अभ्यास एके अभ्यास??

भांगरभूंय | प्रतिनिधी

हो फक्त विचार, निर्णय. तो अजून चालीक लावंक ना जाल्यार हाचेर विचारमंथन जावप गरजेचें.

राष्ट्रीय शिक्षण धोरण चालीक लावपाक, सीबीएसईच्या वेळापत्रका प्रमाण गोंयचो अभ्यासक्रम हाडपाक शिक्षण खात्यान एक इतिहासीक निर्णय जाहीर केला. फुडलें 2025- 26 चें शिक्षणीक वर्स एप्रीला पसून सुरू करपाचें. यत्ता सवी ते धावी आनी बारावेचे हे वर्ग. सकाळीं साडे इकरा मेरेनूच शाळा. 1 मे ते 3 जून मेरेन म्हयनोभर गिमाळी सुटी आनी मागीर 4 जूनाच्यान सदचे भशेन दनपार मेरेन शाळा. नव्या शिक्षण धोरणा प्रमाण सप्तकाक 36 ते 39 वरां शिकोवपाक जाय, म्हूण शिक्षणीक दीस आनी वेळ वाडोवपाचो विचार चल्ला. दिवाळेचे सुटयेंत विद्यार्थ्यांचो कुशळटाय विकास करतले. इकरावेचो निकाल उसरां लागता म्हूण तांकां ह्या वर्सा सूट दिल्या. हो निर्णय घेतला, पूण तो चालीक लावंक ना, अशें शिक्षण खात्यान प्रसारमाध्यमांक सांगलां. (पूण, शिक्षण संचालकान निर्णय जाला, अशें परिपत्रक काडलां.) निर्णय घेवचे पयलीं शिक्षण खात्यान तज्ञां कडेन भासाभास केल्याच आसतली!! ही घोशणा सोशल मिडिया वरवीं संवसाराच्या खाची- कोनशांनी पावतकच साहजिकूच खवदळ जालो. खास करून कांय निवृत्त शिक्षकांनी, पालकांनी विरोधांत खर प्रतिक्रिया दिल्यात. समर्थन करपी खूब उणें आसात.
शिक्षणीक मळाचेरूय न्हय, तर हेर कडेनूय कसलोय निर्णय घेवपाचो जालो जाल्यार ताचेर साधक बाधक विचार जावंक जाय. फायद्या परस लुकसाण कितें जातलें, तेंय मतींत घेवंक जाय. विचार समाजाच्या बऱ्याचो आसलो तरी कांय वेळार मनांतूच दवरचो पडटा. कारण समाजांत ताका लागून असंतोष निर्माण जावं येता. लुकसाणूय जावं येता, सुरळीत चलपी गाडी बंद पडूं येता. सांजवेळार सूर्य अस्तंतना जेवप आनी आठ मेरेन न्हिदप हें भलायकेक एकदम बरें अशें सगलेच तज्ञ म्हणटात. पूण आयच्या बदलिल्ल्या काळात तें सगल्यांकूच शक्य आसा? शाळा एप्रीलांत सुरू करपाचें थारायतना फक्त विद्यार्थ्यांचे शिक्षणीक उदरगतीचोच विचार करून उपकारचोना, हांगाचें हवामान, शाळांतल्यो सुविधा, विद्यार्थी-पालकांची संवय, मानसिकतायूय विचारांत घेवची पडटली. गोंयांत माय न्हय, तर मार्चूय तापपाक लागता. मार्च ते जून हे तीन- साडेतीन म्हयने सोंसपाक जायना इतलो हुलोप मारता. आमच्यो चडश्यो शाळा घूड कश्यो, कांय शाळांनी फॅन पसून नात. पाख्यार पत्रे आशिल्ल्योय शाळा आसात खंय. सगल्या शाळांनी शिक्षण खात्यान स्वताच्या खर्चान एसी बसयले तरी वर्गांतल्या 25 टक्के तरी विद्यार्थ्यांक तें माल पडटलें. एप्रीलांत उश्णतायेक लागून भलायकेच्यो समस्या उब्यो जावं येतात. एप्रीलांत विद्यार्थी, पालक भोंवडेर वतात. मामागेर वचपी, रातदीस खेळपी, नवी कला, कुशळटाय शिकपीय विद्यार्थी आसात. सुटयेची, शाळेक जूनांतूच वचपाची तांची मानसीकताय बदलपाक वेळ लागतलो.
शाळा एप्रीलांत सुरू जाल्यो जाल्यार 2024- 25 च्या परिक्षांचो निकाल केन्ना जाहीर करतले? सगलीच ताकतीक जातली. कांय शिक्षणतज्ञांच्या मतान, सेकंड सेमिस्टराची परिक्षा फेब्रुवारी, मार्चाच्या पयल्या सप्तकांत घेवचे परस ती एप्रीलांत घेवन (11 वरां जावचे पयलीं) निकाल जाहीर करचो. मागीर मे म्हयन्यांत सुटी आनी जूनांत सदचे भशेन शाळेचें नवें वर्स. विद्यार्थी एप्रीलांत शिकिल्लें मेचे सुटयेंत विसरतले, अशेंय तांकां दिसता. आमच्या देशांत प्रत्येक राज्यांचे शिक्षणीक दीस, सुटयो वेगळ्यो. हातूंतल्यान सुवर्णमध्य काडून सगल्यांक एकूच न्याय, हे धरतेर आंखणी करप शक्य ना? काश्मीर, हिमाचल सारक्या राज्यांनी शिंया दिसांनी अडचणी येवं येतात. अभ्यासक्रम अमूकच वरां, ही अट सदळ करप शक्य ना? नव्या शिक्षण धोरणांत सांजेच्या वेळार नाच, अभिनय, खेळ, गायन, वक्तृत्व, समाजसेवा, व्यक्तीमत्व विकास कार्यावळी….. म्हणल्यार अभ्यासक्रमा भायलें शिकचें पडटलें. सद्दां आनी दिवाळेचे सुटयेंत हें घेतले खंय. ताचे परस दिवाळेची सुटी इल्ली आटोवन थंय अभ्यास शिकोवंक मेळचोना? नरकासूर आनी तुळशीचें लग्न सोडल्यार गोंयांत दिवाळेक तसो नेट नासता. नातलांचीय सुटीय थोडी उणीं करूं येता.
हो फक्त विचार, निर्णय. तो अजून चालीक लावंक ना जाल्यार हाचेर विचारमंथन जावप गरजेचें. ह्या निर्णयान गोंयचे विद्यार्थ्यांचो शिक्षणीक पांवडो, बुद्धीमत्ता वाडटली? तांकां मानसीक त्रास जातले? तांची भलायकी इबाडटली? ते स्पर्धा परिक्षांनी देशांत पयल्या 25 क्रमांकांनी येतले?…… नेमकें कितें जातलें? बरें जातलें कांय वायट जातलें?…. ताचेर वैचारीक घुसळण जावंदी. निवृत्त मुख्याध्यापक, प्राचार्य, पालक हांचे समिती वरवीं नेमक्यो समस्या, फायदे, तोटे मुखार येवंदी. वाडटे सर्तीक, म्हारगायेक, वशिलेबाजीक लागून आयचे विद्यार्थी बेजारल्यात. तातूंत शाळा सुट्टकच, सुटयेच्या दिसांनी तांकां शाळेंत आपयले जाल्यार तें माल वचूं येता. आसा तीच बांदावळ कायम दवरून शिक्षणीक वरां भरपाचो यत्न जाल्यार सगल्यांकूच बरें न्हय??