अरामको रिफायनरीचेर हल्लो

भांगरभूंय | प्रतिनिधी

कच्च्या तेलाच्या मोलांत 9.32 टक्क्यांनी वाड

सार तनुरा तेल शुद्धीकरण कारखानो बंद

कुवेंतांत पडलीं खूबशीं अमेरिकन झुजां विमानां

खबरां संस्था

नवी दिल्ली : इराणान सावदी अरेबियांतली सगल्यांत व्हड तेल कंपनी अरामको रिफायनरीचेर हल्लो केलो. ड्रोन हल्ल्या उपरांत सावदी अरेबियाची सरकारी मालकीची तेल कंपनी अरामकोन सोमारा तांचो सार तनुरा तेल शुद्धीकरण कारखानो बंद केला, अशें सावदीच्या सरकारी टेलिव्हिजनान खबर दिल्या. हाका लागून कच्च्या तेलाचें मोल 9.32 टक्क्यांनी वाडलां.

उज्यांत कसलीच जिवीतहानी जावंक ना आनी खबरदारीचो उपाय म्हूण हो निर्णय घेतला, अशें खबरेंत म्हणलां. हे रिफायनरीची तांक दिसपट्टी 5 लाख बॅरलां परस चड कच्च्या तेलाची आसा.

मजगतीं, कुवेत संरक्षण मंत्रालयान दावो केला, तांच्या देशांत खूबशीं अमेरिकन झुजां विमानां पडलीं, पूण सगले पायलट सुरक्षीत भायर सरले. मंत्रालयान अपघातांच्या कारणां विशीं कसलीच म्हायती दिवंक ना.

कुवेतच्या संरक्षण मंत्रालयान म्हणलां, पायलटांक तपासणे खातीर हॉस्पिटलांत दाखल केल्यात आनी तांची भलायकी स्थीर आसा. अमेरिकन सेंट्रल कमांडान तत्काळ कसलीच प्रतिक्रिया दिवंक नाशिल्ली.

सावदी अरामको ही संवसारांतली सगल्यांत व्हड तेल आनी वायू कंपनीं मदली एक आसा. ती सावदी अरेबिया सरकाराचे मालकीची आसा. अमेरिकन कंपनीं वांगडाच्या करारा प्रमाण 1933 त ताची स्थापनी जाली. 1980 त ती सावदी सरकाराच्या पुराय नियंत्रणा खाला आयली. कंपनीचें मुख्यालय दहरानांत आसा. अरामको कडेन संवसारांतल्या सगल्यांत व्हड तेल सांठ्यां मदलें एक आसा. संवसारीक उर्जा बाजारपेठेक एक मुखेल पुरवणदार आसा.

सावदी अरेबियाची अर्थवेवस्था हे कंपनीच्या उत्पन्नाचेर व्हड प्रमाणांत अवलंबून आसा. आरामको फक्त कच्च्या तेलाचें उत्पादन करिना जाल्यार शुद्धीकरण, पेट्रोकेमिकल्स आनी सैमीक वायूंत लेगीत सक्रीय आसा. 2019 त कंपनीन शॅर बाजारांत आपलो आयपीओ लॉन्च केलो, जो इतिहासांतलो सगल्यांत व्हड आयपीओ मानतात. हालींच्या वर्सांत, आरामको अक्षय उर्जा, हायड्रोजन आनी कार्बन कॅप्चर सारक्या तंत्रज्ञानांत गुंतवणूक वाडयता.

मजगतीं, न्यू टॉर्क टायम्साचे खबरे प्रमाण, इराणान मध्य पूर्वेंतल्या उण्यांत उण्या स अमेरिकन लश्करी तळांक लक्ष्य केले. ह्या हल्ल्यांत क्षेपणास्त्रां आनी ड्रोनचो वापर केलो.

अयातुल्ला अली खामेनेईचे घरकान्नीक मरण

इराणचे सर्वोच्च फुडारी अयातुल्ला अली खामेनेई हांच्या मरणा उपरांत दोन दिसांनी तांची घरकान्न मन्सूरेह खोरस्तेह बागेरजादेह हांकांय मरण आयलें. दोन दिसां आदीं अमेरिका- इझ्रायल हल्ल्यांत मन्सूरेह जखमी जाल्ली. त्याच हल्ल्यांत खामेनेई हांकां मरण आयिल्लें. इराणी राज्य माध्यमांनी मन्सूरेह हांकां उपचार चालू आसतना मरण आयिल्ले खबरेची पुश्टी केल्या.