भांगरभूंय | प्रतिनिधी
-पॉवरग्रिडाच्या 35 व्या स्थापणूक दिसा केंद्रीय मंत्र्याचें निवेदनपणजीः खंयचेय अर्थवेवस्थेचे उदरगतींत उर्जा क्षेत्राची म्हत्वाची भुमिका आसता आनी आमचो देश ह्या क्षेत्रांत अग्रेसर आसा. आयच्या काळांत उदरगती वांगडाच टिकावूपणाचेरूय भर दितात. देखून उर्जा सुरक्षीतताय, विस्वास आनी उर्जा संक्रमण सुरू जालां. हरीत उर्जेचेर भर दिल्ल्यान जायत्यो संदी उक्त्यो जाल्यात. खासा करून देशभरांत नवीकरणीय उर्जेची व्हड प्रमाणांत उदरगत आमी पळयतात अशें केंद्रीय मंत्री श्रीपाद नायक हांणी सांगलें.
नवी दिल्लींत पॉवरग्रिडाचो 35 वो स्थापणूक दीस मनोवपा खातीर आयोजीत केल्ले कार्यावळींत नायक उलयताले. ह्या निमतान उर्जा सचीव पंकज अग्रवाल, नव आनी नवीकरणीय उर्जा सचीव प्रशांत कुमार सिंग, पॉवरग्रिडाचे अध्यक्ष आनी वेवस्थापकी संचालक आर. के. त्यागी, उर्जा मंत्रालयाचे वरिश्ठ अधिकारी आनी हेर मानेस्त हाजीर आशिल्ले.
पॉवरग्रीड ही वीज मंत्रालयाच्या खाला काम करपी म्हत्वाची कंपनी आसून ताची वीज क्षेत्राच्या तशेंच आमच्या देशाच्या उदरगतींत खूब म्हत्वाची भुमिका आसा. वेगवेगळ्या मळार मेळिल्लें येस चालूच आसा हें फकत कर्मचाऱ्यांच्याच न्हय जाल्यार तांच्या कुटुंबाच्याय समर्पण आनी बांदिलकेचे प्रतिबींब असो, केंद्रीय मंत्री नायक हांणी उल्लेख केला.
देशांतल्या उर्जा सुरक्षेचो वाडत आशिल्लो हुस्को पळयल्यार हालींच्या काळांत नव्या आनी नवीकरणीय उर्जेची भुमिका खूब म्हत्वाची मानल्या. देशाची उर्जेची गरज भागोवपा खातीर नव्या आनी नवीकरणीय उर्जेचो प्रसार आनी विकास करपा खातीर सरकारान कितल्योशोच येवजण्यो चालीक लायल्यात. ‘प्रधानमंत्री-सूर्य घर येवजण’ ही प्रधानमंत्री नरेंद्र मोदीची एक म्हत्वाकांक्षी येवजण, जी 7,5000 कोटी परस चड गुंतवणूक करून दर म्हयन्याक 300 युनीट फुकट वीज दिवन 1 कोटी घरांक उजवाड दिवपाचो हेतू आसा. तेच बरोबर प्रधानमंत्री नरेंद्र मोदी हांचे कडेन हेर येवजण्यो आसात, जीं उर्जा क्षेत्राचे उदरगतींत सेगीत योगदान दितात. सौर पीव्ही मॉड्यूल पीआयएल येवजण, राष्ट्रीय ग्रीन हायड्रोजन मिशन आनी पीएम कुसुम येवजण – जाचे वरवीं सौर पंप आनी वीज प्रकल्प स्थापन करून शेतकारांचें उत्पन्न वाडोवपाचेर भर दिला अशें श्रीपाद नायक हांणी सांगलें.
सगळ्या व्हडल्या कंपनींनी एकूच गजाल समान आसा, ती म्हणल्यार कंपनी मुखार व्हरपी लोक. पॉवरग्रीड आपल्या वेगवेगळ्या प्रकल्पां वरवीं कर्मचाऱ्यांच्या आनी तांच्या कुटुंबाच्या सर्वांगी उदरगती खातीर फुडाकार घेता हाची म्हाका खोस जाता. कंपनीच्या उत्कृश्ट कामगिरींतल्यान आनी कंपनीन केल्ल्या वेगवेगळ्या कामगिरींतल्यान हें स्पश्ट जाता, ह्या उतरांनी नायक हांणी पॉवरग्रिडाक परबीं दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
