भांगरभूंय | प्रतिनिधी
माश्यां आंगले उच्च माध्यमीक विद्यालयांत शिकयतालों तेन्नाची एक याद. पंदरा- सोळा वर्सां आदली! म्हजो विशय आशिल्लो सॅक्रेटरीयल प्रॅक्टीस. इकरावी यत्तेच्या वर्गांत विंगड विंगड उद्देगीक आस्थापनां, तांची स्थापना प्रक्रिया, दरेका आस्थापनांचीं खाशेलेपणां, फायदे- तोटे आदीं घटकांचो आस्पाव आशिल्लो पाठ शिकयतालों. ताचोच भाग म्हूण भागिदारी आस्थापनाची शासकीय खात्यांत रितसर नोंदणी कशी करप हें भुरगीं शिकतालीं. मदींच एक विद्यार्थी उबो रावलो आनी हांव सांगता ती नोंदणी प्रक्रिया काळा भायली जाल्या आनी आतां नवी पद्दत आयल्या म्हणपाचें ताणें सांगलें. म्हाका ताची ती कृती त्या खिणाक फटकळपणाची आनी अती हुशारकायेचें दर्शन घडोवन वर्गांत आपली छाप मारूंक सोदपी कशी दिसली. इकरावी यत्तेचे वर्ग आरंभ जावन थोडेच दीस उलगल्ले. उच्च माध्यमीक विद्यालयांतल्या आरंभाच्या दिसांनी कांय विद्यार्थी असले फार्स करतात म्हणपाचो म्हाका अणभव आशिल्लो. अशें आसलें तरी ताच्या फटकळ पूण उत्स्फूर्त आनी आत्मविस्वासान भरिल्ले प्रतिक्रियेन हांव खिणांत संभ्रमांतल्यान सुद्दीर आयलों.
हांवें ताका ताचें म्हणणें पटोवन दिवंक सांगलें. ताणें आनी ताच्या व्हडल्या भावान कांय म्हयन्यां आदींच बापायच्या आदारान एका भागिदारी धंद्याक आरंभ केल्लो. आस्थापनाच्या त्या पुराय नोंदणी प्रक्रियेंत तो प्रत्यक्ष वांटेकार जाल्लो. पाठ्यपुस्तकांतले प्रक्रिये कडेन तिचो मेळ बसना म्हणपाचें ताच्या लक्षांत आयलें. चार-पांच म्हयन्यां आदीं शासनान भागिदारी आस्थापनांच्या नोंदणी प्रक्रियेंत केल्ल्या कांय बदलां विशीं हांव अनभिज्ञ आशिल्लों. म्हज्या त्या विद्यार्थ्या कडेन वास्तव म्हायती आशिल्ली. म्हज्याच एका विद्यार्थ्यान म्हाका बदलिल्ले प्रक्रियेची वळख करून दिल्ली. त्या दिसा वर्गांत त्या विद्यार्थ्यानच नवी नोंदणी प्रक्रिया प्रभावीपणान पुराय वर्गाक मुखार येवन समजावन सांगिल्ली.
आपल्याच विद्यार्थ्यां कडच्यान शिकपाचो आनंद त्या दिसा हांवें घेतलो. म्हज्या तीन दसकांच्या शिक्षकी पेशांत विद्यार्थ्यां कडच्यान शिकपाचे साबार प्रसंग आयले. शिक्षक म्हूण अभिमानाचे खीण ते! आनंदाचे परमोच्च खीण!!
सेक्रेटरीयल प्रॅक्टीस ह्या विशयांत गोंय शालान्त मंडळान पंदरा- सोळा वर्सां आदीं काळाची गरज नदरे मुखार दवरून शॅर्स, डिबेंचर्स, स्टॉक एक्सचेंज सारख्या नव्या घटकांचो आस्पाव केल्लो. म्हजे खातीर ह्या विशयांची म्हायती मेळोवपाचे साबार मार्ग आशिल्ले. पूण प्रत्यक्ष शॅर्स, डिबेंचर्स खरेदी- विक्रीचे प्रक्रियेंत सहभागी आशिल्ल्या कोणाय तरी मनशा कडच्यान हांव शिकून घेतलों म्हणपाचें हांवें थारायलें. ते खातीर हांवें म्हजोच विद्यार्थी तपन आचार्याचो आदार घेतलो. ताणें म्हाका जी वेव्हारीक प्रक्रिया समजावन सांगली ती खंयच्याय पुस्तकांत दिल्ल्या म्हायती परस चड प्रभावी आशिल्ली.
