भांगरभूंय | प्रतिनिधी
वेन्झी व्हिएगशः रीण फारीक करपाची सरकाराची पद्दत अयोग्य
भांगरभूंय । प्रतिनिधी
पणजीः अर्थसंकल्पांतले तजविजे परस सरकार भांडवली मळार उणो खर्च करता, असो आरोप आमदार वेन्झी व्हिएगस हांणी केलो. 2022 – 23 च्या अर्थीक वर्सा भांडवली खर्चा खातीर 4,759 कोटींची तजवीज आशिल्ली. सरकारान तातूंतले 3,441 रुपया खर्च केले. तजविजे परस 1,318 कोटी रुपया उणो खर्च केलो, अशी म्हायती वेन्झी व्हिएगस हांणी दिली. 2015 उपरांत सरकार तजविजे परस भांडवलाचेर उणो खर्च करता, अशें तांणी सांगलें.
सरकार योग्य पद्दतीन रीण फारीक करिना, असो उल्लेख म्हालेखापालांच्या अहवालांत आसा. उदक आनी नितळसाणीचेर सरकार 43 टक्के उणो खर्च करता, असो उल्लेख म्हालेखापालांच्या अहवालांत आसा. हाचेर सरकारान लक्ष दिवपाची गरज आसा, अशें वेन्धी हांणी सांगलें.
भुंयगत वीज केबलां खातीर सरकारान बाणावली मतदारसंघांत 41.68 कोटी रुपया मंजूर केल्यात. ही बरी गजाल. हाका लागून आपूण सरकाराक देव बरें करूं म्हणटा. तशेंच उदकाची पोरणी पायपलायन बदलपा खातीर 13 कोटी रुपया मंजूर केल्यात. ही लेगीत बरी गजाल, अशें वेन्झी हांणी सांगलें.
कला सन्मान येवजणेचे पयशें मेळपाक कळाव जाता. हे येवजणेचो चडांत चड कलाकारांक लाव मेळपाक जाय. खूबशे कलाकार जाण्टेपणांत हलाखीची जीण जगतात. राष्ट्रीय खेळां सर्तींत गोंयचे खूबशे खेळगडे वांटो घेवपाक वतात. ह्या खेळगड्यांक योग्य ती अर्थीक मजत मेळपाक जाय. हाचे खातीर अर्थसंकल्पांत फावो त्या प्रमाणांत तजवीज करपाची मागणी वेन्झी हांणी केली. गोवा मायल्स टॅक्सी सेवेक लागून थळाव्या टॅक्सीकारांचेर अन्याय जावपाक फावाना. गोवा मायल्साचेर हॉटेलांतले गेस्ट व्हरपाचेर बंदी घालपाक जाय. थळाव्या टॅक्सीकारांचें हीत जपपाची गरज आसा. बाणावली मतदारसंघांत आपत्कालीन भलायकी केंद्राची गरज आसा. सीएसआर पद्दतीन आप्तकालीन भलायकी केंद्र उबारपाचे यत्न आसात. अंगणवाडींत सीएसआर तत्वाचेर आपत्कालीन भलायकी केंद्र उबारपाक सरकारान ना हरकत दाखलो दिवचो, अशी मागणी आमदार वेंझी व्हिएगस हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
