भांगरभूंय | प्रतिनिधी
लियॉनॅल मॅसीचें ड्रिबलींग आनी अल्वारेझाचें फिनिशींग हाच्या नेटार अर्जेंटिनान संवसारीक फुटबॉल सर्तीचे फायनलींत सुवात मेळयली. ताणें क्रोएशियाक 3-0 अशा गोल फरकांनी हारयलो.
निवृत्ती पयलीं आपलें सपन पुर्ण करपा नेटान खेळपी मॅसी सेमी फायनलींत फुटबॉल मोग्यांक मैदानांत दिसलो. ह्या जैता सयत अर्जेंटिनान आठ वर्सांनी फायनलींतली सुवात निश्चीत केली. तशेंच संवसारीक फुटबॉल सर्तीच्या इतिहासांत अर्जेंटिना सवे खेपे फायलनींत खेळटलो.
आक्रमण हेंच धोरण मतींत दवरून अर्जेंटिना सेमी फायनली खातीर मैदानांत देंवलो. मॅसीन ड्रिबलींग वरवीं क्रोएशियाच्या गोलपोस्टा वटेन वचपाक सुरवात केली. हें चेपण क्रोएशियाक सहन जायनाशिल्लें आनी हातूंतल्यानूच गोलकीपर लिव्हाकोविचान गोलपोस्टाचे दिकेन बॉल घेवन वचपी अर्जेंटिनाच्या अल्वारेझाक पॅनल्टी अॅरियांत चुकीचे पद्धतीन आडायलो. रॅफ्रीन रोखडीच पॅनल्टी दिली. ही संद मॅसीन सादली आनी 33व्या मिनटाक अर्जेंटिनान 1-0 अशी आघाडी घेतली. संवसारीक सर्तींतलो मॅसीचो हो वट्ट 11व गोल थारलो. ताचे पयलीं दिएगो माराडोना आनी गाब्रिएल बातिस्तुता हांणी अर्जेंटिना वतीन दरेकी 10 गोल केल्ले. तांचो हो राष्ट्रीय विक्रम मॅसीन मोडलो.
1-0 अशी आघाडी घेतल्या उपरांत लेगीत अर्जेंटिनान आपल्या धोरणांत कसलोच बदल करिनासतना आक्रमण चालूच दवरलें. अल्वारेझ, मेलिना हांणी मॅसीच्या फुडारपणाखाला क्रोएशिया चेपणाखाला कसो उरतलो हाचें योग्य नियोजन केलें. ताचो पयल्या अर्दांत फायदो जालो आनी अर्जेंटिनान 2-0 अशी आघाडी मेळयली. मॉड्रिचान तयार केल्लें आक्रमण दावे वटेच्यान अर्जेंटिनाच्या गोलपोस्टाचे दिकेन वतालें. त्या वेळार क्रॉस पास अर्जेंटिनाच्या डिफॅण्डरांनी आडायलें आनी बॉल अल्वारेजा कडेन दिलो. ताणें मदले लायनी सावन गोल पोस्टाचे दिकेन सुसाट धांव घेतली. ताच्या ह्या प्रती आक्रमणाक निमाण्या खिणाक नशिबाची साथ मेळ्ळी. ताचे कडेन दोन डिफ्लेक्शन आयलीं. तातूंत ताणें क्रोएशियाचो गोलकीपर लिव्हाकोविचाक सहज चकयत 39व्या मिनटाक गोल केलो आनी निर्णायक आघाडी घेतली.
दुसऱ्या अर्दांत मॅसीची प्रतिभा कामांक आयली. ताणें उजवे वटेच्यान बॉल उत्कृश्ट रितीन ड्रिबलींग करीत गोलपोस्टाचे दिकेन व्हेलो. क्रोएशियाच्या डिफॅण्डरांनी ताका आडावपाचो खूब यत्न केलो. पूण, मॅसी थांबपाच्या मुडांत नाशिल्लो.
उजवे वटेच्यान ल्हान डी मेरेन आयल्या उपरांत ताणें एका डिफॅण्डराच्या दोनूय पांयां मदल्यान अल्वारेझाक पास दिलो. ताणें 69व्या मिनटाक गोल करून अर्जेंटिनाची आघाडी 3-0 अशी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
