भांगरभूंय | प्रतिनिधी
वॉशिंग्टन, खबरां संस्था ः बदलपी जिणे पद्दतीक लागून जायत्यो गजाली बदलत आसात. अमेरिकेंत अशी धक्को दिवपी घडणूक उजवाडाक आयल्या. भुरग्यांच्या जल्मा संबंदीं वेगळीच परिस्थिती अमेरिकेत निर्माण जाल्या. हाचे फाटलें कारण दोतोरांक लेगीत खबर ना. अमेरिकेंत नियोजीत वेळेच्या 3 सप्तकां आदींच भुरगीं जल्माक येतात. अशें एका संशोधनांतल्यान मुखार आयलां. ह्या अहवाला प्रमाण अमेरिकेंत 40 सप्तकांचो गर्भधारणेचो काळ आतां 37 सप्तकां मेरेन देंवला. ताका लागून भुरगीं पयलींच जल्माक येतात. हाचे फाटलें कारण दोतोर सोदून काडूंक शकले नात.
प्रमाण 12 टक्क्यांनी वाडलें
2014 ते 2022 ह्या काळांत नियोजीत वेळेच्या पयलीं जल्म दिवपाचें प्रमाण 12 टक्क्यांनी वाडलां. हाका लागून भुरग्याक आनी आवयक दोगांकय त्रास जावपाक लागल्यात. भुरगे वेळेच्या पयलींच जल्माक आयल्यार भुरग्याक संसर्ग, स्वासाचो आनी पोटाचे त्रास जातात.
वॉशिंग्टन इन्स्टिट्यूट फॉर हेल्थ मॅट्रिक्साच्या अहवाला प्रमाण, 15 ते 19 वर्सां पिरायेच्या भुरग्यांमदीं जल्माचें प्रमाण एका वर्सात 8% उणें जालां. १९९१ सावन ते स्थिरपणान उणे जायत आसा. आशियाई- अमेरिकन बायलांमदीं जल्मदर ८%, हिस्पॅनीक बायलां मदीं ३% आनी गोऱ्या बायलां मदीं ६% प्रमाण उणें जालां. जाल्यार सिजेरियन प्रसुतींत 32% वाड जाल्या. अमेरिकेंत फाटल्या वर्सा सुमार 36 लाख भुरगीं जल्माक आयलीं. 2019 वर्सा ते प्रमाण सुमार 38 लाख आशिल्ली. जाल्यार 2007 वर्सा हो आंकडो सुमार 43 लाख आशिल्लो.
नियोजीत वेळेच्या पयलीं जल्मल्ल्या भुरग्यांक चड करून एनआयसीयूंत दवरपाची गरज आसता. आनी ती भुरगीं चड करून दुबळीं आसतात.
चीन आनी उत्तर कोरिया वेगवेगळ्यो समस्या
अमेरिकेंत तीन सप्तकां आदींच भुरगीं जल्माक येतात जाल्यार चीन आनी उत्तर कोरियांत वेगवेगळ्या समस्यांक तोंड दिवचें पडटा. हांगा भुरगीं जल्माक येवपाचें प्रमाण उणें आशिल्ल्यान सरकार हुस्को करता. चीनाचे राश्ट्राध्यक्ष शी जिनपिंग हांणी स्वता लोकांक लग्न करुन चड भुरगीं जल्माक घालची अशें सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
