अमेरिका झुजाक बेगीन पूर्णविराम दितशें दिसना : सीमा मुस्तफा
भांगरभूंय | प्रतिनिधी
झुजाक अमेरिका बेगीन पूर्णविराम दितली अशें म्हाका दिसना. आरंभ अमेरिकेन केला, चडांत चड उजो पेटोवपाचो वावरय अमेरिकाच करता.
पांच दसकांवयर पत्रकारितेंत आशिल्ल्यो वरिश्ठ पत्रकार, स्तंभलेखक सीमा मुस्तफा गोंयांत रावतात. एका लश्करी अधिकाऱ्याची धूव झुजनीतीची जाणविकाय तांकां आसा. पत्रकारिताच न्हय राजकारण, समाजकारणांत त्यो वावुरपी.
पत्रकार म्हणून लिखाणांतल्यान तांची वळख जाल्ली. गोंयांत जाल्ले भारतीय वरिश्ठ पत्रकार संघटनेचे बसकेंत तांची भेट जाली. पत्रकारितेंत व्हडा प्रमाणात इनामां जोडपी सीमा ‘सिटीझन’ ह्या डिजीटल दिसाळ्याच्यो अाॅडिटर इन चीफ. सध्याच्या इराण- अमेरिका झुजा विशीं तांचे विचार, मत समजून घेवपाचो हो येत्न. तांची वॉटसअॅपार प्रस्न धाडून घेतिल्ली इंग्लिशींतली ही मुलाखत कोंकणींतल्यान वाचप्यां खातीर.
इराण आड जावपी झुजाक जापसालदार कोण?
- इझ्रायल. पद्दतशीरपणान पश्चिम आशियाई राश्ट्रांक सोंपोवपाची प्रतिकारशक्त त्या राश्ट्राक आयल्या. व्हडा प्रमाणांत मनीसजातीक नश्ट करप, राश्ट्रां राश्ट्रां भितर झूज पेटोवपाचें कारस्थान तें राश्ट्र करता. देखीक सत्यानाश करपाची शस्त्रां नाशिल्लें इराक. सिरीया जंय आसादाक कुशीक काडपाचे येत्न करुन नवे इसीस आकांतवादी फुडारी घडले तें लिबीया आनी आतां लेबनन. पॅलेस्टायन, गाझांत मनशान मनशांक मारप अजूनय चालू आसा. पश्चिम आशियांतल्या तेलान गिरेस्त अशे गल्फांतले दक्षिणे कडले वांठार झुजा पसून कुशीक आसात. मात थंय झुजाचे परिणाम मनीस, येणावळीचेर जाल्यात.
अमेरिका आरंभाक झुजांत लिपचोरयां आशिल्ली आतां झुजा पासत चड वावुरता अशें तुमकां दिसना?
- ना. अमेरिकेन केन्नाच लिपचोरयां झुजांत वांटो घेवंक ना. इझ्रायलाक तेंको दिवन, झुज पेटोवपांत, झुजांत अमेरिका आशिल्ली. लिबिया, इराक झुजांत समकालीन तेंपार देंवल्या. गाझांतल्या झुजांतल्यान इझ्रायल खरेपणी व्हड शक्त म्हणून वयर सरलां.
एक झुज जाता, फाटल्यान परिणाम सासणाचे उरतात बरोबर?
- बरोबर. झुज म्हणल्यार सत्यानाश, तोडफोड मनशांचो, दायजाचो, साधनसुविधांचो. राक्षसी कर्म तें, माफ करात म्हणत मनशान मनशाक मारपाचें. झुजांत बायलां, भुरगीं, निरागस नागरिकांक व्हड दुख्ख भोगचें पडटा. राश्ट्रांची राश्ट्रां, संस्कृताय काबार जातात.
अमेरिकेची हालीं झुजांतल्यान फाटीं सरपाची भास सुरू जाल्या.
- झुजाक अमेरिका बेगीन पूर्णविराम दितली अशें म्हाका दिसना. आरंभ अमेरिकेन केला, चडांत चड उजो पेटोवपाचो वावरय अमेरिकाच करता. अमेरिकेचे अध्यक्ष डोनाल्ड ट्रम्प हांची भास झुजाक आनी अत्याचार/ हिंसेक सारें घालपी. घरा म्हणल्यार अमेरिकेंत नागरिकांनी बोवाळ करुन चेंपण हाडल्या उपरांत शांतिकायेची भास जाता, नाजाल्यार वर्सांची वर्सां भास झुजाचीच.
झुजा तेंपार हेर राश्ट्रांनी, राज्यांनी कितें करप? कशी आसची नागरिकांची लागणूक, चलणूक, वेव्हार?
- शांतीकाय हाडपाचे येत्न करत रावप सदांच, 365 दीस. झुजा तेंपारय खरी उदरगत शांतीकायेंतल्यान जावंक शकता. नागरिकांनी शांतीकाय, सवस्तकायेन वावुरपाक जाय. तांचें मागणें शांतीकायेन शांती, सवस्तकायेपासत आसचें.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
