भांगरभूंय | प्रतिनिधी
पणजी : जिल्लो पंचायत वेंचणुकेंत युती जावचे खातीर आरजीपीन निमाणे मेरेन यत्न केल्ले. मात कॉंग्रेस प्रदेशाध्यक्ष अमित पाटकार आनी गोवा फॉरवर्डाचे विजय सरदेसाय हांकां ही युती नाका आशिल्ली. दोगांचोय २०२७ चे विधानसभा वेंचणुकेंत कॉंग्रेसींतल्या फुटीरांक आडमार्गान परत हाडून तांकां भाजपाक विकपाचो मास्टरप्लॅन आसा, असो गंभीर आरोप आरजीपीचे अध्यक्ष मनोज परब हांणी केलो. बुधवारा पणजे जाल्ले पत्रकार परिशदेंत ते उलयताले. ह्या वेळार आमदार वीरेश बोरकार हाजीर आशिल्ले.
परब हांणी सांगलें, वेंचणुकेंत भाजपाक फायदो जावचो न्हय म्हणून आमी युती करपा विशीं आग्रो केल्लो. हे खातीर आमी गोवा फॉरवर्ड वांगडा जागा वाटपाची चर्चा करून मागीर कॉंग्रेसी वांगडा उलोवप केलें. युती जावचे खातीर आमी आमचें मतदान अदीक आसपी सुवातोय सोडपाचो निर्णय घेतलो. सुवातो वांटपा विशीं निमाणे निर्णय जातनाच गोवा फॉरवर्डान काणकोणच्या फुटीर इजिदोर फर्नांडीस हांकां पक्षांत घेतले. हाका आमी आक्षेप घेतलो. लोकांक फटयिल्ल्या मनशाक युतींत घेतल्यार हाचो परिणाम आरजीचेर जातलो अशेंय आमी सांगलें.
हे विशीं आमी विजय सरदेसाय हांचे कडेन संपर्क करपाचो यत्न केलो. मात ते आमकां मेळूंक ना. उपरांत आमी कॉंग्रेसी कडेन संपर्क केलो तेन्ना तांणीय ही भुमिका मान्य ना अशें सांगलें.
कॉंग्रेस प्रभारी माणिकराव ठाकरे हांचे वांगडा जाल्ले बसकेंत आमी हो मुद्दो हाजीर केल्लो. ठाकरे हांणी तेन्ना फुटीरांक कसलीच संद दिवचे नात अशें स्पश्ट केलें. हाका लागून वेंचणुकेंत कॉंग्रेसीन ३७ जाल्यार आरजीपीन १३ सुवातो लढटले अशें निश्चीत जाल्लें.
मात, गोवा फॉरवर्डान अचकीत शिरोडें, खोर्ली ह्या सुवातांचेर दावो केलो. ह्यान पयलीं तांणी आपल्याक ह्यो सुवातो नाकात अशें सांगिल्लें. गोवा फॉरवर्ड आपले उमेदवार उबे करून भाजपाक मजत करता. अमित पाटकार आनी विजय सरदेसाय हे दोगूय भाजपाच्या आदेशान आरजीपी सोंपोवपाचो यत्न करतात. विजय हांकां आरजीपीचो वापर करून गोवा फॉरवर्डाक घटमूट जाल्यार कॉंग्रेसीक दुबळी करपाची आसा, असो आरोप परब हांणी केलो.
दिल्लीक वचूंकच नाशिल्लों
परब हांणी सांगलें, नोव्हेंबर म्हयन्यांत आमी दिल्लीक वचून आयिल्ल्याच्यो चर्चा रंगिल्ल्यो. मात आमी दिल्लीक वचूंकच ना. आमी दोन वर्सां आदलो फोटो अपलोड केल्लो. हे विशीं आमी विरोधी पक्ष फुडारी युरी आलेमांव हांकांय सांगिल्लें. आमकां फकत प्रतिक्रिया पळोवपाच्यो आशिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
