भांगरभूंय | प्रतिनिधी
सद्या अमेरिका पाकिस्तानाच्या मोगांत पडल्या. पाकिस्तान हो आतंकवाद पातळावपी संवसारांतलो पयल्या क्रमांकाचो देश आसून पाकिस्तान हीच आतंकवाद्यांची फॅक्टरी आसा, हें खबर आसून लेगीत अमेरिका पाकिस्तानाच्या मोगांत पडल्या. अमेरिकेचो राष्ट्राध्यक्ष डोनाल्ड ट्रम्प हो तर पाकिस्तानाच्या मोगांत सामको बुडून गेला. पाकिस्तान म्हजे खातीर खास देश आसा अशें उलोवप हालींच ट्रम्पान केलें. इतलेंच न्हय तर पाकिस्तानाचो लश्कर मुखेली जनरल मुनीर हाका ताणें व्हायट हावसांत खाशेलें आमंत्रण दिवन ताचे सयत जेवण करून ताची सरबराय केली. अमेरिकेच्या इतिहासांत पयलेच फावटी अमेरिकेच्या राष्ट्राध्यक्षान एखाद्या देशाच्या लश्कर मुखेल्याक आपोवन ताचो इतलो मोटो सन्मान केलो. व्हायट हावसांत देशाचे प्रतिनिधी म्हूण देशाचे राष्ट्रपती, प्रधानमंत्री वा मंत्र्यांक आमंत्रीत करतात. पाकिस्तानाचो जनरल जिया-उल-हक, जनरल आयूब खान आनी जनरल परवेज मुशर्रफ हांकां व्हायट हावसाचें निमंत्रण दिल्लें. पूण ते पाकिस्तानाचे लश्कर मुखेली म्हूण न्हय जाल्यार पाकिस्तानाचे राष्ट्रपती म्हूण आशिल्लें.
व्हायट हावसांत जाल्ले हे भेटींत ह्या दोगांय मदीं विवीध विशयांचेर चर्चा जाली. हे चर्चे उपरांत ट्रम्पान भारत पाकिस्तान झूज आपणेंच बंद केल्ल्याचो पुनरुच्चार केलो. पाकिस्तानाचो लश्कर मुखेली जनरल आसीफ मुनीरान भारत पाकिस्तान झूज थांबयिल्ले खातीर ट्रम्पाचे उपकार मानून भारत पाकिस्तान झूज थांबयिल्ले खातीर ट्रम्पाक शांततायेचो नोबॅल पुरस्कार दिवपाची मागणी केली. हें सगले अजापीत करपीच आसा. ज्या पाकिस्तानाक लागून संवसारभर आतंकवाद पातळत आसा त्याच पाकिस्तानाच्या लश्कर मुखेल्याक ट्रम्प आपयता, ताचे सयत जेवण करता. हो ट्रम्पाचो दुटप्पीणाच आसा. आतंकवादा आडच्या झुजांत अमेरिकेचें धोरण कितलें संदीसादू आनी सुवार्थी आसा हेंच हातूंतल्यान दिसून येता. जनरल आसीफ मुनीराक मेळून ट्रम्प कितें साध्य करूंक सोदता? ज्या पाकिस्तानाक भारत एक क्रमांकाचो दुस्मान मानता त्या पाकिस्तानाक लागीं करपा फाटलें ट्रम्पाचो उद्देश कितें? असो प्रस्न सद्या सामान्यां भितर तशेंच सोशल मिडिया भितर विचारूंक लागल्यात.
ताची जाप इराण इझ्रायल हांचे मदीं सुरू आशिल्ल्या झुजांत मेळ्ळी. फाटल्या सप्तकांत इझ्रायलान इराणाच्या अण्वीक केंद्राचेर हल्लो केलो. हाका परती जाप म्हूण इराणानूय इझ्रायलाचेर मोटो हल्लो केलो. ह्या हल्ल्यांत दोनूय देशांच्या शेंकड्यांनी नागरिकांक आनी सैनिकांक मरण आयलें. हें झूज आतां सोंपलां, पूण ह्या झुजाचे पयलीं अमेरिकेचे राष्ट्राध्यक्ष डोनाल्ड ट्रम्पान इराणाचे सर्वोच्च फुडारी आयातुला खोमेनीक अमेरिके कडेन अण्वीक कबलात करपाक सांगिल्लें. पूण खोमेनीन ती स्पश्टपणान न्हयकारली. जर तुमी आमचे आयकुचे नात जाल्यार तुमकां ताचें मोल मेजचें पडटलें अशी धमकीच ट्रम्पान तेन्ना खोमेनीक दिल्ली. उपरांत कांय दिसां भितरूच इझ्रायलान इराणाचेर हल्लो केलो. हाचोच अर्थ अमेरिकेन फूस लायिल्ल्यानूच इझ्रायलान हो हल्लो केलो.
