भांगरभूंय | प्रतिनिधी
माणिकराव ठाकरे हांचें समर्थन
भांगरभूंय । प्रतिनिधी
पणजीः प्रदेश काँग्रेसीक चाळीसूय मतदारसंघांत घटमूट करपाची प्रदेशाध्यक्ष अमीत पाटकार हांची भुमिका योग्यूच आसा. ताचो फायदो विधानसभा वेंचणुकेंत काँग्रेसी वांगडा युती करपी पक्षांक लेगीत जातलो, अशें प्रभारी माणिकराव ठाकरे हांणी शेनवारा ‘भांगरभूंय’ कडेन उलयतना स्पश्ट केलें.
कांय दिसां आदीं पत्रकारां कडेन उलयतना अमीत पाटकार हांणी म्हणिल्लें आपूण राष्ट्रीय पक्षाचो प्रदेशाध्यक्ष आसा. चाळीसूय मतदारसंघांत काँग्रेसीक घटसाण दिवप आपली लागणूक. तेच नदरेन आपूण काम करतां. विधानसभा वेंचणुकेंत जे काँग्रेसी वांगडा येतले, तांकां घेवन आनी जे येवचे नात, तांचे बगर आमी फुडें वतले. विधानसभा वेंचणुकेंत जर हेर पक्षां वांगडचे युती विशीं त्याच वेळार निर्णय घेतले, अशें तांणी म्हणिल्लें.
पाटकार हांच्या विधानाचो आम आदमी पक्षाचे (आप) राज्य निमंत्रक अॅड. अमीत पालेकार हांणी हरकत घेतिल्ली. मुख्यमंत्र्यांक सगळ्यांत चड भंय इंडिया आघाडेचो दिसता. तेच खातीर चाळीसूय मतदारसंघांत काँग्रेसीक घटमूट करतले, हें पाटकार हांचें विधान आपल्याक मुख्यमंत्र्यांचे संहितेचो भाग दिसता. देशांतले हेर विरोधी पक्ष तशेंच स्वता राहुल गांधी हांकां आघाडी जाय, अशें तांणी म्हणिल्लें. हाचे वयल्यान इंडिया घाघाडेंत दोन पक्षां मदीं अंतर वाडिल्ल्याचें वातावरण आसतनाच काँग्रेस प्रभारी माणिकराव ठाकरे हांणी पाटकार हांची भुमिका योग्य आशिल्ल्याचें स्पश्ट केलें.
दर पक्षाक आपलो विस्तार करपाचो अधिकार आसा. अमीत पाटकार हांचें विधान तेच नदरेन आसा. काँग्रेस घटमूट करून विधानसभा वेंचणुकेंत काँग्रेसीची हेर पक्षां वांगडा युती जाली, जाल्यार ताचो फायदो हेर पक्षांकूय जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
