भांगरभूंय | प्रतिनिधी
तिरुपूरचो वस्त्रोद्येग धोक्यांत
चेन्नयः अमेरिकेचे अध्यक्ष डोनाल्ड ट्रम्प हांणी भारतीय निर्यातीचेर घातिल्ल्या अतिरिक्त कराक लागून देशाची विणकामाची राजधानी म्हणून वळखपी तिरुपूरांतलो कापड उद्देग संकश्टांत सांपडला. ह्या कराक लागून २० हजारां मेरेन कारखाने आनी सुमार ३० लाख नोकर्यो धोक्यांत आसात असो हुस्को निर्यातदारांनी उक्तायला.
तिरुपूर एक्स्पोर्टर्स असोसिएशनचे जोड सचीव कुमार दुरैयासामी हांणी, तिरुपूर जिल्ह्यांत २,५०० निर्यातदार आनी २० हजार स्वतंत्र युनिट्स कार्यरत आसा. देशाच्या वट्ट निटवेअर निर्याती मदलो वट्ट ६८ टक्के वांटो हांगच्यान वता.
फाटल्या वर्सा आमची उलाढाल ४४,७४४ कोटी रुपया मेरेन पावली. कोवीड लॉकडावन, अस्तंती देशांनी अर्थीक मंदी आनी रशिया-युक्रेन झूज आसून लेगीत आमी २० टक्क्यांनी वाड साध्य केली. आमचीं उत्पादनां मुखेलपणान अमेरिकेंत (४०%), युरोपांत (४०%), ब्रिटनांत (१०%) आनी हेर देशांनी (१०%) निर्यात करतात. तातूंत अमेरिकन बाजाराचेर सगल्यांत चड अवलंबीत्व आसा, अशें दुरैयासामी हांणी स्पश्ट केलें.
मजगतीं, अमेरिकेच्या खरेदीदारांचेर आदारून आशिल्ले जायते कारखाने व्हड संकश्टांत सांपडल्यात. भितरले कपडे, भुरग्यांचे कपडे आनी रातचे कपडे तयार करपी युनिटांक उण्या फायद्याच्या मार्जिनाक लागून कर वाड सोंसप अशक्य थारता.
खरेदीदारांनी २७ ऑगस्ट मेरेन तयार माल धाडपाचो आदेश दिला आनी कराचो कांय भार उत्पादकांक घेवचो अशी मागणी केल्या. पूण आनीक २५ टक्के कर लादलो जाल्यार तांकां व्हड फटको बसतलो. हाचे उपरांतच्यो ऑर्डरी बंद केल्यात अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
