भांगरभूंय | प्रतिनिधी
पणजी : रांदपाचें तेल ते बायो डिझेल, फोल्ड करपाक येवपी सौर पॅनल, पेटंट केल्ले वार्याचे टर्बायन, ४० टक्के वीज वाचोवपी संकरीत थर्मल पॅनल, शेतांतलो कोयर विलो लावपाचे ऍप्स, ल्हान प्रमाणांतल्या घाणयार्या उदकाच्या उपचार प्रकल्पांक ‘अमेझिंग गोवा’च्या स्टॉलांक व्हड प्रतिसाद मेळपाक लागला. अत्याधुनीक तंत्रज्ञानाचो वापर आनी गिरायक केंद्री सेवा आशिल्ल्यान गिरायकांक ह्या उत्पादनांचो फायदा जातलो.
आमच्या दिसपट्ट्या जेवणांत तळिल्ल्या जिनसांचो आसपाव आसता. तळपा खातीर परत परत त्याच तेलाचो वापर केल्यार भलायकेक धोको निर्माण जाता. हाका लागून काळजाचे दुयेंस आनी हेर विकार जावपाची शक्यताय आसता. हें मतींत घेवन मुंझर कंपनीन वापरिल्ल्या तळपाच्या तेलांतल्यान बायो डिझेल तयार करपाचो उपक्रम सुरू केला. ही कंपनी गोंयांतल्या व्हडल्या हॉटेलां कडल्यान तळपाचें तेल विकतें घेता. उपरांत ह्या तेलाचें बायो डिझेलांत रुपांतर करून वेगवेगळ्या कामां खातीर इंधन म्हणून वापरतात.
अर्बन एक्सिस ही हायब्रीड थर्मल सौर पॅनल तयार करपी कंपनी. जर हें पॅनल ७.५ टन परस व्हड केंद्रीय एसींत बसयलें जाल्यार हातूंत वापरिल्ल्या तंत्रज्ञानाक लागून वीज बिल २५ ते ४० टक्क्यांनी उणें जातलें. व्हड हॉलांनी वा ऑफिसांनी ताचो उपेग करूं येता. केव्हीबी कंपनीन सौर उर्जेचे ड्रायर, सौर कुकर तयार केल्यात. ड्रायराचो वापर नाल्ल, मिरसांग, नुस्तें, मसालो आनी हेर जायत्यो गजाली सुकोवपा खातीर करतात. सौर कुकर वापरून शंबरां परस चड लोकांचें जेवण तयार करतात.
घडी करपाक मेळपी अशें सौर पॅनल शेख लिक कंपनीन तयार केलां. ही कंपनी वेपारी आनी घरगुती वापरा खातीर वेगवेगळीं उत्पादनां तयार करता. उपलब्ध आशिल्ल्या जाग्या प्रमाण त्यो स्थापन करूं येतात हें तांचें खाशेलपण. सौर पॅनलांक फावो ती सुवात नाशिल्ल्यान कंपनीन हीं उत्पादनां बाजारांत हाडल्यांत. कंपनीन कांय सुवातींनी पुरायपणान उब्या वण्टींचेर पॅनल लायल्यांत. कांय कडेन घराच्या पांख्याचेर समान आकाराचें पॅनल बसयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
