भांगरभूंय | प्रतिनिधी
ते दीस गेले जेन्ना केंद्रीय अदमासपत्रक फेब्रुवारी अखेर मांडटाले, शेनवाराक सुटी आसताली. हवामान, समाजीक, अर्थकारणांतल्या बदलांचेर भासाभास करून केंद्रीय अर्थसंकल्पाची तारीख बदलल्या. शेनवार, आयताराक अर्थकारण धांवता. गिरायक आठ दीस बाजारांत वचचे परस एकच दीस बाजारांनी वता, ऑनलायन शॉपिंग वाडटा. पर्यटनाक वर्साक एक, दोन दिसांनी ओतो येना सप्तकी पर्यटनाक म्हत्व येवंक लागलां. वर्सुकें प्लॅनिंग जितलें म्हत्वाचें तितलेंच अचकित जावपी बदलां प्रमाण कुरपणे घालपाक सरकार, नागरिकांक शिकचें पडटलें.
धा पुरस्कार, वीस मनरिजवणेच्यो कार्यावळी, फेस्तार फेस्तां हें गोंयचें चित्र. एक- एक कोटी रुपया केंद्र सरकार दितना फेस्तांचेर, येवजणींचेर कसो, कितलो खर्च जावचो हीं मार्गदर्शक तत्वां आसतात. एक कोटी घेवपाक राज्य सरकारान पन्नास लाख रुपयांची तजवीज दाखोवची पडटा. मार्गदर्शक तत्वांत बदल करपाक केंद्राची मान्यताय आसता पूण ती समजता कोणाक ? अणभव आशिल्ल्यांक, अर्थशास्त्रांचे शिक्षण घेतिल्ल्यांक. टॅक्स रचणुकेंत सदळसाण हाडिल्ल्यान केंद्र सरकाराचे तिजोरेक लाव जाता हें चार म्हयन्यांनी नियाळ घेतिल्ल्यान कळटा. नियाळ फकत येणावळीचो नासता, खर्चाचो, गिरायकाचे नदरेचो, बाजाराचो आसता. गिरायकां मदीं चोर आसचे ना व्हय? सगल्यांचे चलप, भोंवप आतां कॅमेरा खाला येता हें चोरांकय कळ्ळां, चोरय शिकिल्ले. पयलीं वरी शिक्षक आयज शिकयतात? अधिकार नासतना? तांकां वावर नासता? समाज, संस्कृताय, तंत्रगिन्यानांत तांकांय घुस्पून घेवचें पडटा.
येणावळ, खर्चाचें अदमासपत्रक मांडटना साबार चुको जातात. नियाळांतल्यान सुदारप जाता शीम, मर्याद दवरुन. ब्रेन डॅडांक वर्सांची वर्सां घर हॉस्पिटल करून दवरतात. कोणाक शक्य आसता तें? गिरेस्त, अती गिरेस्तांक. अर्थकारणाचो लाव समाजा मेरेन पावोवपी यंत्रणेंत तंत्रगिन्यान आयलां. मनीसबळाचो वावर उणो जाला? सरकारातलें, खासगी मनीसबळ न्हिदो काडूंक आयज शकना. तांच्या माथ्यार नासले तरी कचेरेंत कॅमेरा आसतात. मोबायला वयल्यान येवपी, वचपी मेसेजीचेर त्या कॅमेरांची नदर आसची ना अशें न्हय. तातूंतल्यान वाट दाखोवपी मोबायलाची वेगळी भास तयार जाता. ल्हान जेन्ना म्हान जातात तेन्ना ते गिन्यानी, प्रशिक्षण घेतिल्ले, अणभवी आसचे हाची जतनाय सरकार घेवपाक लागलां. सवकासायेन गोंय ते वाटेन वता, ताचो लाव जातलो, लुकसाण उणे जातलें. वाटोय बदलच्यो पडटात, घरांपरस फ्लॅट बदलप बेगीन जाता. पडिंग शेतांवरीं उपेगांत नाशिल्लीं घरां आसतलीं, तीं कोण मेजतलो? शेणिल्ल्यांक कोण सोदतलो? ते पासत अखंडताय, थिरावप गरजेचें. नाल्ल म्हारग जातात, देवळांनी नाल्ल फोडून ते कावळ्यांक भिरकावन उडोवपी नासतले? तांकां सरकारान 11 रुपया, एक हजार रुपया गरजेवंत, विद्यार्थ्यांक दिवचे. विद्यार्थ्यांच्या घराब्याचो, घरांतल्या अर्थकारणाचो सोद, बोध घेवन. गोंयांवरी ल्हान राज्यांत आत्मनिर्भरता येवंक शकता थीर सरकारा पासत. केंद्र आनी राज्य सरकार थीर, एकाच पक्षाचें, आघाडेचें आसता तेन्ना उदरगतीचो मार्ग सोंपो जाता. उदरगत तिगपी आसल्यार देखरेख, सुदारपापासत अदमासपत्रकांत तजवीज केल्लो पयसो उरता.
