भांगरभूंय | प्रतिनिधी
खबरां संस्था ः संवसारभर कॅन्सर दुयेंतींचो आंकडो वाडत आसा. फुडल्या 6 म्हयन्यांत कॅन्सराची लस मेळूं येता अशी म्हायती केंद्रीय राज्यमंत्र्यांनी दिल्या. मजगतीं, अमेरिकन संशोधकांनी कॅन्सराचेर व्हड संशोधन केलां.
दादल्यांक तोंडाचो आनी फुफ्फुसाचो कॅन्सर जाल्यार बायलांक गर्भाशय आनी स्तनाचो कॅन्सर चड प्रमाणांत जाता. हो वाडत वचपी धोको मतींत घेवन केंद्रीय आनी राज्य पांवड्यार वेगवेगळे उपाय सुरू आसात. कॅन्सार जाल्ल्याचे सुरवातीक कळ्ळें जाल्यार उपचार करप सोंपें जाता. हे फाटभुंयेर एक म्हत्वाचें संशोधन उजवाडाक आयलां.
कोणाचेर प्रयोग केलो?
अमेरिकन संशोधकांनी हुंदराचेर प्रयोग करून निमाणे निश्कर्श काडले. तातूंत ट्रिम-२८ जनुकाची उणी पातळी आशिल्ल्या हुंदरा मदीं कॅन्सरा संबंदीत जनुकांचेर एपिजेनेटिक मार्कर २ वेगवेगळ्या नमुन्यांनी मेळ्ळे. हे नमुने सुरवातीच्या काळांत तयार जातात. दरेक असामान्य पेशी कॅन्सरांत रुपांतरीत जायना अशें संशोधनांतल्यान दिसून आयलां अशीं म्हायती अमेरिकन संशोधकांनी दिल्या.
मिशिगनांतल्या व्हॅन अँडेल इन्स्टिट्यूटांतल्या संशोधकांच्या मतान, उणी जोखीम आशिल्ल्या लोकांक ल्युकेमिया सारकिल्ले द्रव ट्यूमर जावपाचो चड धोको आसता. चड धोक्याच्या परिस्थितींत फुफ्फुसाचो वा प्रोस्टेट कॅन्सराचो धोको आसता. कॅन्सरा विशीं नेचर कॅन्सर ह्या नेमाळ्यांत संशोधन उजवाडाक आयलां. ते प्रमाण, कॅन्सराच्यो दोन वेगवेगळ्यो एपिजेनेटिक स्थिती वळखल्या जांतूत मनशाक कॅन्सराचो धोको कितलो आसा हें कळपाक शकता. हे एपिजेनेटिक्स व्यक्तींत पयल्याच पांवड्यार तयार जातात. हाका लागून डीएनए बदल नासतना ताचेर नियंत्रण दवरतात. ह्या परिस्थितींतल्या एका परिस्थितीक लागून कॅन्सराचो धोको उणो जाता, जाल्यार दुसरी स्थिती कॅन्सराचो धोको वाडटा अशीं म्हायती संशोधनांत दिल्या.
2020 वर्सा संवसारभर कॅन्सराक लागून एक कोटी लोकांक मरण आयलें. दर 6 मरणांतलें एक मरण कॅन्सराक लागून जाता. स्तन आनी फुफ्फुसाच्या कॅन्सराचें प्रमाण वाडलां.
आयसीएमआर कडल्यान धक्को दिवपी आंकडेवारी…
भारतांत कॅन्सर दुयेंतींचो आंकडो 25 लाखां वयर आसा. कॅन्सराक लागून भारतांत दर 8 मिनटांक एके बायलेक मरण येता. दर वर्सा नव्यान नोंद जाल्ल्या कॅन्सर दुयेंतींचो आंकडो 7 लाखां परस चड आसता. कॅन्सराक लागून मरण आयिल्ल्यांचो आंकडो 5 लाख 56 हजार आसा. स्तनाचो कॅन्सर आशिल्ल्या संवसारांतल्या दर 2 बायलांक फाटल्यान 1 बायल भारतांतली आसा. भारतांत दर दिसा तंबाखू संबंदीत कॅन्सराक लागून 2500 लोकांक मरण येता. 5 दादल्यां मदीं एकल्याक आनी 20 बायलां मदीं एके बायलेक धूम्रपानाक लागून मरण येता. 2010 वर्सा धूम्रपानाक लागून मरण आयिल्ल्यांचो आंकडो 9 लाख 30 हजार आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
