भांगरभूंय | प्रतिनिधी
अयोध्या, खबरां संस्था: राम मंदीर वाठारांत नितळसाण कामगार म्हणून काम करपी एके दलीत तरणाटेचेर सामुहीक बलात्कार जाल्ल्याची घडणूक घडल्या. पुलिसांनी हे विशीं णव जाणांचेर गुन्यांव दाखल केला. आतां मेरेन पांच जाणांक अटक केल्या. पिडेस्त तरणाटेन कँट पुलीस स्टेशनांतल्या पुलिसांचेरूय कांय गंभीर आरोप केल्यात.
पुलिसांनी दिल्ले म्हायती प्रमाण, २ सप्टेंबराक पिडेस्तान कागाळ नोंद केली. ती तिच्या इश्टां कडेन अदीं मदीं गेल्ली. तेन्ना तिच्या इश्टांनी आनी त्या वेळार थंय हजर आशिल्ल्या इश्टांच्या इश्टांनी तिचेर सामुहीक बलात्कार केलो. आतां मेरेन आमी पांच जाणांक़ अटक केल्या. हेरांचो सोद आमी घेतात.
एका तरणाट्या कडेन आपले प्रेमसंबंद आशिल्ले. ताणें आनी ताच्या इश्टांनी म्हजेर सामुहीक बलात्कार केलो आनी ताचो व्हिडियो तयार केलो. हे विशीं हांवें २ सप्टेंबराक पुलीस स्टेशनाचेर कागाळ नोंद केली. मात पुलिसांनी म्हाका माध्यमां पसून पयस राव. तुज्या कुटुंबियांकूय सांग अशी धमकी दिली, अशें ते पिडेस्त चलयेन सांगलें.
हांव श्रीराम मंदीर वाठारांत नितळसाण करपाचें काम करतां. मात म्हजे वांगडा जी घडणूक घडली ताका लागून म्हजें कामूय गेलें. एका तरणाट्या कडेन वळख जाली. ताचे वांगडा म्हजे प्रेमसंबंद आशिल्ले. उपरांत एक दीस तो इश्टांक घेवन आयलो. तांणी म्हजेर जबरदस्ती करपाचो यत्न केलो. हांव ताका धुकलून पळून वतालें. तेन्ना हांव सकयल पडलें आनी तकलेक मार लागिल्ल्यान बेशुद्ध जालें. हांव बेशुद्ध आसतना म्हजेर सामुहीक बलात्कार जालो. म्हाका जेन्ना शुद्ध आयली तेन्ना थंय वंश चौधरी आनी विनय हे दोगूच आशिल्ले. जांणी म्हाका गॅस्ट हावसांतल्यान गॅरेजींत व्हेलें थंयसरूय बलात्कार जालो. ताचो व्हिडिओ शूट केलो. उपरांत ते म्हाका ब्लॅकमेल करपाक लागले, अशें पिडेस्त चलयेन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
