भांगरभूंय | प्रतिनिधी
आदले प्रधानमंत्री डॉ मनमोहन सिंग अंतरले
खबरां संस्था
नवी दिल्लीः आदले प्रधानमंत्री डॉ. मनमोहन सिंग बिरेस्तारा संवसाराक अंतरले. स्वास घेवपाक त्रास जातलो हे खातीर तांकां दिल्लीच्या एम्स हॉस्पिटलांत दाखल केल्ले. पिरायेच्या 92 व्या वर्सा तांणी निमाणो स्वास घेतलो. ते भारताच्या उदारमतवादी धोरणाचे जनक आशिल्ले.
भलायकेच्या कारणा खातीर डॉ. सिंग फाटल्या कांय वर्सां सावन राजकारणा पासून पयस आशिल्ले. 1991 त देश अर्थीक संकश्टा कडेन झुजतालो त्या वेळा वयले अर्थमंत्री डॉ. मनमोहन सिंग हांणी देशाची बाजारपेठ संवसारा खातीर उक्ती केली. तांणी खाजगीकरण- उदारीकरण आनी संवसारीकरणाचो मार्ग आपणायलो आनी देशाची अर्थवेवस्था मार्गार हाडली.
2004 त ज्या वेळार यूपीए सरकारान भोवमत मेळयलें तेन्ना डॉ. मनमोहन सिंग पयले खेपे प्रधानमंत्री जाले. 2008 त अमेरिकेंतले मंदीक लागून संवसारभरांत मंदी निर्माण जाली, पूण डॉ. मनमोहन सिंग हांच्या धोरणाक लागून भारताक ताची कसलोच धग लागूंक ना. ते उपरांत 2009 त ते दुसरे खेपे प्रधानमंत्री जाले.
डॉ. मनमोहन सांग हांचो जल्म 26 सप्टेंबर 1932 ह्या दिसा पाकिस्तानांतल्या गाह ह्या गांवांत जालो. 1947 त फाळणी वेलार विस्थापीत जावन सिंग कुटुंब भारतांत आयलें. ते उपरांत पंजाब विद्यापिठांतल्यान तांणी पदवी मेरेनचें शिक्षण घेतलें. डॉ. मनमोहन सिंग हांणी ऑक्सफर्ड विद्यापिठांतल्यान अर्थशास्त्रांत डॉक्टरेट केली.
1966 ते 1969 ह्या काळांत डॉ. मनमोहन सिंग हांणी संयुक्त राष्ट्रांत कामा केलें. उपरांतच्या काळांत ते भारत सरकाराच्या वाणिज्य मंत्रालयांत सल्लागार म्हूण रुजू जाले. 1972 ते 1076 ह्या काळांत भारत सरकाराचे मुख्य अर्थीक सल्लागार म्हूण तांणी काम केलें. 1982 ते 1985 ह्या काळांत तांणी रिझर्व्ह बँकेचे गव्हर्नर म्हूण काम केलें. ते उपरांत 1985 ते 1987 ह्या काळांत तांणी नियोजन आयोगाच्या अध्यक्षपदाचेर काम केलें.
1991 च्या अर्थीक संकश्टा वेळार तेन्नाचे प्रधानमंत्री नरसिंह राव हांचे कडल्यान डॉ. मनमोहन सिंग हांची अर्थमंत्रीपदार निवड केली. अर्थमंत्री म्हूण डॉ. मनमोहन सिंग हांच्या कार्यकाळांत अर्थवेवस्तेचें उदारीकरण केलें. भारताक अर्थीक संकश्टांतल्यान भायर काडपाक तांणी म्हत्वाची भुमिका केली. 1996 त डॉ मनमोहन सिंग हे राज्यसभेचे पयले विरोधी पक्ष फुडारी आशिल्ले. 2004 त यूपीएची सत्ता आयले उपरांत तांणी देशाचे 13 वे प्रधानमंत्री म्हूण सोपूत घेतलो. 2004 ते 2014 ह्या काळांत तांणी दोन खेपे प्रधानमंत्री म्हीण काम केलें. एप्रील 2024 त तांणी राज्यसभेंतल्यान निवृत्ती घेतली.
