भांगरभूंय | प्रतिनिधी
पिरायेच्या 82 व्या वर्साय बी ते एका 18 वा 20 वर्सां पिरायेच्या तरणाट्या मशेन उमेदीन वावर करतात. ही गजाल खंयच्याय तरणाट्याक लजेची आनी….
अमिताभ बच्चन हे भारतातले हिंदी सिनेमा उद्देगांतले महानायक ‘स्टार ऑफ द मिलेनियम म्हूण जगभरात फामाद आसात. गेलीं 5 दसकां ते भारतांतले कोट्यांनी सिनेमामोगी, प्रेक्षकांची मनरिजवण करीत आसात. पिरायेच्या 82 व्या वर्साय बी ते एका 18 वा 20 वर्सां पिरायेच्या तरणाट्या मशेन उमेदीन वावर करतात. ही गजाल खंयच्याय तरणाट्याक लजेची आनी 60 वर्सा पिराय जातकीच निवृत्ती घेवन सुशेगाद जीण जगपी मनशाक अजापाची जावन आला.
आयजय जरी ते तरेतरेचे सिनेमा करत आसले, विविध भूमिका करपांत जरी व्यस्त आसले तरी जाण्टे जाल्ले, थकलेले कुडीचो आनी वयाचो परिणाम तांचेर जाला, हे पळोवंक मेळटा. पयलींचे भशेन नाच, साहस दृश्यां आनी हाणामारीचे सीन करपाक आपल्याक जमना, अशे केन्नातरी जाणूनबुजून वा भावनेच्या भरांत समाजीक माध्यमांचेर पोस्टा वरवीं उलोवन वतात. तांचे समकालीन, म्हान, प्रतिभावंत नट आपले पिरायेची साठ वा सत्तर वर्सां जाले उपरांत ‘लेटस् हँग द बूटस्’ ह्या न्याया प्रमाण वाडटे पिरायेची आनी थकलेल्या शरीराची गरज आनी कौल वळखून निवृत्त जावन आराम करतात, सुशेगाद जीण जगतात. पूण बिग बी हांचे तशें ना. आयजूय बी रातचे 10 ते 12 वराचेर शूटींग सोंपोवन घरा आयिल्ले बच्चन परतून दुसरे दिसा फांतोडेर पांच वरांचेर आपले व्यायाम शाळेंत व्यायाम करतात आनी घरा येवन न्हावन धुंवून शूटींग करपाक सकाळीं 7 वरांचेर फिल्माच्या सेटाचेर हाजीर आशिल्ले पळोवंक मेळटात. हेर कलाकार वा तांत्रिक विभागातले क्रू मेंबर्स लेगीत अजून आयिल्ले नासतात. त्या वेळार ते मेकअप करून शाॅट दिवपाक तयारीन आसतात. आमच्या सारक्या कलाकारांक ही प्रेरणा घेवपा सारकी गजाल.
पूण वय वाडटा तशी म्हातारपणाचीं लक्षणां मनशाचेर दिसतात. कितलोय प्रतिभावंत नट जरी आसलो तरी पिरायेक लागून पाठ केल्ले संवाद विसरप, हालचालीचेर मर्यादा येवप, शारिरीक समस्या जावप, स्टंट करतना दुखापत जावप, भलायकेच्यो कागाळी भायर सेवप, शरीरान अश्या कामाक प्रतिकार (Resist) करप, अशो गजाली पळोवंक मेळटातच. बिग बी तशे तांच्या फेसबुक पोस्टा वरवीं सांकेतिक भाशेंत इशारो दिवन उलयताय बी! मागीर केन्नातरी मरण येवपाचो विशय येता. कोणतरी द्वेश करपी चाहतो (?) ‘तुम मर क्यो नही जाते?’ असो अपमान आनी उपमर्द करपी उर्मट कमेंट करता आनी बच्चन सायब आपल्या आदल्या पिक्चरांतले ‘अँग्री यंग मॅन’ पात्रांच्या अवतारांत आसलो जाल्यार जशाक तशें खणखणीत जापय बी दिता. शांत आसलो जाल्यार शालजोडीन ताकाय मर्माक लाना तसो थोमणो मारता (आनी मागीर डिलीटय बी करता) नाजाल्यार, एकदम चिडीचूप! बच्चन सायबांचें मौनव्रत जिवीतांत राजकारणात येतकीच, राजकारणी, राजकी पक्ष, विचित्र लोक आनी विखारी मिडीया, पत्रकार (माध्यमांचो एक गट वा समूह, सगले पत्रकार न्हय) हांचे कडेन दोन हात केल्ले आनी प्रचंड व्हड रिणाच्या चेंपणान बुडून रावनासतना, राखेतल्यान फिनिक्स पक्षी कशे भरारी घेवपी अभिताभ बच्चन गेलीं कांय वर्सां आतां वाद आनी वादग्रस्त विशय टाळटात अशें पळोवंक मेळटा. आंगात जो मेरेन रग आसा, तो मेरेन आपूण कार्यरत रावतोलो, ही तांची जिद्द “काबिले तारीफ” आसाच, पण आयुश्यांत खंय थारपाक जाय, हें एका मनशाक खबर आसचें पडटा. तांचे ट्विटर वा फेसबुक हँडलाचेर तांचे आनी तांचे चाहते, प्रशंसक हांचे वादय बी जातात. बालगंधर्व उर्फ नारायण राजहंस हे जाण्टे पिरायेचेरय नाटकांत स्त्री भूमिका करताले. एकदा एका प्रयोगात खोकत आसतना दातांची कवळी तांच्या हातांत पडली. प्रेक्षकांचे मुखार ते लजेन सामके खजील (embaressed) जाले. प्रेक्षकांनीय बी मुकाटपणान आपल्या आवडट्या नटाची ही धजा केविलवाणे अवस्थेत ओगी रावन पळयली.
अमिताभ बच्चन हांणी गेलीं जायतीं वर्सां अँग्री यंग मॅन आनी महानायक म्हूण गाजयिल्लीं आसात. जायते आघात, अपघात, दुयेसां जावं वा कुली (1982) सिनेमाचे शूटींग करतना जाल्लो भिरांकूळ अपघात जावं वा मे 2006 चे गंभीर दुयेंस आसूं, प्रचंड इत्साशक्तीच्या आदाराचेर ते सगल्या प्रसंगांचेर मात करून वयर आयल्यात. तांणी आतां खंय तरी हो प्रवास थाबोंवचो आनी शॉन कॉनेरी आनी मार्लन ब्रांडो ह्या महानायकां भशेन जाण्टेंपण शांतपणान काडचें, अशें तांचो चाहतो म्हूण मत उक्तावचें कशें दिसलें, म्हणून हो लेखप्रपंच. देव बरें करूं.
– सनतकुमार फडते
70204 38469
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
