भांगरभूंय | प्रतिनिधी
नवी दिल्ली, खबरां संस्था ः देशांतली सगळ्यांत व्हडली दुद उत्पादक कंपनी अमूल कंपनीन अमूल गोल्ड, अमूल ताजा आनी अमूल टी स्पेशल ह्या 1 लिटर पॅकेटांचे दर एक रुपयांन उणे केल्यात. गुजरात सहकारी दुदाचे विपणन महासंघाचे वेवस्थापकीय संचालक जयेन मेहता हांणी हे विशीं म्हायती दिल्या.
मजगतीं, जून 2024 वर्सा अमूलान दुदाचें दर लिटराक 2 रुपया वाडयल्लें. अमूलान हे दर वाडयलें उपरांत मदर डेरीनय दुदाचे दर लिटराक 2 रुपया वाडयले. हे दर वाडले उपरांत अमूल गोल्डाच्या 500 मिलिलीटर पॅकेटाचे दर 32 रुपया वयल्यान 33 रुपया जाले. जाल्यार एक लिटर अमूल गोल्डाचे दर 64 रुपया वयल्यान 66 रुपया मेरेन वाडलें. तशेंच अमूल ताजाच्या अर्द लिटर पॅका खातीर गिरायकांक 26 रुपया बदला 27 रुपया फारीक करचे पडटाले. त्याच वेळार अमूल शक्तीच्या अर्द लिटर पॅकेटाचे दर 29 रुपया वयल्यान 30 रुपया मेरेन वाडल्ले.
हो नवो दर फकत 1 लिटर दुदाच्या पॅकेटांचेर लागू जातलो. आतां गिरायकांक अमूल गोल्ड, अमूल ताजा आनी अमूल टी स्पेशल दूद नव्या दरांत विकतें घेवंक मेळटलें. गिरायकांक परवडपी दरांत दूद विकतें घेवंक मेळचें म्हणून अमूलान हो दर उणो केला.
नवे दर जाहीर जाले उपरांत 66 रुपया दर लिटराक मेळपी अमूल गोल्ड आतां 65 रुपया दरान मेळटलो. जाल्यार अमूल ताजाचो दर 54 रुपया वयल्यान 53 रुपया मेरेन उणो जातलो. दुसरे वटेन अमूल टी स्पेशल दुदाच्या एक लिटर पॅकेटाचे दर एक रुपया उणे करून 62 रुपया वयल्यान 61 रुपया जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
