भांगरभूंय | प्रतिनिधी
शिक्षण, नोकरी, वेवसाय, उद्देगाच्या मळाचेर कोणूय आपले मुखार गेलो काय मनीस सभावा प्रमाण सगल्यांकूच वायट दिसता. तातूंतले कांय जाण दुस्वास करपाक लागतात. तर थोडे गुप्तपणान तांचे पांय ओडटात. हिंसक जावन कायदो हातांत घेवपीय आसात. म्हानगरां, शारां, गोंय- दिल्ली सारक्या कांय राज्यांनी हेर कडले लोक आशिल्ल्यान भायले आड भितरले (भुंयपूत) हांचे मदीं संघर्श जाल्लो अदीं मदीं दिसता. थळाव्यांची लोकसंख्या देंवली, शिक्षणाचो प्रसार जालो, अर्थीक तांक आयली काय वेंचिक नोकऱ्यो, धंदे, वेवसाय करपी थळावे मनीस उणे जातात आनी साहजिकूच तांचो जागो भायले घेतात. रेंवेंत फोंडकुल केलें काय उदक रोखडोच तो रिकामी जागो भरता. ह्या परप्रांतीय लोकांक त्या राज्यांनी चड करून मेळटात, तीं कश्टाचीं कामां आनी थळाव्यांक खबर नात, तसल्यो नोकऱ्यो. वाचप्यांनी गोंयची परिस्थिती दोळ्यां मुखार हाडची. हांगा कुशळटायेचीं, कश्टाचीं, पारंपरीक म्हणू येतात, अशीं बरींच कामां गोंयकारांनी सोडल्यांत. कांय नोकऱ्योय ते करीनात. कारण ताचें शिक्षण गोंयांत उपलब्धूच ना. कश्टाचीं कामां गोंयकारांनी सोडल्यांत. कारण शिक्षणाचो प्रसार, कुटुंब नियोजन. दरेका घरांत एक- दोन भुरगीं, दोनूय उच्च शिक्षीत. कायद्यान भारतीय नागरिकाक देशांत खंयूय वचून रावपाचो हक्क आसा. पूण, परप्रांतीयांचो गोंयांत आंकडो वाडत आशिल्ल्यान कांय लोक अस्वस्थ जाल्यात. महाराष्ट्रांत हिंदी उलोवप्यां आड जशे कांय राजकी पक्ष पेटून उठल्यात, तशी परिस्थिती गोंयांत अजून तरी ना. तशी ती जावचीय न्हय. मात, संवसारांतल्या सगल्यांत गिरेस्त, सुशिक्षीत, म्हासत्ता आशिल्ल्या अमेरिकेंत 2- 3 वर्सां पयलींच ही कीड पावल्या. थंय आशियायी लोकां आड दुस्वास वाडला!
अमेरिकेची अर्थीक नाडी ज्यूंच्या हातांत आसा. अमेरिकेचें तंत्रज्ञान भारतीय सांबाळटात. हेर कामां काळे लोक, पाकिस्तानी आनी बाकीच्या देशांतले थंय स्थायीक जाल्ले लोक करतात. ताका लागून आमकां नोकऱ्यो मेळनात, अशें अमेरिकी तरणाट्यांक दिसपाक लागलां आनी हाचो परिणाम भिरांकूळ जाला. सोशल मिडिया, वेंचणुकां पुरतें हो दुस्वास मर्यादीत उरूंक ना. तर आशियायींचेर हल्ले जावपाक लागल्यात. (आॅस्ट्रेलियेंतूय पोरूं ते जाल्ले.) फाटल्या चार सप्तकांत वर्णद्वेशी हल्ल्यांनी चवगां भारतीयांक मरण आयलां. 25 वयर लोक जखमी जाल्यात. फाटल्या वर्स भरांत दुस्वासाक लागून 520 हल्ले, गुन्यांव जाल्यात. ताचे पयलीं 375 जाल्ले. म्हणजे ही वाड 40 टक्के जाली. एके संस्थेन हे विशीं सर्वेक्षण केलां. तातूंत दोन भारतीयां मदल्या एकल्याक रंगाच्या आदाराचेर भेदभावाची वागणूक मेळ्ळ्या, अशें दिसून आयलां. फक्त सामान्य लोकूच न्हय, तर प्रशासनूय हेंच करता. हालींच जान्हवी हे तरणाटेक पुलिसांनी मारपेट केली. लुकसाण भरपाये वयल्यान तिच्यो भगल्योय मारल्यो. भारतीय आमच्यो अर्थीक संदी (नोकरी, वेवसाय…) काबार करतात, अशें कांय कडव्या अमेरिकनांक दिसता. भारतीयांच्या मतान, ट्रम्प परत सत्तेर येवचे म्हूण खेळिल्लो हो डावपेच. थंयच्या कांय खबरां चॅनलांच्या मतान, म्हत्वाचीं पदां भारतीय बळकावपाक लागल्यात. तांकां अमेरिका ताब्यांत घेवपाची आसा, पूण आमी भारता कडेन एकनिश्ठ आसात, अशें ते भायल्यान दाखयतात, अशें चॅनलाच्या पत्रकारांचो दावो. ते वटेन बायडेन भारतीय आनी हेर आशियायी लोकांक अमेरिकेंत हाडीत आसात, असो ट्रम्प समर्थकांचें म्हणणें. प्रशासनांतल्या 130 म्हत्वाच्या पदांचेर मूळ भारतीयांची नेमणूक जाल्या. 60 व्हडल्या कंपन्यांचे सीईओ भारतीय आसात. सध्या अमेरिकेच्या लोकसंख्येच्या 1 टक्को भारतीय आसात. ते 6 टक्क्यां परस चड टॅक्स भरतात. एका अभ्यासा प्रमाण अमेरिकेच्या दरेका 26 डाॅलरांतलो 1 डाॅलर भारतीयांचो. अमेरिकनांचें वर्सुकी सरासरी उत्पन्न 75 हजार डाॅलर्स, तर भारतीयांचें 1 लाख!!
हें फक्त वेंचणुके पुरतेंच काय खरोच दुस्वास पातळपाक लागला, तें कांय म्हयन्यांनी कळटलेंच. मात, ह्या प्रोपोगेंडाक लागून निश्पाप लोक जखमी जाल्यात, मेल्यातूय. तातूंत चडशे भारतीय आसात. वर्ण, जात, धर्म, समाज, प्रांत, भाशा हांच्या दुस्वासाक लागून केन्ना कोणाचें बरें जायना. हाचो गंभीर परिणाम केन्ना ना केन्ना जाताच. अमेरिकन समाज, अर्थवेवस्थेक हाचो धपको बसपाक शकता. आपली अर्थीक, शिक्षणीक उदरगत करपाचे आशेन दरवर्सा अमेरिकेक वचपी हजारांनी भारतीयांकूय हाचो फटको बसपाची भिरांत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
