भांगरभूंय | प्रतिनिधी
म्हजें घर येवजणेची केंद्रीय गृह मंत्र्यां हस्तुकीं सुरवात
प्रशासन स्तंभ, युनीटी मॉल प्रकल्पाचो बुन्यादी फातर
2451 कोटींच्या प्रकल्पांचो व्हर्च्युअल पद्दतीन शुभारंभ
भांगरभूंय । प्रतिनिधी
पणजी : कोमुनिदाद, सरकारी आनी खासगी जमनी वयलीं अनधिकृत घरां अधिकृत करपा खातीरच्या म्हजें घर येवजणेचो शुभारंभ आयज केंद्रीय गृहमंत्री अमीत शहा हांचे हस्तुकीं जातलो. ताळगांवच्या डॉ. श्यामाप्रसाद मुखर्जी स्टेडियमाचेर सांजे वेळार जावपी कार्यावळींत मुख्यमंत्री डॉ. प्रमोद सावंत तशेंच हेर मंत्री, आमदार हाजीर आसतले. ह्या वेळार प्रशासन स्तंभ, युनीटी मॉल, छत्रपती शिवाजी महाराज म्युझियम अश्या वट्ट 2451 कोटींच्या प्रकल्पाचो व्हर्च्युअल पद्दतीन शुभारंभ जातलो.
गोंयच्या सगल्या वाठारांतल्यान कार्यावळीक लोकांची हाजेरी आसतली. लोकांक येवपा वचपा खातीर बशींची वेवस्था केल्या. केंद्रीय गृहमंत्री अमीत शाह हांचे भेटीक लागून पुलिसांनी सुरक्षा वेवस्थेची तजवीज केल्या. येरादारी वेवस्थेंतले बदल येरादारी पुलिसांनी कळीत केल्यात.
सरकारी, कोमुनिदाद तशेंच खासगी जमनीचेर गोंयकारांचीं खूबशीं घरां आसात, जीं तांच्या नांवार नात. घरां अधिकृत नाशिल्ल्यान तीं केन्नाय मोडपाचो धोको आसा. ह्या घरांक संरक्षण दिवपा खातीर म्हजें घर येवजणेची कार्यवाही आयज सावन जातली, अशें मुख्यमंत्री डॉ. प्रमोद सावंत हांणी म्हणलां. पावसाळी अधिवेशनांत सरकारान तीन विवीध विधेयकां संमत केलीं. कोमुनिदाद जमनी वयलीं अनधिकृत घरां/ बांदकामां अधिकृत करपाची तजवीज आशिल्लें लेजेस्लेटिव्ह डिप्लोमा दुरुस्ती विधेयक संमत जालें. सरकारी जमनी वयलीं घरां/ बांदकामां अधिकृत करपा खातीर लॅण्ड रेवेन्यू कोड दुरुस्ती विधेयक संमत जालें. तशेंच खासगी जमनी वयलीं घरां/ बांदकामां अधिकृत करपा खातीर अनधिकृत बांदकामां अधिकृत (रूका) करपी विधेयक संमत जालें. राज्यपालांचे मान्यताये उपरांत तिनूय विधेयकांचें कायद्यांत रूपांतर जालां. ह्या कायद्याची कार्यवाही आयज सावन सुरू जातली. घरां अधिकृत करपा खातीरच्या अर्जांचे वांटप आयज सावन सुरू जातलें. केंद्रीय गृहमंत्री अमीत शाह हांचे हस्तुकीं कांय जाणांक अर्जांचें वांटप जातलें. अर्जाचे नमुने, जमनीचे दर, नेम तशेंच प्रक्रियेची अधिसुचोवणी जारी जाल्या.
विवीध प्रकल्पांचो जातलो शुभारंभ
जुन्ता हावज इमारत प्रकल्प, प्रशासन स्तंभ इमारत, युनीटी मॉल, टावन स्कॅर, छत्रपती शिवाजी महाराज किल्ल्याचें सोबितीकरण, हरवळें घसघसो प्रकल्पाचो व्हर्च्युअल पद्दतीन शुभारंभ जातलो. तशेंच दांत म्हास्वयंविद्यालयाची नवी इमारत, डीबी बांदोडकार स्टेडियम, ई विटनेस रुमाचो शुभारंभ जातलो. स्वयंपूर्ण गोंय उपक्रमाचेर आदारीत पुस्तिकेचें प्रकाशन जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
