अभ्यासक्रमांत बदल जाताच ‘सीए’ चे नोंदणींत वाड
भांगरभूंय | प्रतिनिधी
नवी दिल्ली, खबरां संस्था ः फाटल्या वर्सा चार्टर्ड अकावटंट (सीए) अभ्यासक्रमांत केल्ल्या बदलांक लागून नोंदणी वाडल्या. स म्हयन्यांत 1.29 लाख विद्यार्थ्यांनी नव्या सीए अभ्यासक्रमां खातीर नोंदणी केल्या. नव्या अभ्यासक्रमा सयत ह्या विद्यार्थ्यांची परिक्षा जून 2024 त पयलेच खेपे जातली. विशेश म्हळ्यार ही वाड स म्हयन्यां भितर जाल्या.
नव्या अभ्यासक्रमा खातीर नोंदणी फाटल्या वर्सा ऑगस्टांत सुरू जाल्ली. डिसेंबर 2024 खातीर नोंदणी प्रलंबीत आसा. नवो अभ्यासक्रम सुरू जावचे पयलीं एका वर्सात 2 लाखां वयर नोंदणी जाल्ली. आयसीएआयच्या 2022 वर्साच्या अहवाला प्रमाण 2013 ते 2022 ह्या काळांत सीए अभ्यासक्रमां खातीर नांव नोंदणींत 30 टक्क्यांनी उणाव आयला. 2013 त 3.11 लाख विद्यार्थ्यांची नोंदणी जाल्ली जाल्यार 2022 त 2.24 लाख नोंदणी जाली.
सध्या देशांत सुमार 4 लाख पात्र सीए आसात. देशाची अर्थवेवस्था 4 ट्रिलियन डॉलराची आसा. 2047 त ती सुमार 30 ट्रिलियन रुपया जातली. ती हाताळपा खातीर 30 लाख सीए जाय पडटले. आयसीएआयचे अध्यक्ष रजनीश अग्रवाल हांणी सांगलें, एक लाख कोटी वाडपा खातीर सरासरी एक लाख सीए आवश्यक आसात.
‘इच वन टीच वन’ येवजण: दरेक सीए 1 विद्यार्थी दत्तक घेतलो
विद्यार्थ्यांची कामगिरी सुदरावपा खातीर ‘इच वन टीच वन’ येवजण सुरू करतले. हातूंत देशभरांतले सगळे 4 लाख सीए एक सीए विद्यार्थी दत्तक घेवन मजत करतले.
चार कारणांक लागून हो अभ्यासक्रम विद्यार्थ्यांचे आकर्शण…
० अभ्यासक्रम पुराय करपाचो वेळ 4.5 वर्सां वयल्यान 3.5 वर्सां केला.
० फावंडेशन, इंटरमिडिएट आनी फायनल येवजणेंतल्यान जायते पेपर काडून उडयले.
० एथिक्स भायर एआय, डेटा सायन्स आनी ब्लॉकचेन अशे नवे तंत्रीक विशय जोडले.
० सगळ्यांत म्हत्वाचें म्हळ्यार तीन वर्सांची सक्तीची आर्टिकलशीप दोन वर्सां मेरेन उणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