एके वटेन भारत पाकिस्तान झूज हें हांवेंच थांबयलें अशी आड्डी मारीत स्वताक नोबॅल पुरस्कार दिवपाची मागणी करप आनी दुसरे वटेन इझ्रायल आनी इराणा मदीं झूज पेटोवन दिवप. ट्रम्पाचो हो कुटील डाव आतां संवसारा मुखार आयला. इझ्रायलान इराणाचेर हल्लो करून लेगीत इराण आपले आयकना हें लक्षांत आयले उपरांत ट्रम्पान ह्या झुजांत इझ्रायला वटेन देंवपाची धमकी लेगीत दिली. हे धमकेकूय इराणान भीक घाली ना. ताका लागून ट्रम्प सामको तांबडो जालो आनी निमाणें अमेरिकेन ह्या झुजांत प्रत्यक्ष वांटो घेवन इराणाच्या तीन अण्वीक थळांचेर हल्लो केलो. ह्या हल्ल्या उपरांत पुराय संवसारांत खवदळ पडलो. अमेरिकेन ह्या झुजांत प्रवेश करप ही तिसऱ्या झुजाची नांदी थारूंक शकता अशें जाणकारांचें म्हणणें आशिल्लें. कारण ह्या हल्ल्या उपरांत इराणाक खूबशा देशांनी तेंको दिलो आनी अमेरिकेचो निशेध केलो. ह्या हल्ल्या उपरांत इराणान रशिया कडेन उलोवणीं करून रशियेचो तेंको मेळयलो. अमेरिकेन परतून इराणाचेर हल्लो केलो जाल्यार रशिया इराणाचे वटेन झुजांत देंवतली अशें आस्वासन इराणाक रशियेन दिलें. जर रशिया झुजांत देंवली जाल्यार तिसऱ्या म्हाझुजाक तोंड फुट्टलें. अशे अवस्थेंत अमेरिकेक आशिया खंडांत स्वताच्या हक्काचो लश्करी तळ जाय आशिल्लो, आनी पाकिस्तान हो ते खातीर सगल्यांत फायदेशीर आनी योग्य देश आसा अशी ताची धारणा आसा. फुडारांत इराण आनी रशिया आड झुजपा खातीर पाकिस्तानाची भूंय वापरूंक मेळची हे खातीर ट्रम्पाची खेळी आशिल्ली आनी पाकिस्तानाक लागीं करप होच ताचो उद्देश आशिल्लो.
मजगतीं, पाकिस्तानाच्या डॉन ह्या खबरांपत्रान हुस्को उक्तायला. हे बसके खातीर पाकिस्ताना वटेन कोणूच राजकी फुडारी नाशिल्लो. पूण अमेरिके वटेन डोनाल्ड ट्रम्प, मार्को रुबियो आनी मध्य पूर्वे खातीरचे अमेरिकेचे प्रतिनिधी स्टिव्ह विटकॉफ हाजीर आशिल्ले. पाकिस्ताना वटेन फक्त लश्कर मुखेली आसीफ मुनीर आनी आयएसआयचे म्हासंचालक असीम मलीक हे बसकेंत वांटेकार जाल्ले. ही बसका एक वराची आशिल्ली, पूण दोन वरां चल्ली. हाचे वेल्यान स्पश्ट जाता की बसका सामान्य नाशिल्ली आनी अमेरिकेच्या रणनितीचो एक वांटो आशिल्ली.
अर्थांत पाकिस्तानाच्या ह्या लक्षांत आयलें ना अशें न्हय. तो इतलो दुदखुळो ना. पाकिस्तानाक हें खबर आसून लेगीत पाकिस्तान ट्रम्पाच्या जाळांत आडकता कारण तातूंत ताचोय सुवार्थ आसा. फुडारांत जर भारतान ऑपरेशन सिंदूरा सारकी कारवाय करीत जाल्यार अमेरिकेन पाकिस्तानाची बाजू घेवची अशें पाकिस्तानाक दिसता. म्हणजेच हे भेटी फाटल्यान अमेरिका आनी पाकिस्तान ह्या दोनूय देशांचो सुवार्थ आसा. स्वताच्या सुवार्था खातीर हे दोनूय देश संवसाराक झुजांत ओडून व्हरतात. हाका
लागून ह्या दोनूय सुवार्थी देशां आड संवसारान एकवटीत जावपाची आयज गरज आसा.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
