भांगरभूंय | प्रतिनिधी
अर्थवेवस्थेचेर परिमाण जावपाची भिरांत
नवी दिल्ली, खबरां संस्था : अमेरिकेचे अध्यक्ष डोनाल्ड ट्रम्प हांणी भारत अमेरिकेक निर्गत करता ताचेर 26 टक्के शुल्क लायलां. ताका लागून भारतांत रुपया, शॅर बाजार कोसळ्ळा. उद्देगांचेर संकश्ट येवपाक शकता. फुडारांत भारताचे अर्थवेवस्थेक हाचे त्रास जावं येता. तज्ञांच्या मतान, ह्या शुल्काक लागून जीडीपी १ टक्के देंवपाक शकता.
चीनी म्हालाचेर ३४ टक्के, युरोपीयन संघाचेर २० टक्के, दक्षीण कोरियाचेर २५ टक्के, जपानाचेर २४ टक्के, तर तैवानाचेर ३२ टक्के शुल्क लायलां. व्हिएतनाम, कंबोडिया, लाओसचेर ४६ ते ४९ टक्के शुल्क लायलां. भायले देश अमेरिकेच्या म्हालाचेर हाचे दुपेटीन शुल्क घेता, असो दावो अमेरिकेन केला. आमच्या थळाव्या उत्पादनांक वाव दिवपाक आनी उद्देग मळा वयली तूट भरून काडपाक आमी हो निर्णय घेतला, अशेंय तांणी म्हणलां.
हे शुल्क वाडीक आमचो खर विरोध आसा. आमी आमचे वटेन कितें तो निर्णय रोखडोच घेतले, अशें चीनान जाहीर केलां.
आमची इश्ट आशिल्ले अमेरिकेन तांचे कडेन येवपी भारतीय म्हालाचेर कर लायिल्ल्यान आमच्या गाडयो, वखदां आनी शेतकी उद्देगांक व्हडलो धपको बसतलो, अशें काँग्रेसीचे फुडारी राहुल गांधी हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
