भांगरभूंय | प्रतिनिधी
जोयडा: उत्तर कन्नड जिल्ह्यांतल्या यल्लापूर – कारवार मार्गावेल्या अरेबैल घांटार बुधवारा सकाळीं लॉरी आनी प्रवासी लक्झरी बसीचो अपघात जालो. दोनूय वाहनां देंगणांत कोसळपा पसून वाटवलीं.
ह्या अपघाता विशीं मेळिल्ले म्हायती प्रमाण, प्रवाशांक कर्नाटकांतल्यान गोंयांत येवन वचपी जीए ०८ वाय ९४४७ हे बसीचो धपको त्याच मार्गावेल्यान कर्नाटकाक वचपी केए २७ सी ०२६३ ह्या माल व्हरपी लॉरीक बसलो. ह्या वेळार बसींत २५ परस चड प्रवासी प्रवास करताले. बसीचो अपघात जाले उपरांत बस उमथली. जाल्यार लॉरी देंगणा वटन उमथी जाली. मात हीं दोनूय वाहनां देंगणांत पडचे पसून वाटवलीं. हाका लागून व्हड घडणूक जावपा पसून वाटवली.
बसींत आशिल्ल्या प्रवाशां मदीं कोणाकूच गंभीर दुखापत जावंक ना. हे घडणुकेची म्हायती मेळटांच यल्लापूर पुलीस घडणुके सुवातेर दाखल जाले. सध्या रस्तो येरादारी खातीर उक्तो करपाचें काम सुरू आसा.
पावसांत अरेबैल घांट धोक्याचो
अरेबैल घांट हो अपघात जावपी वाठार. हांगा अपघात जातूच आसतात. तशेंच पावसांत पालसणांय कोसळटात. हाका लागून पावसांत हो घांट चडूच धोको निर्माण करता, अशें थळावे म्हणटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