प्रतिश्ठीत फुडाऱ्याक वगडायलोः प्रधानमंत्री नरेंद्र मोदी
भारतान आपल्या सगळ्यांत प्रतिश्ठीत फुडाली डॉ. मनमोहन सिंग हांकां वगडायला. नमळाय सांबाळपी डॉ. मनमोहन सिंग व्हड अर्थशास्त्री आशिल्ले. तांणी विवीध सरकारी पदांचेर तशेंच अर्थमंत्री म्हूण काम केलें आनी फाटल्या कांय वर्सांत आमचें अर्थीक धोरण घटमूट केलें. संसदेंतलो तांचो हस्तक्षेप लेगीत अभ्यासपूर्ण आशिल्लो. प्रधानमंत्री ह्या नात्यान तांणी लोकांची जीण सुदरावपा खातीर खूब यत्न केले, अशें प्रधानमंत्री नरेंद्र मोदी हांणी म्हणलां.
सरकार वेवस्थेंत म्हत्वाची भुमिकाः गृहमंत्री अमीत शाह
आदले प्रधानमंत्री डॉ. मनमोहन सिंग हांच्या मरणाची खबर सामकीच दुखदिणीं. भारतीय रिझर्व्ह बँकेंत गवर्नर ते देशाचे अर्थमंत्री आनी प्रधानमंत्रीच्या रुपांत डॉ. मनमोहन सिंग हांणी देशाचे सरकार वेवस्थेंत म्हत्वाची भुमिका केल्या. दुख्खाच्या ह्या खिणांत तांच्या घरच्यांक आनी समर्थकांक भुजवण दितां. वाहेगुरूजी तांच्या आत्म्यांक शांती दीवं आनी तांच्या घरच्यांक हे दुख्ख सोंसपाची शक्त दीवं, अशें गृहमंत्री अमीत शाह हांणी सोशल मिडिया वरवीं म्हणलां.
परिवर्तनकारी प्रवासांत म्हत्वाचें योगदानः डॉ. प्रमोद सावंत
भारताचे आदले प्रधानमंत्री डॉ. मननोहन सिंग हांच्या मरणाची खबर आयकून भोव दुख्ख जालें. तांणी मेकळे, उक्ते अर्थवेवस्थेचे दिकेन भारताच्या परिवर्तनकारी प्रवासांत म्हत्वाचें योगदान दिल्लें, अशी प्रतिक्रिया मुख्यमंत्री डॉ. प्रमोद सावंत हांणी उक्तायल्या. भारताचे वाडीक डॉ. सिंग हांणी दिल्ल्या अफाट योगदाना विशीं भारतीयांच्या मनांत सदांच आदर उरतलो. ताच्या कुटुंबाक दुख्ख सोंसपाचें बळगें मेळचें. डॉ. सिंग हांच्या आत्म्याक सद्गती मेळूं, अशींय आर्गां डॉ. सावंत हांणी ओंपल्यांत.
काँग्रेसचे बेळगाव अधिवेशन रद्द
आदले प्रधानमंत्री डॉ. मनमोहन सिंग हे अंतरिल्ल्यान भारतीय राष्ट्रीय काँग्रेसीचें बेळगांवचें दोन दिसांचें विशेश अधिवेशनाच्यो दुसऱ्या दिसाच्यो कार्यावळी रद्द केल्ल्याची घोशणा काँग्रेस अध्यक्ष मल्लिकार्जून खर्गे हांणी केली. डॉ. सिंग हांच्या मरणाची खबर कळटाच विरोधी पक्ष फुडारी राहूल गांधी बेळगांवच्यान नवी दिल्ली वचपाक भायर सरले.
विद्वान फुडाऱ्याक देश पयसावलाः युरी
अर्थशास्त्री म्हूण आदले प्रधानमंत्री डॉ. मनमोहन सिंग हांणी देशाचे अर्थवेवस्थेक आकार दिला. तांच्या मरणान देश एका विद्वान फुडाऱ्याक पयसावला, अशें काँग्रेस विधीमंडळ फुडारी युरी आलेमांव हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
