अर्जेंटिना काय फ्रान्स?

भांगरभूंय | प्रतिनिधी

22वे संवसारीक फुटबॉल सर्तीची फायनल अर्जेंटिना आनी सध्याचो वस्ताद फ्रान्स ह्या पंगडां मदीं लुसैल स्टेडियमाचेर जातली. आतां मेरेन दोनूय पंगड दरेकी दोन खेपे वस्तादपण जोडलां. ताका लागून हे खेपे करंड जिखपी पंगडाचो हो तिसरो किताब थारतलो. तशेंच अर्जेंटिनाचो मुखेली लियॉनॅल मॅसीची ही निमाणी संवसारीक सर्त आसा.

दोनूय पंगड आतां मेरेन 12 खेपे एकामेका आड खेळ्ळ्यात. तातूंतल्यो स मॅची अर्जेंटिनान जाल्यार तीन हारल्यात. तीन मॅची बादाबाद उरल्यात. ह्या पंगडां मदली निमाणी मॅच 2018त रशियेंत जाल्ले संवसारीक फुटबॉल सर्तींत जाल्ली. त्या वेळार प्री-क्वॉर्टरफायनलींत फ्रान्सान 4-3 फरकान जैत जोडिल्लें.

दोनूय पंगडां मदीं पयली अधिकृत मॅच 15 जुलय 1930त संवसारीक सर्तींत जाल्ली. त्या वेळार अर्जेंटिनाक एका गोलान जैत फावो जाल्लें. जाल्यार 1971त जाल्ले आंतरराष्ट्रीय इश्टागतीचे मॅचींत फ्रान्सान पयले खेपे अर्जेंटिनाक हारयिल्लो. ती मॅच फ्रान्सान 4-3 फरकान जिखिल्ली.

संवसारीक फुटबॉल सर्तींत सगल्या खंडांतले पंगड वांटो घेतात. पूण, किताब जिखपाचो वेळ येता तेन्ना हें प्रकरण युरोप आनी लॅटीन अमेरिका मेरेन मर्यादीत उरता.

आतां मेरेन 21 संवसारीक सर्ती जाल्यात. 12 खेपे युरोपान किताब जिखला, जाल्यार णव खेपे लॅटीन अमेरिकेच्या देशांनी येस मेळयलां. फाटले पांच किताब युरोपान आपल्या नांवार केल्यात. हे खेपे लियॉनॅल मॅसीचो अर्जेंटिना पंगड फ्रान्साक हारोवन युरोपाचो शेक सोंपोवपाक सज्ज आसा.

युरोपाच्या पांच पंगडांनी मेळून 12 किताब जिखल्यात, जर्मनी आनी इटली ह्या देशांनी सगल्यांत चड दरेकी चार किताब आपल्या नांवार केल्यात. फ्रान्साच्या नांवार दोन, जाल्यार इंग्लंड आनी स्पेन हांणी दरेकी एकदा ह्या करंडाचेर आपलें नांव कोंतरायलां.

लॅटीन अमेरिका वतीन फक्त तीन देशांनी मेळून णव किताब जिखल्यात. ब्राझिलान सगल्यांत चड पांच खेपे वस्तादपण जोडलां. अर्जेंटिना आनी उरुग्वे ह्या देशांनी दरेकी दोन खेपे येस मेळयलां.

लॅटीन अमेरिकेच्या देशान निमाणे खेपे 2002त वस्तादपण जोडिल्लें. त्या वेळार ब्राझिलान फायनलींत जर्मनी पंगडाक 2-0 असो हारयिल्लो. ते उपरांत सेगीत युरोपाच्या पंगडान वस्तादपण जोडलां. 2006त इटलीन, 2010त स्पेनान, 2014त जर्मनीन आनी 2018त फ्रान्सान किताब जिखला.

फाटले संवसारीक सर्ती प्रमाण हे खेपे लेगीत फ्रान्सान फायनलींत सुवात मेळयली. 2018तले फायनलींत ताणें क्रोएशियाक हारयिल्लो. हे खेपे ताची लडत अर्जेंटिना आड जातली. संवसारीक सर्ती पयलीं फ्रान्साचे दिग्गज खेळगडे बेंजेमा, पोग्बा, कांटे आनी अॅंकुकू हे जखमी जाले. तरी आसतना पंगडाचो वेवस्थापक दिदीएर डिस्चेम्पसान एक संतुलीत पंगड तयार केलो आनी ताणें सेगीत दुसरे खेपे आपल्या पंगडाक फायनलींत व्हेलो.

36 वर्सां पिरायेचो स्ट्रायकर ओलिव्हर जीरुडान जबरदस्त प्रदर्शन केलां. ताणें चार गोल केल्यात. स्ट्रायकर किलियन एम्बाप्पे गोल्डन बुटाचे रेसींत आसा. ताणें आतां मेरेन पांच गोल केल्यात.

फ्रान्साचो डिफॅन्स मात्सो दुबळो आसा. सेमी फायनलींत मोरोक्को आड ताका पयले खेपे क्लीन शीट दवरली.

दुसरे वटेन अर्जेंटिनान 2014त निमाणे खेपे संवसारीक सर्तीचे फायनलींत पाविल्लो. त्या वेळार ताका जर्मनी आड 1-0 फरकान हार घेवची पडिल्ली. मॅसी खातीर ही दुसरी फायनल आसा. अंदूंचे संवसारीक सर्तींत अर्जेंटिनाक आपले पयले मॅचींत सावदी अरेबिया सारक्या दुबळ्या पंगडा आड हार घेवची पडिल्ली. पूण, उपरांत ताणें आपल्या प्रदर्शनांत सातत्यान सुदारणां केली. सेमी फायनलींत ताणें क्रोएशियाक 3-0 अशा व्हडा फरकान हारयलो.