भांगरभूंय | प्रतिनिधी
वॉशिंग्टन, खबरां संस्था: अमेरिकेच्या कॅलिफोर्निया राज्यांतल्या लॉस एंजेलिस शारा लागसारच्या तीन रानांक मंगळारा उजो लागलो. सीएनएनच्या मतान, उजो पयलीं पॅसिफिक पॅलिसेड्स, ईटन आनी हर्स्टच्या रानांक लागलो आनी आतां तो थंयच्या गांवांनीय पातळपाक लागला. पॅसिफीक पॅलिसेड्सांत सकाळीं १० वरांचेर, ईटनांत सांजेवेळार ६ वरांचे आनी हर्स्टांत रातच्या १० वरांचेर उजो लागलो.
पॅसिफिक पॅलिसेड्सचें सगळ्यांत चड लुकसाण जालें. देड दिसांनी उजो तीन हजार एकर वाठारांत पातळ्ळो. उज्याक लागून ३० हजारां परस चड लोकांक घरां सोडचीं पडलीं. अहवाला प्रमाण, पॅसिफिक पॅलिसेड्सांतलो हो उजो एका मिनटांत पाच फुटबॉल मैदानां इतली सुवात लासून गोबोर करता.
लॉस एंजेलिस प्रशासनास पुराय शारांत आणीबाणी जाहीर केल्या. हो अमेरिकेंतली सगळ्यांत चड लोकसंख्या आशिल्लो वाठार. हांगा १ कोटी लोक रावतात. कॅलिफोर्निया प्रशासनान सामान्य लोकांक प्रभावीत वाठारांत वयचें न्हय असो सल्लो दिला. मजगतीं, मावळटे राष्ट्राध्यक्ष जो बायडेन हांणी अर्थीक मजत जाहीर केल्या.
हेलिकॉप्टर आनी विमानांचे मजतीन उज्याचेर नियंत्रण मेळोवपाचे यत्न चालूच आसात. मात वादळ-वार्याक लागून ह्या उज्याचेर नियंत्रण मेळोवप कठीण जालां. वार्याची दिका बदलत आशिल्ल्यान उजो विवीध सुवातांचेर पातळत आसा.
उजो लागिल्ल्या वाठारांत तैनांत केल्ल्या रेस्न्यू जवान हजारांनी लोकांक सुरक्षीत सुवातेर व्हरतात. थळाव्यो शाळा, सामुदायीक केंद्रां आनी हेर सुरक्षीत सुवातो आसरो घर म्हणून तयार केल्यांत.
ह्या उज्याक लागून मालमत्तेचेंच लुकसाण जांवक ना, जाल्यार सैमाचेंय बरेंच व्हड लुकसाण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
