भांगरभूंय | प्रतिनिधी
विजय सरदेसाय : कोल्ड स्टोरेज नाशिल्ल्यान नुस्तें म्हारग
भांगरभूंय । प्रतिनिधी
पणजी : नुस्तें म्हारग जाल्ल्यान गोंयचें शीत, कडी आनी नुस्तें जेवप म्हणल्यार गिरेस्तां खातीर लेगीत म्हारग जालां. फाटल्या 8 वर्सांत बांगडे, तारले, इसवण, पापलेट, सुंगटां हें नुस्तें 25 टक्के म्हारग जाल्ल्यान सर्वसामान्यांक ह्या नुस्त्याचें मोल परवडना, अशें फातोड्डेंचे आमदार विजय सरदेसाय हांणी सांगलें.
फुडाराक अरबी दर्यांत नुस्तें दिसप म्हणल्यार व्ही.आयपी दिसपा सारकें जातलें. नुस्त्याचें हें मोल कोल्ड स्टोरेज सारकिल्लीं यंत्रणां नाशिल्ल्यान वाडपाक लागल्या. नुस्त्याची म्हारगाय नियंत्रणांत हाडपाक सरकार कसलीं पावलां उबारता, असो प्रस्न सरदेसाय हांणी नुस्तेमारी मंत्री निळकंठ हळर्णकार हांकां केलो.
नुस्त्याची सांठवणूक करपाक कोल्ड स्टोरेज सामकी गरजेची, तशेंच खोल दर्यांत नुस्तेमारी करपा खातीर 23मिटर लांबायेच्या बोटीं परस 30-35 मिटर लांबायेची नुस्तेमारी बोट आसप गरजेचें. तशेंच नुस्तेमारी खात्यान मरीन इंजिनियर, तशेंच हेर उच्च शिक्षिताचे मजतीन गोंयचें नुस्तेमारी खातें अत्याधुनीक करप गरजेचें आसा अशी सुचोवणी विजय सरदेसाय हांणी केल्या.
हे विशीं जाप दितना नुस्तेमारी मंत्री निळकंठ हर्णकार हांणी सांगलें, मडगांव एसजीपीडए मार्केटांत नुस्तेमारी खात्यान कोल्ड स्टोरेज घातल्या. मात एसजीपीएन ही कॉल्ड स्टोरेज चालू करपाक परवानगी दिवंक ना.
तशेंच मालीम आनी कुटबण जेटीचेर कोल्ड स्टोरेज कार्यरत जाल्या. प्रधानमंत्री मत्स्य संपदा येवजणे खाला कोल्ड स्टोरेज घालपा खातीर सरकार 40 टक्के अनुदान दिता. जाल्यार एसटी लाभार्थ्यांक हे खातीर 50 टक्के अनुदान मेळटा. जाल्यार खोल दर्यांत वचून नुस्तेमारी करपा खातीर 21 जाणांक परवानगी दिल्या अशी म्हायती हळर्णकार हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
