भांगरभूंय | प्रतिनिधी
वाॅशिंग्टन, खबरां संस्था ः अमेरिकेंतल्या तरणाट्यांक ड्रग्सां पसून पयस दवरपाक शिक्षण, प्रतिबंध मोहीम, सोशल मिडिया, व्हिडियो गेमींग हांचो म्हत्वाचो वांटो आसा. ताका लागून हायस्कुलांतल्या विद्यार्थ्यां मदीं सोरो, तंबाखू, ड्रग्स हांचो नेमान वापर उणो जाला. नॅशनल इन्स्टिट्यूट ऑन ड्रग अॅब्युजचे संचालक डॉ. नोरा वोल्को हांणी म्हणलें, दशकां उपरांत तरणाट्यांक, खास करून नेण्ट्यां भुरग्यांक ड्रग्साचें व्यसन जावपाचो धोको सगळ्यांत उणो आसा. हाचे फाटलें मुखेल कारण म्हळ्यार शिक्षण आनी प्रतिबंध मोहीम. तरणाट्यांक वेगवेगळ्या प्रकारच्या वखदांचो दुश्परिणाम कळोवन तांकां भलायके संबंदी जागृत करतात.
खासा करून धूम्रपान विरोधी मोहीम ही एक प्रभावी मोहीम थारली. तंबाखू आनी सोरो खरेदी आनी सेवन करपाची कायदेशीर पिराय 21 वर्सां मेरेन वाडोवन तांच्या जायरातींचेर बंदी घाल्ल्यान खूब मजत जाल्या. हाचे भायर सोशल मिडिया आनी व्हिडियो गेमींग हांचोय उपेग ड्रग्स आडावपा खातीर केला. सोशल मिडिया आनी डिजिटल डिव्हायसांत व्यस्त आशिल्ल्यान तरणाटे एकामेकांक उणेंच मेळटात. देखून तांकां वेसन जावपाची शक्यताय उणी जाता. म्हामारीच्या काळांत शाळा बंद आसतना वेसनांचें प्रमाण खूब उणें जाल्ल्यान हें स्पश्ट जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
