भांगरभूंय | प्रतिनिधी
अमेरिकेंतली धावी व्हडली दुदाची सहकारी संस्थे कडेन भागीदारी
नवी दिल्ली, खबरां संस्था ः नामनेचो डेअरी ब्रँड अमूल ‘टेस्ट ऑफ इंडिया’ ह्या टॅगलायना सयत दुदाचे उत्पादन अमेरिकेंत हाडपाचे तयारेत आसा. अमुल चलोवपी गुजरात कोऑपरेटिव्ह मिल्क मार्केटिंग फेडरेशन (GCMMF) कंपनीन अमेरिकेंतली धावी व्हडली दुदाची सहकारी संस्था मिशिगन मिल्क प्रोड्युसर्स असोसिएशन (MMPA) हांचे कडेन भागीदारी केल्या. मिशिगनांतल्या नोव्ही हांगा जाल्ले एमएमपीएचे 108वे वर्सुकी बसकेंत ह्या भागीदारीची घोशणा केली.
भारतांत अमुल दुदाक व्हड मागणी आसा. फकत दूदच न्हय तर अमुलाच्यो चॉकलेटी आनी आइसक्रीम लेगीत व्हड ब्रँड जाल्यात. आतां अमुलाचें दूद अमेरिकेंतय मेळटलें. अमूल दुदाचे कंपनीचें हे एक व्हड येस. ही पयलेच खेपेची गजाल की अमूल आपली नवी उत्पादन श्रेणी भारता भायर बाजारांत लाँच करता.
अमूल दूद 3.8 लिटर आनी 1.9 लिटर पॅकेजींगांत उपलब्ध
अमेरिकेंत अमूल दूद एक गॅलन (3.8 लिटर) आनी अर्द गॅलन (1.9 लिटर) पॅकेजींगांत उपलब्ध आसतलें. अमेरिकेंत फकत 6% फॅट आशिल्ले अमुल गोल्ड ब्रँड, 4.5% फॅट आशिल्ले अमूल शक्ति ब्रँड, 3% फॅट आशिल्ले अमुल ताज आनी 2% फॅट आशिल्ले अमुल स्लिम ब्रँड विकतले. सध्या हे ब्रँड ईस्ट कोस्ट आनी मिडवेस्ट बाजारांत विकतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
