भांगरभूंय | प्रतिनिधी
श्रीपाद नायक: पानवेलकर कला सांस्कृतीक मंडळाचो वर्धापन दीस उमेदीन
पणजी: अर्थपूर्ण जिणेक कलेचो आदार मेळपाक जाय. कला ही एका दिव्या सारकी आसता. जी तुमकां पर्जळयत रावता, अशें केंद्रीय राज्यमंत्री श्रीपाद नायक हांणी म्हणलें. पुर्वजांनी दिल्ले संस्कृतायेचें दायज फुडले पिळगे मेरेन पावोवपाचें काम पानवेलकर कला संस्कृती मंडळ करता आनी ताचे पदाधिकारी बरे तरेन वावुरतात, अशें तांणी फुडें म्हणलें.
आयतारा पानवेलकर कला सांस्कृतीक मंडळाचो 17 वो वर्धापन दीस सुवाळो पानवेल-रायबंदर हांगच्या सरकारी मुळावे शाळेचे रंगमाचयेर मनयलो. ह्या वेळार श्रीपाद नायक मुखेल सोयरे म्हणून उलयताले.
ह्या वेळार ज्येश्ठ तबलावादक नितीन कोरगांवकार, तबलें तशेंच पखवाजवादक लक्ष्मण गोपाळ च्यारी (हणखणें-पेडणें) आनी नाट्यकलाकार संजय काशिनाथ कामत तारकार (रायबंदर) हांचो श्रीपाद नायक हांचे हस्तुकीं विशेश भोवमान जालो. तशेंच विवीध मळावेल्या मानेस्तांचो ह्या वेळार मुखेल सोयरे राज्य सांस्कृतीक पुरस्कार मानेली कलाकार धर्मानंद गोलतकार आनी पोरणें गोंयचे आदले सरपंच निळकंठ भोमकार हांचे हस्तुकीं भोवमान जालो. हातूंत डॉ. उद्धवी उदय नायक (दांत चिकित्सक), श्रुती संजीव नायक (भजन आनी नाट्य), नताशा खुशाली कुट्टीकार (भजन आनी नाट्य) हांचो आसपाव आशिल्लो.
ह्या वेळार माचयेर मानाचे सोयरे उद्देजक तशेंच समाजसेवक लक्ष्मण (बाब) रायकार, निवृत्त सहाय्यक शिक्षण संचालक निशा लक्ष्मण रायकार, युवा समाजकार्यकर्ते समील वळवयकार, बलभीम महारुद्र देवस्थानाचे अध्यक्ष सागर केरेंकार, शाळेची मुख्याध्यापिका मनिषा नायक, आदले पंच तुळशीदास कंवळेंकार, नादब्रह्मचे अध्यक्ष गजानन गोलतकार, नाट्यकलाकार भालचंद्र उसगांवकार, पत्रकार विजय भादवणकार, पोरणें गोंयचे पंच वांगडी विनोद देसाय आनी संस्थेचे अध्यक्ष संदीप सत्यवान नायक हाजीर आशिल्ले. मनिषा नायक हांचे हस्तुकीं निशा रायकार हिचो सन्मान केलो.
धर्मानंद गोलतकार हांणी, कलाकार हो ल्हव ल्हव व्हड जायत आसता. फुडें सरतना ताका जो अणभव येता तातूंतल्यान ताका आपली सुवात निर्माण करप शक्य जाता. पानवेलकर कला सांस्कृतीक संस्थेकडेन पालक संस्था म्हणून पळोवची अशें तांणी म्हणलें.
समील वळवयकार हांणी निसुवार्थीपणान वावुरपी पानवेलकर मंडळा सारक्यो खूब उण्यो संस्था आसात. संस्कृताय हो आमच्या जिविताचो एक भाग आनी ती तिगोवन दवरपाक ही संस्था कटिबद्ध आसा. नवी पिळगी संस्कृताये पसून पयस वयची न्हय देखून ही संस्था बरीच मेहनत घेता अशें तांणी सांगलें.
लक्ष्मण रायकर हांणी जल्माक येवन समाजांत आपली सुवात निर्माण करप म्हत्वाचें असो उलो मारलो.
ह्या वेळार निशा रायकार आनी निळकंठ भोमकार हांणी आपले विचार मांडले.
भोवमान केल्ल्या मानेस्तां वतीन नितीन कोरगांवकार हांणी मनोगत उक्तायलें.
संदीप स. नायक हांणी येवकार दिलो. सचीव संदीप गणपत नायक हांणी अहवाल वाचन केलें. सुदन फडते हांणी सुत्रसंचालन केलें आनी सुदेश कमलाकांत नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
