भांगरभूंय | प्रतिनिधी
न्युझिलॅण्ड पंगडा आड फुडारांत जावपी वन डे माळे खातीर भारताच्या पंगडाची घोशणा केली. निवड समितीन श्रेयश अय्यराचो पंगडांत आस्पाव केला. जाल्यार दक्षीण आफ्रिका पंगडा आडचे वन डे माळे वेळार जखमी जाल्ल्यान पंगडांतल्यान भायर आशिल्लो शुभमन गिल पंगडाचें फुडारपण करतलो. अय्यराक उप मुखेली केली. गिलाक अन्नांतल्यान वीखबादा जाल्ल्यान विजय हजारे ट्रॉफींतली मॅच चुकिल्ली. अय्यर आनी गिल हांचे खेरीत मोहम्मद सिराजाक लेगीत पंगडांत सुवात दिल्या. ताणें आपली निमाणी वन डे मॅच ऑस्ट्रेलियेचे भोंवडेर खेळिल्लो.
दक्षीण आफ्रिका पंगडा आडचे वन डे माळे खातीर पंगडांत आशिल्ल्या तिलक वर्मा, ऋतुराज गायकवाड आनी ध्रुव जुरेल हांकां भायर बसयल्यात. अय्यर माळेंत खेळपाक शकतलो काय ना हे बीसीसीआयच्या सेंटर ऑफ एक्सिलेन्सान परवान दिल्या उपरांत निश्चीत जातलें.
अय्यर ऑस्ट्रेलियेचे भोंवडेर जखमी जाल्लो. तेन्ना सावन तो पंगडांतल्यान भायर आसा. अय्यराक सेंटर ऑफ एक्सिलेन्स कडल्यान सशर्त विजय हजारे ट्रॉफीचे फुडले फेरयेंत खेळपाची परवानगी मेळ्ळ्या आनी तो 6 जानेवारीक मुंबय वतीन खेळटना लेगीत दिसपाक शकता.
हार्दिक पांड्याक फुडल्या म्हयन्यांत जावपी संवसारीक टी-20 सर्ती पयलीं विसव दिवपाचे दिश्टीन बीसीसीआयन ताका विसव दिवपाचो निर्णय घेतला.
सेंटर ऑफ एक्सिलेन्सान हार्दिकाक एके मॅचींत 10 ओव्हरी घालपाची परवानगी दिवंक ना. ताका लागून फुडल्या म्हयन्यांत जावपी संवसारीक टी-20 सर्त मतींत दवरून ताची निवड करूंक ना अशें बीसीसीआयन स्पश्ट केलें.
रोहित शर्मा, यशस्वी जयस्वाल आनी विराट कोहली हांचो पंगडांत आस्पाव केला. दक्षीण आफ्रिका पंगडा आडचे माळेंत मुखेलपद सांबाळपी लोकेश राहुल आनी ऋषभ पंत हांचो विकेटकीपर म्हणून पंगडांत आस्पाव केला. जाल्यार अश्टतासांचे खेळगडे म्हणून वॉशिंग्टन सुंदर, नितीश कुमार रेड्डी आनी रवींद्र जडेजा हांची निवड केल्या. वॉशिंग्टन सुंदर आनी जडेजा हांचे खेरीत कुलदीप यादव स्पिन विभाग सांबाळटलो. जाल्यार फास्ट बॉलरांच्या विभागांत सिराजा वांगडा प्रसिद्ध कृष्णा, अर्शदीप सिंग आनी हर्षित राणा हांचो आस्पाव केला.
माळेंतली पयली मॅच 11 जानेवारीक वडोदरांत जातली. ते उपरांत 14 फेब्रुवारीक राजकोटांत दुसरी मॅच आनी तिसरी मॅच 18 जानेवारीक इंदौरांत जातली.
वन डे उपरांत पांच मॅचींची टी-20 माळ जातली. पयली मॅच 21 जानेवारीक नागपूरांत जातली. टी-20 माळे खातीर पंगडाची घोशणा पयलींच जाल्या. होच पंगड संवसारीक टी-20 सर्तींत खेळटलो.
वन डे पंगडः शुभमन गिल (मुखेली), रोहित शर्मा, विराट कोहली, लोकेश राहुल (विकेटकीपर), श्रेयस अय्यर (उप मुखेली), वॉशिंग्टन सुंदर, रवींद्र जडेजा, मोहम्मद सिराज, हर्षित राणा, प्रसिद्ध कृष्णा, कुलदीप यादव, ऋषभ पंत (विकेटकीपर), नितीश कुमार रेड्डी, अर्शदीप सिंह आनी यशस्वी जयस्वाल.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