कांय वर्सां आदीं म्हजी रवीन्द्र केळेकार ज्ञानमंदीरांतली तत्कालीन सहकारी ब्लूड रॉड्रीगीश एक अभिनव कल्पना घेवन म्हजे कडेन आयली. शाळेंत शिकपी कांय विद्यार्थ्यां कडेन अप्रुपाचीं कौशल्यां आशिल्लीं. दीसपट्टे जिणेंत ते विद्यार्थी त्या कौशल्यांचो प्रभावी वापर करताले. तिणे अश्या विद्यार्थ्यांची एक वळेरी केली. त्या आठ-धा जाणांक तिणे आपले कल्पने विशीं सांगलें. तांकां स्वता कडेन आशिल्लीं कौशल्यां वर्गांतल्या हेर विद्यार्थ्यांक शिकोवंक सांगलें. शाळे भायल्यान आपयिल्ल्या मार्गदर्शकाक दितात तितलोच मान-सन्मान ह्या भुरग्यांक दिवन, तांची खाशेली वळख बी करून दिवन तांकां भुरग्यां खातीर कार्यशाळा घेवंक सांगली. ह्यो कार्यशाळा भोवच प्रभावी जाल्यो. कौशल्यां आशिल्ल्या भुरग्यांनी प्रतिश्ठा आनी आनंदाचो परमोच्च खीण अणभवलो जाल्यार हेर विद्यार्थ्यांनी नवीन कितें तरी शिकपाचो!
बऱ्याचश्या शाळांनी बाजार डे सारखे उपक्रम घडोवन हाडटात. भुरग्यांक अश्या उपक्रमांतल्यान उद्देजिकताय, मार्केटींग सारख्यो संकल्पना कळटातच, वांगडाच तांचे मदीं ते विशींची उत्सुकताय आनी आवड तयार जाता. दिवाळेच्या आदीं भुरग्यांक कौशल्यांचो वापर करून आकाशदिवे, शुभेच्छा कार्डां तयार करपाक लावप आनी तांचे विक्रेंतल्यान आयिल्ली येणावळ तांकां घरा व्हरपाक दिवप हे सारखे उपक्रम भुरग्यांक श्रमांचें, कौशल्यांचें आनी स्वावलंबनाचें मोल शिकयतात.
सेक्रेटरीयल प्रॅक्टीस ह्या विशया संबंदीचीच आनीक एक याद! अभ्यासक्रमांत ‘बॅंकेंत खातें उगडपाची प्रक्रिया’ हो घटक आशिल्लो. तो शिकले उपरांत भुरग्यांनी परिक्षेंत त्या संबंदीच्या प्रस्नाक पांचांतले पांच गूण मेळयले. पूण थोड्याच दिसां उपरांत सुटये काळांत भुरग्यांक प्रत्यक्ष बॅंकेंत वचून बचत खातें उगडपाचो स्वाध्याय दिलो तेन्ना वर्गांतल्या शिक्षणाचो मेळ प्रत्यक्ष प्रक्रिये कडेन जुळना म्हणपाचें तांच्या लक्षांत आयलें. आमच्या शिक्षणाची ही अावतिकाय!
पदवी मेरेन शिक्षण घेतिल्ल्या कांय गोंयकार तरणाट्यांक गोंय लाेकसेवा आयोगाचें नांव लेगीत खबर ना म्हणपाची खंत हालींच मुख्यमंत्र्यानी टिवी वेले एके चर्चेंत व्यक्त केल्ली. गजाल खरी ती! खंतिची!! पूण तांतूंत भुरग्यांची चूक कितें? लोकसेवा आयोग, स्पर्धात्मक परिक्षा, कौशल्याधारीत शिक्षण, वेवसायीक शिक्षण, विंगड वेवसाय वा धंद्याक आशिल्लो वाव, ते खातीर उपलब्ध आशिल्ल्यो शासकीय येवजण्यो हांची तांकां केन्ना कोणेय वळख घडयल्या तर?
गोंय राज्याचे मानादीक मुख्यमंत्री डॉ. प्रमोद सावंत हांणी हालींच गोंयच्या माध्यमीक विद्यार्थ्यां कडेन आभासी स्वरुपांत संवाद सादलो. आठवी ते धावी यत्तेंतल्या लागीं लागीं साठ हजार विद्यार्थ्यांनी ताचो लाव घेतलो. विशय आशिल्लो- करियर मार्गदर्शन!
धावी- बारावेचे परिक्षेंत शंबर टक्के निकालाची मोख मुख्यमंत्र्यांनी वयर उल्लेख केल्ल्या संवादांत उक्तावन दाखयल्या. शंबर टक्के निकालाची मोख दवरपांत चुकीचें कांयच ना. शिक्षणीक मळार आशेचें किरण दाखोवपी सकारात्मकता ती! पूण हो शंबर टक्के निकाल निखटो संख्यात्मक न्हय तर गुणात्मक आसतलो हाची खात्री शासनाक आनी संबंदितांक घेवची पडटली. ते खातीर अभ्यासक्रम आनी वास्तवताय हांचे मदीं आमकां सेतू बांदचोच पडटलो!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
