्प सादर करतात. तरी अंदूं खात्यांच्यो येवजण्यो आनी निधीच्या तरतूदीं खातीर वेळ मेळचो, म्हणून अर्थसंकल्पाक कळाव जालो. पर्यटन, नुस्तेंमारी, कृषी हांतल्या केंद्रीय येवजण्यांची राज्याच्या अर्थसंकल्पांत पुनरावृत्ती जावची न्हय, हाचीय दक्षता घेतले. अंदूं धावी आनी सवे खातीर राष्ट्रीय शिक्षण धोरणाची कार्यवाय जाता. राष्ट्रीय शिक्षण धोरणाच्या कार्यवाहे खातीर अर्थसंकल्पांत भरीव तरतूद आसतली, अशी म्हायती सुत्रांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
