भांगरभूंय | प्रतिनिधी
ओहियो, खबरां संस्था ः फाटल्या तीन- चार म्हयन्यांत परदेशांतल्या भारतीय नागरिक वा भारतीय विद्यार्थ्यांक मरण येवपाचो आंकडो वाडला. आतां अमेरिकेंतल्या ओहिओ शारांत उमा सत्या गड्डे ह्या विद्यार्थीनीक मरण आयिल्ल्याची म्हायती भारतीय वाणिज्य दूतावासान दिल्या. ह्या मरणाची चवकशी पुलिसांनी सुरू केल्या.
2024 वर्साचे सुरवेक अमेरिकेंत उण्यांत उणें अर्द डझन भारतीय विद्यार्थ्यांक मरण आयलां. भारतीय विद्यार्थ्यांचेर आनी मूळ भारतीय नागरिकांचेर सतत हल्लो जायत आशिल्ल्यान परदेशांतल्या भारतीय समाजांत हुस्को निर्माण जाला.
फाटल्या म्हयन्यांत मिसूरीच्या सेंट लुईसांत भारतांतल्या 34 वर्सां पिरायेच्या प्रशिक्षीत शास्त्रीय नर्तक अमरनाथ घोष हाका फार मारून जिवेशीं मारलो. जास्यार पर्ड्यू विद्यापिठांतलो 23 वर्सां पिरायेचो भारतीय अमेरिकन विद्यार्थी समीर कामत 5 फेब्रुवारीक इंडियानाच्या सैम संरक्षण वाठारांत मेल्लो मेळ्ळो. वॉशिंग्टनांतल्या रेस्टॉरंटाच्या भायर 2 फेब्रुवारीक जाल्ल्या हल्ल्यांत 41 वर्सां पिरायेचो भारतीय आयटी एक्झिक्युटिव्ह विवेक तनेजा जीवघेणो जखमी जाल्लो. हातूंत ताका मरण आयलें.
भारतीय दूतावासान अमेरिकेच्या विद्यार्थ्यां कडेन सादलो संवाद
भारतीय व्यक्तींचेर आनी विद्यार्थ्यांचेर जाल्ल्या हल्ल्या उपरांत वॉशिंग्टनांतल्या भारतीय दूतावास आनी तांच्या वेगवेगळ्या सुवातींनी आशिल्ल्या वाणिज्य दूतावासांतल्या अधिकाऱ्यांनी अमेरिकेंतल्या भारतीय विद्यार्थ्यां कडेन संवाद सादलो. ह्या संवादांत विद्यार्थ्यांच्या कल्याणाच्या वेगवेगळ्या विशयांचेर चर्चा जाली. हांतूत प्रभारी राजदूत श्रीप्रिया रंगनाथन हांच्या फुडारपणा खाला अमेरिकेच्या ९० विद्यापिठांतल्या सुमार १५० इंडियन स्टुडंट असोसिएशनाचे अधिकारी आनी विद्यार्थ्यांनी वांटो घेतिल्लो. तशेंच अटलांटा, शिकागो, ह्यूस्टन, न्यूयॉर्क, सॅन फ्रांसिस्को आनी सिएटल हांगाचे भारताचे काउन्सिल जनरलय हाजीर आशिल्ले.
लाखांनी भारतीयांक अमेरिका, युरोप, आॅस्ट्रेलियेचें आकर्शण आसा. ते थंय शिक्षण, नोकरे खातीर तशेंच स्थायिक जावपाक व्हडा संख्येन वतात. तातूंतले बरेच जाण कायमचे थंय रावतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
