भांगरभूंय | प्रतिनिधी
खबरां संस्था
मुंबयः अर्जुन तेंडुलकराच्या पयलेच मॅचींत मुंबय इंडियन्सान कोलकाता नायट रायर्डसाचेर (केकेआर) 5 विकेटींनी दणदणीत जैत मेळयलें. हे पयलीचे मॅचींत ताणी 6 विकेटींनी जैत मेळयल्लें, मात तो निमाणे ओव्हरींत. हे मॅचींत मात मुंबय इंडियन्सान देमदार जैत मेळयलें. व्यंकटेश अय्यराच्या शेकड्याच्या नाड्यार केकेआरान आपल्या डावांत 185 धांवड्यो केल्ल्यो. ह्या आव्हानाचो फाटलाव करतना मुंबयच्या बॅट्समनांनी बरी फटकेबाजी केली आनी ताणी ह्या हंगामांतल्या आपल्या दुसऱ्या जैताचो नोंद केली.
केकेआरच्या 186 धांवड्यांचो फाटलाव करपाक मुंबयन आपल्या डावाक सुरवात केली आनी सगल्यांक धपको बसलो. कारण मुंबयच्या पंगडान दुखापत जाल्ल्या रोहीत शर्माक चक्क इम्पॅक्ट प्लेअर धाडल्लें. रोहीत आनी इशान किशनात डावाक बरी सुरवात करून दिली. मात रोहिताक ह्या वेळार व्हडली खेळी करपाक मेळी ना. 13 बॉलांत तो फकत 20 धांवड्यो करपाक शकलो. तो आवट जालो तरी इशानान नेटान फटकेबाजी केली. ताणे फकत 25 बॉलांत पांच चौके आनी पांच सक्यांनी 58 धांवड्यो केल्यो. मात एक व्हड शॉट मारपाच्या यत्नांत आसतना वरूण चक्रवर्तीन ताका क्लिन बोल्ड केलो. मुंबयक व्हो धपको आशिल्लो मात रोहीत शर्माचे सुवातेर पंगडाचें फुडारपण करपी सूर्यकुमार यादवान सगली जापसालदारकी आपल्या भुजार घेतली. सूर्यकुमाराक हे मॅचींत सूर मेळ्ळो आनी मुंबयच्या जैताची वाट ताणे मेकळी केली. मात ताणे जाता तितल्या बेगीन धांवड्यो करपाचें थारायल्ल्यान तो आवट जालो. सूर्यकुमार मुंबयच्या जैताचे म्होर लायतलो अशें दिसताले तेन्ना शार्दुल ठाकूरान ताका कॅच आवट केलें. ताणे 25 बॉलांत चार चौके आनी ती सक्यांनी 43 धांवड्यो केल्यो. तिलक वर्मान 30 धांवड्यांची खेळी केली. टीम डेव्हीड आनी कॅमेरून ग्रीनान मुंबयच्या जैताची म्होर लायली.
कोलकाता नायट रायर्डसान पयलीं खेळून 20 ओव्हरींत 6 आवट 185 धांवड्यो केल्यो. मुंबयच्या बॉलरांक व्यंकटेश अय्यर सोडल्यार तांचे हेर बॅट्समन तिगपाक शकले नात. 9 सके आनी 6 चौक्यांनी अय्यरान फकत 51 बॉलांत 104 धांवड्यो केल्ल्यान केकेआराक मुंबयक जैता खातीर 186 धांवड्यांचें आव्हान दिवपाक शक्य जालें. केकेआराचो ओपनर एन जगदिशनाक ग्रीनान शून्याचेर आवट केल्या उपरांत 57 धांवड्याचेर दुसरो ओपनर गुरबाज (8) आवट जालो. व्यंकटेश अय्यरान एक हाती खेळून पंगडाच्यो 159 धांवड्यो बोर्डार लावंन अय्यर आवट जालो. फाटले मॅचींत निमाण्या पांच बॉलांत पांच सके मारपी रिंकू सिंग हे खेपे 18 बॉलांत फकत 18 धांवड्यो करपाक शकलो. रसेलाचो (नाबाद 21) आडवाद सोडल्यार केकेआरचे हेर बॅट्समन सवाय भितर आवट जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
