भांगरभूंय | प्रतिनिधी
चंद्रकांत कवळेंकारः पूर्वतयारे खातीर मुखेल कार्यकर्त्यांची बसका
भांगरभूंय । प्रतिनिधी
केपें: पक्षान दिल्लें टार्गेटी परस चड हाजेरी सदांच केपें मतदारसंघांत पळोवपाक मेळटा. केंद्रीय गृह मंत्री अमीत शाह हांचे जाहीर सभेक पक्षान 500 लोकांचें टार्गेट दिलां, मात केपें मतदारसंघांतल्यान सुमार 20 बशींची वेवस्था केल्या. उण्यांत उणे हजारभर लोक हे बसकेक हाजीर रावतले, अशें आदले उपमुख्यमंत्री तशेंच भाजपाचे उपाध्यक्ष चंद्रकांत कवळेंकार हांणी सांगलें.
केंद्रीय मंत्री अमीत शाह 16 एप्रीलाक गोंयांत येतले. फोंड्यां जावपी जाहीर सभेंत ते कार्यकर्त्यांक मार्गदर्शन करतले. ते निमतान केपें मतदारसंघांत नेटान तयारी चल्ल्या. हाची तयारी करचे खातीर कवळेंकार हांणी बेतूलच्या आपल्या घरा सरपंच, नगरसेवक, मुखेल कार्यकर्त्यांची बसका घेतिल्ली. ह्या वेळार ते उलयताले. हे बसकेक सुमार 250 कार्यकर्ते हाजीर राविल्ले.
हे बसकेक दक्षीण गोंय जिल्हो पंचायत अध्यक्ष सुवर्णा तेंडुलकार, जिल्हो पंचायत उपाध्यक्ष खुशाली जो. वेळीप, जिल्हो पंचायत वांगडी शाणू वेळीप, भाजपा मंडळ अध्यक्ष संजय वेळीप, खोलाचे सरपंच अजय पागी, फातर्पेचे सरपंच महेश फळदेसाय, बार्शेचे सरपंच अर्जून वेळीप, नगरसेवक चेतन हळदणकार, मोरपिर्लाचे आदले सरपंच खुशाली वेळीप, एसटी मोर्चाचे अध्यक्ष प्रभाकर गांवकार, केपें महिला मोर्चा अध्यक्ष शितल नायक, उपसरपंच वेळीप, उपसरपंच शिवन्या वेळीप, पंच कृष्णा वेळीप, देवीदास वेळीप, मोहन गांवकार, शाणू वेळीप, दिलीप वेळीप, पंढरी प्रभुदेसाय आनी हेर मानेस्त हाजीर राविल्ले.
कवळेंकार हांणी सांगलें, केपें मतदारसंघाचो आयज मेरेनचो इतिहास आसा, पक्षान जी जापसालदारकी दिल्या ताचे परस दुपेटीन प्रतिसाद केपेंच्या लोकांनी दिला. ज्यो ज्यो जापसालदारक्यो दिल्यात त्यो सदांच येसस्वी केल्यात. आयज लेगीत एका दिसांत सगळ्यांक मॅसेज धाडिल्ली, मात पूर्वतयारे खातीर व्हड प्रमाणांत सरपंच, नगरसेवक, मुखेल कार्यकर्त्यांची हाजेरी व्हड प्रमाणांत आशिल्ली. तशेंच हे बसकेंत खंयच्या वाठारांतल्यान कितल्यो बशी सोडच्यो ताची जापसालदारकी कार्यकर्त्यांक वांटून दिल्या, अशें कवळेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
