भांगरभूंय | प्रतिनिधी
म्हजें घर येवजणेचें करतले उक्तावण
भांगरभूंय । प्रतिनिधी
पणजी : केंद्रीय गृहमंत्री अमीत शाह 4 ऑक्टोबराक गोंयांत येतले. तांचे हस्तुकीं गोंय सरकाराचे म्हत्वकांक्षी म्हजें घर येवजणेचें उक्तावण करतले. येवजणे प्रमाण सरकारी, कोमुनिदाद जमनी वयलीं तशेंच वीस कलमी येवजणे खालचीं घरां नियमीत करतले. कार्यावळी वेळार लाभार्थ्यांक घरांच्यो सनदी दितले. तशेंच शाह हांचे हस्तुकीं छत्रपती शिवाजी महाराज संग्रहालय, पर्वरी टावन स्क्वेयर ह्या प्रकल्पां खातीर बुन्यादी फातर बसयतले.
हे आदीं मुख्यमंत्री डॉ. प्रमोद सावंत हांणी ऑगस्टांत दिल्लींत अमीत शाह हांची भेट घेवन तांकां गोंयांत येवपाचें आमंत्रण दिल्लें. शाह सप्टेंबरांत येवपाचे आशिल्ले, मात कांय कारणांक लागून येवजणेचें उपचारीक उक्तावण ऑक्टोबरांत दवरलां. हे येवजणेचेर विरोधकांनी खर टिका केल्ली आसली तरी सरकार हे विशीं ठाम आसा. हे येवजणेक लागून गोंयांतल्या 50 टक्के गोंयकारांक फायदो जातलो, अशें मुख्यमंत्र्यान हे आदींच स्पश्ट केलां. हे आदीं गोंयांतल्या सरकारी जमनी वयलीं घरां अधिकृत करपा विशींचो मसुदो नेम जारी केला. तशेंच वीस कलमी खाला घरां नियमीत करपा खातीर लेगीत परिपत्रक काडलां. कोमुनिदाद जमनी वयलें 300 चौखण मिटरां मेरेनचें बांदकाम नियमीत करतले. सरकारी जमनी वयलीं 28 फेब्रुवारी 2014 आदलीं 300 चौखण मिटरां मेरेनचीं घरां नियमीत कररतले. ते खातीर ते व्यक्ती कडेन 28 फेब्रुवारी 2014 च्या आदींचो 15 वर्सांचो राबितो दाखलो आसप गरजेचें आसा. हे विशीं विधानसभा पावसाली अधिवेशनांत विधेयक मंजूर जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
