भांगरभूंय | प्रतिनिधी
पणजी : ऑनलायन पद्दतीन गोंयांतली मालमत्ता दाखोवन पर्यटकांची कोट्यांनी रुपयांची फटवणूक प्रकरणांत मुख्यमंत्री डॉ. प्रमोद सावंत हांचे विनवणे वयल्यान केंद्रीय गुन्यांव अन्वेशण विभागान (सीबीआय) चवकशी सुरू केल्या. हे विशीं केंद्रीय गृहमंत्री अमीत शाह हांणी कोंकणींतल्यान पत्र बरोवन गोंय सरकाराचें कवतूक करून वयली म्हायती दिल्या. हें प्रकरण हणजूणें पुलिसांनी जानेवारी 2025 त नोंद केल्लें. तातूंत एका पर्यटकाक 20 हजार रुपयांक फटयल्लो.
मेळिल्ले म्हायती प्रमाण, ह्या प्रकरणांत चंदीगडच्या पंकड धिमन हांणी हणजूणें पुलीस स्टेशनार 12 जानेवारी 2025 ह्या दिसा कागाळ दाखल केल्ली. ते प्रमाण तांणी आपल्या कुटुंबियां खातीर रातच्या 10 वरांच्या सुमाराक वागातोर वाठारांत रावचे खातीर बुकींग डॉट कॉम ह्या संकेतथळा वयल्यान एक रुबी नावांचो व्हिला आगावू राखून दवरलो. ते खातीर कागाळदारान 20 हजार रुपया जीपे वरवीं मोहम्मद गोरेमिया हाच्या खात्यांत जमा केल्ले. ते प्रमाण वागातोरा वयल्या व्हिला 24 डिसेंबर 2024 ते 4 जानेवारी 2025 ह्या काळांत बूक केल्लो. थारिल्ले प्रमाण ताचे कुंटुंबीय गोंयांत आयलें, तेन्ना तो व्हिला वागातोर वाठारांत अस्तित्वांतूच नाशिल्ल्याची म्हायती मुखार आयली. तेचवरी दुबावीत मोहम्मद गोरेमिया अस्तित्वांत नाशिल्ल्याचें व्हिलाच्या संकेतथळा वयल्यान रुबी व्हिला गोवा नांवान बुकींग घेता, अशें मुखार आयलें.
ताची दखल घेवन हणजूणेंचे पुलीस निरिक्षक सुरज गांवस हाच्या मार्गदर्शना खाला उपनिरिक्षक साहील वारंग हांणी गुन्यांव दाखल करून तपास सुरू केलो. ह्या काळांत तातूंत टोळी वावुरता अशें मुखार आयले उपरांत मुख्यमंत्री डॉ. प्रमोद सावंत हांणी गृहमंत्री ह्या नात्यान वयलें प्रकरण सीबीआयक दिवपाचें थारायलें. ते प्रमाण अवर सचीव मनीश केदार हांणी हे संबंदांत केंद्रीय गृहमंत्रालया कडेन पत्रवेव्हार केलो. ते प्रमाण सीबीआयच्या मुंबय अर्थीक गुन्यांव विभागान 28 मार्च 2025 ह्या दिसा गुन्यांव दाखल करून तपास सुरू केला. हे संबंदांत केंद्रीय गृहमंत्री अमीत शाह हांणी कोंकणींतल्यान पत्र बरोवन गोंय सरकाराचें कवतूक करून वयली म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