फाटल्या धा बारा वर्सांआदीं केल्ले येवजणेचो नियाळ बेगींतल्या बेगीन कित्याक जायना? अचूक नियाळच धांपून दवल्ला? बदल्यो, प्रमोशना ज्या वगतार जावंक जाय
तीं न जाल्ल्यान, नेमावळ मोडून सेवावाड दिल्ल्यान अधिकारी निर्शेल्यात? कांय खातींच रीतीं पडल्यांत? नव्या खात्यांनी फावो तें मनीसबळ ना? ह्या प्रस्नांच्यो जापो मेळयल्यार अदमासपत्रकांत तजवीज केल्ल्या पयशाचो विलो कित्याक जावं ना त्या प्रस्नांची जाप मेळटली.
तिसऱ्या जिल्ल्या विशीं कितले वेळा घोशणा करप? अदमासपत्रक, नवे येवजणेचेर मुख्यमंत्र्यांनी दिल्ल्या लेखी आदेशार प्रस्न उबो करपी आय ए एस, नागरी सेवेंतले सुरेश शानभाग हांचेवरी अधिकारी रिटायर जाल्यात. कांय वरिश्ठ कदेलां आडावन बसले, वर्साचे स म्हयने भोंवलेच ना जाल्यारय पयसो खर्च कसो जातलो? कांय वरिश्ट नव्यांचेर निंबून रावन भोंवत रावल्यारय अदमासपत्रकाचो ताळमेळ बसोवप कठीण जाता. सेवावाढीचेर आशिल्ले अधिकारी आदलेवरी वावर करचे ना. अपेक्षा 100 टक्क्यांची आसल्यार 25 टक्के मेळचे ना. येवजणींपासत पयशांची तजवीज करतना पयशांची पुरवणय जावची. मोख थारावन दिवप, तीन म्हयन्यांनी नियाळ करप गरजेचें. जीएसटी, इनकम टॅक्स येणावळ वाडल्या देशाची, गोंयचो वांटोय. मुख्यमंत्री जीएसटी समितीर गेल्ल्यान? खर्च उणो करपाच्यो सुचोवण्यो मुख्यमंत्र्यांनी, मंत्र्यांनी केल्ल्यो ते पाळपी अधिकारी आशिल्ल्यान खर्च कमी जाला.
धा वर्सांआदीं केल्ल्यो साधनसुविधांची मोख पुराय करपाक अधिकारी वावुरल्यात. येवजणींचो पयसो समाजा मेरेन पावोवपाक उणें पडल्यात व्हय? 2024 वर्स सोंपतना केल्ले बदल 2025 वर्सापासत फळादीक जातले अशी आस्त आसा.
आत्मनिर्भर गोंय, करोडपती दीदी सपन 100 टक्के नासलें तरी 50 टक्के जैतवंत जालां. बटाट, कांदे रोवप गोंयांक शक्य आसा ? नाल्लाची पिकावळ वाडोवप, सुपारेची उणी करप, आंबे, पणस, काजू उत्पादन, निर्गत वाडोवपाचे यत्न करप गरजेचे. खंयच्या मंत्र्यांच्या खात्यांक चड पयशे दिल्ले? त्या खात्याची येणावळ वाडिल्ल्यान तजवीज केल्लो पयसो तसोच पडून आसा सरकारी तिजोरेंत? येरादारी, जिल्लो परिशद, पंचायत, नगरपालिका, कोयर वेवस्थापनाच्या पावंड्यार येवजणी करपाक कुशळ मनीसबळ ना. पणजे समाजकल्याण खातें, उत्तर गोंय जिल्लोधिकारी, भलायकी संचालनालयाचे बिल्डिंगेचर एक नदर मारल्यार बिल्डेंगेची कितें अवस्था जाल्या तें होल्मता. सादूर रावात अशी शिटकावणी दिवपी पत्रकांय बिल्डिंगेर दसयल्यांत. पयसो आसा जाल्यार ह्या बिल्डिंगेचेर ताकतीकेन खर्च करपाचे मर्यादेभायर बिल्डिंगेची अवस्था आसा? मनीसबळ आसूनय कामकाजच करुंक शकचे ना अशी अवस्थाय जाल्या हें सत.
पर्यटनाक शिस्त हाडटना खातें, म्हामंडळ एकठांय हाडपाची गरज आसा. पर्यटन खात्याची पाटो प्लाझार बिल्डिंग उबारपाची कश्ट घेतिल्ले आय ए एस अधिकारी स्वप्नील नायक परतून खात्यांत येत व्हय? स्मार्ट सिटी तांचे कडेन दिवची. नवे आय ए एस अधिकारी खात्या भायर सरना, सेवावाढीचेर आशिल्ल्यांची गोंय स्वयंपूर्ण जाल्लें पळोवपाची इत्साशक्त सोंपली? मंत्र्यां कडेन उलयल्यार जापो मेळटल्यो मुख्यमंत्र्यांक, नव्या मुखेल सचिवांक, अधिकाऱ्यांक. अर्थकारणांतल्या लाव, लुकसाणाची म्हायती मेळटली.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
