भांगरभूंय | प्रतिनिधी
जायत्या जाणांच्यो परिक्षा सोंपून आतां सुटी सुरू जाल्यात तर जायत्या जाणांच्यो परिक्षा अजून चल्ल्यात. तकली फोडून, दिसाच्यो राती करून, इश्टिणीच्या जल्मदिसाचो, शेजारच्या लग्नाचो पसून बळी
दिवून, “देवा फक्त पास जाल्यार पुरो” म्हूण मागून एकदाची ती परिक्षा आमी दिवून काडल्या. इतलो त्याग करून, इतले तकस घेवन आमी इतलीं शिकलीं, परिक्षेक पानांची पानां बरोवन काडलीं, पूण… तातूंतलें आमकां कितलें पूण याद? आनी
याद ना जाल्यार आमच्या त्याग- तकसांचो कितें पूण
फायदो?
एकान एक परिक्षेंत पास जावन आमी फुडें- फुडें वचत रावलीं. ग्रॅज्युएशन पसून पास केलें, तो काळो रोब घालून कितलेशेच फोटो काडले, मात “पांचवे यत्तेंत कितें शिकयिल्लें?” म्हूण कोणेय जर आमकां विचारलें जाल्यार ताका जाप तरी दिवपाक आमकां जमत? परिक्षा दिवच्या पाराक आमी दितात, शिकचे पाराक शिकतात, इश्कोलाक वच्चे पाराक वतात जाल्यार स्वता खातीर आमी कितें करतात? किरा वरीं कोणूय शिकत पूण मनशा वरीं आमी शिकतात काय?
परिक्षेंत बऱ्या मार्क्सांनी पास जावपा इतलोच आमचो अभ्यास आसता. गिन्यान मेळोवपाच्या उद्देशान आमी केन्ना अभ्यास केला? टिचरीन जर सारके मार्क्स दिले नात जाल्यार ताचे खातीर आमी रडटात, पूण टिचरीन जर सारकें ज्ञान आमच्यांत रिगयलें ना जाल्यार ताचे खातीर कोण रडटा? हाकाच लागून आमचे मार्क्स वाडत वतात, पूण आमच्या गिन्यानांत मात लेगीत भर पडना. मार्क्सांचेर चड लक्ष ना दिवन विद्यार्थ्यांक शिकोवपाची पद्दतच चुकीची आसत. अभ्यासांतल्या मेळयिल्ल्या गिन्यानाचेर जर आमी अदीक लक्ष दिल्लें जाल्यार आयज विद्यार्थी मार्क्सा खातीर न्हय तर गिन्यान मेळोवपा खातीर शिकतलो
आशिल्लो.
आयचे पिळगेची मानसीक स्थिती इतली दुर्बळ जाल्या की बारकुल्या गजालींक सुद्दां आमी रोखडींच आंग काडटात. घडये आमची शिकपाची आनी शिकोवपाची पद्दतच चुकीची, ताकाच लागून वर्गांत पयल्या नंबराचेर येवन ग्रॅजुएशनाची डिग्री आमी मेळयतात, मात जिवितांत येवपी आव्हानांक फुडो करपाची तांक आमच्यांत आसना. आयज आमचे कडेन कितल्योश्योच सवलती आसात. ‘हें’ नाजाल्यार ‘तें’ आनी ‘तें’ नाजाल्यार ‘हें’. आयज काम मेळोवपाची कितलींशींच दारां उक्तीं जाल्यांत, तरीय तांचो वापर करपाक आमकां कळना.
तकलेर ताण हाडून, हार मानप जर आमकां अदीक सरळ दिसता जाल्यार “इतलें शिकिल्ल्याचो कितें फायदो जालो?” होय प्रस्न स्वताक विचारून ताची जाप सोदून काडपाचो यत्न करुंया.
मेगन दे सौजा
7218609502
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
