भांगरभूंय | प्रतिनिधी
पणजी ः केंद्रीय अर्थमंत्री निर्मला सीतारमण हांणी सादर केल्ल्या अर्थसंकल्पांत 12 लाख रुपया मेरेन उत्पन्न आशिल्ल्या व्यक्तींक आयकरांतल्यान सुट मेळपाची घोशणा केल्या. हाका लागून मध्यमवर्ग सशक्त जातलो. हाका लागून चड बचत जातली आनी गुंतवणूक वाडटली. सशक्त मध्यमवर्ग म्हणल्यार सशक्त भारत अशी प्रतिक्रिया मुख्यमंत्री डॉ. प्रमोद सावंत हांणी दिली.
प्रधानमंत्री नरेंद्र मोदी हांच्या फुडारपणा खाला अर्थमंत्री निर्मला सीतारमण हांणी सादर केल्ल्या विकसीत भारत 2025 अर्थसंकल्पाक हांव पुराय मनान येवकार दितां अशें मुख्यमंत्र्यांनी सांगलें. ह्या अर्थसंकल्पांत विकसीत भारताच्या चार विभागा खाला बायलां सशक्तीकरण, तरणाट्यांचें सशक्तीकरण, अन्न सुरक्षा आनी गरीब कल्याण साध्य करपा खातीर धा उदरगत उपायांची रुपरेखा दिल्या. हाका लागून बळिश्ट आनी समृद्ध भारताची वाट मेकळी जातली.
शेतकी उदरगत, ग्रामीण समृध्दी, समावेशक वाड, एमएसएमईक आदार, रोजगार निर्मिती, कामगार गुंतवणूक, उर्जा स्रोत सुरक्षीत करप, निर्यात वाडोवप हांचे वरवीं अर्थवेवस्था घटमूट करपाचेर अर्थसंकल्पांत भर दिला. अर्थसंकल्पांत कर, वीज क्षेत्र, शार उदरगत, खणकाम, अर्थीक नियमन आनी निर्यात प्रोत्साहन ह्या मळार परिवर्तनकारी सुदारणा सादर केल्यात.
पर्यटनांतल्यान चलपी अर्थीक वाड, रोजगार निर्मिती, जहाज बांदप, नुस्तेमारी, आनी नवनिर्माण हातूंत खाजगी क्षेत्राचो वांटो वाडोवपाकय प्राधान्य दिलां. मुळाव्या साधनसुविधांनी गुंतवणूक करप आनी मनीस संसाधन सशक्त करप हाचेर लक्ष केंद्रीत करपी हो अर्थसंकल्प कर्तव्याची आमची वचनबद्धताय परतून स्पश्ट करता. आमच्या सामुहीक यत्नांक लागून भारताक विकसीत भारत 2047 च्या दृश्टीकोना कडेन व्हरतले, अशी आस्त मुख्यमंत्र्यांक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
